Жамбыл облысының Түймекент ауылында екі жасөспірім суицид жасады.
Бұл ақпаратты Жамбыл облысының полиция департаменті растады.
Осы фактілер бойынша Байзақ ауданының полиция бөлімі сотқа дейінгі тергеу бастаған.
«Оқиғаның толық мән-жайын анықтау үшін қажетті кешенді тергеу шаралары жүргізіліп жатыр. ҚР ҚПК 201-бабына сәйкес, өзге ақпарат тергеу мүддесіне байланысты жария етілмейді», — деп мәлімдеді ПД.
Ертең, 30 қазан күні елімізде уақытша радио және телевидение жұмысын тоқтатады.
«Қазтелерадио» АҚ таратқан мәліметке сәйкес, телерадио хабарларын таратудың үздіксіз әрі сапалы болуын қамтамасыз ету мақсатында тоқсан сайын жерсеріктік, цифрлық және аналогты эфирлік желілердің техникалық құралдарында сервистерді жаба отырып, жоспарлы-профилактикалық жұмыстар жүргізеді.
«30 қазан 03:00 мен 17:00 аралығында жерсеріктік, цифрлық және аналогты эфирлік желілердің техникалық құралдарындағы сервистер жабылып, жоспарлы-профилактикалық жұмыстар жүргізіледі. Осыған байланысты, яғни жұмыстар жүргізілген кезде Қазақстанның барлық аумағында телерадиоарналарды ретрансляциялау уақытша тоқтатылады. Уақытша қолайсыздықтар үшін кешірім өтінеміз», — делінген мәліметте.
2024 жылғы 28 қазанда Ақмола, Ақтөбе, Абай, Павлодар, СҚО, Қарағанды, Қостанай, ШҚО және Ұлытау облыстарының кей жерлерінде қар аралас жаңбыр жауады. Ал Атырау және Батыс Қазақстан облыстарының кей аумақтарында жаңбыр жаууы мүмкін, деп мәлімдеді Қазавтожол.
Сол себепті жүргізушілерге қауіпсіздік ережелерін қатаң сақтап, жолдардағы ауа райының қолайсыздығын ескерулеріңізді сұраймыз, – деп қосты ведомство.
1403 байланыс орталығына хабарласып, тәулік бойы қосымша ақпарат алуға болады.
Сайрам ауданы Ақсу елді мекеніндегі Эгамбердиевтер отбасында үш перзент дүниеге келді.
27 жастағы Назима Эгамбердиева екі ұлынан кейін өмірге 17 қазан күні 2 ұл мен 1 қыз әкелді. Бірнеше күн дәрігердің бақылауында болған сәбилер мен анасы бүгін үйіне шықты. Отбасының қуанышымен бөлісуге келген туыстары сәбилерді көру үшін перзентхана маңына жиналып, ақжарма тілектерін білдірді.
«Үшемдер мерзімінен бұрын, яғни жүктіліктің 34 аптасында жоспарлы кесір тілігі арқылы дүниеге келген. Олардың бірінің салмағы 2 келі 430 грамм болса, екіншісі – 2 келі 490 гр, үшіншісінікі 1 келі 730 грамға жеткен. Шексіз қуанышқа кенелген отбасы үшемдерге Хасан, Фатима, Хусан деп ат қойыпты. Алғашында нәрестелерге медициналық көмек қажет болды», — деп хабарлайды Түркістан облысы әкімдігінің баспасөз қызметі.
Дәрігерлердің айтуынша, үшемдер туған кезде аппаратта болған. Оларды алғашқы күндері жоғары күтімге мұқтаж нәрестелер бөлімшесінде бақылаған. Тексеру, емдеу, күтіп баптау жұмыстары жүргізілді. Қазіргі таңда жағдайлары жақсы, медицина қызметкерлерінің көмектерінен соң үшемдер жақсы салмақ қосып, ана сүтін қанағаттарлықтай еміп жатыр.
Саран әкімі Еркін Баулықов пен Қарағанды облысының энергетика және ТКШ басқармасының басшысы Тілектес Досаев қатаң сөгіс алды.
Облыс әкімінің бірінші орынбасары Азамат Тайжановқа ескерту түрінде тәртіптік жаза жарияланды. Бұл туралы облыс әкімі Ермағанбет Бөлекпаев аппараттық кеңесте мәлімдеді.
«Өзінің қызметтік міндеттерін тиісінше орындамағаны үшін, атап айтқанда, жылыту маусымына дайындықты жеткіліксіз түрде бақылағаны үшін менің бірінші орынбасарыма ескерту түрінде тәртіптік жаза қолданылсын. Саран әкімі мен энергетика және ТКШ басқармасының басшысына қатаң сөгіс жариялансын. Қыс мезгілінде сапалы жылумен қамтамасыз ету міндеті біз үшін басым екенін тағы да еске салғым келеді. Жұмыс тұрақты түрде жүргізілуі керек! Әр жағдай бойынша қатаң баға беріліп, жауапкершілік дәрежесі анықталады», – деді өңір басшысы.
Саран әкімі қаладағы жылу жағдайы туралы баяндады. Оның айтуынша, барлық жергілікті қазандықтар штаттық режимде жұмыс істеуде, отын қоры қамтамасыз етілген. Кейбір үйлер бойынша қалалық чатқа түсетін сұрақтар жедел қаралады, деп сендірді Еркін Баулықов.
Polisia.kz мәліметінше, сақшылар электронды темекіге қатысты заң бұзушылықтың жолын кесіп, жалпы құны 55 миллион теңгеге жететін вейп партиясын тәркілеп алды.
Екібастұз қаласындағы өнеркәсіптік база аумағында орналасқан қоймада полицейлер 5503 дана вейп пен 1097 қосымша сұйықтық құятын құтыны анықтап, тиісті шаралар қолданды. Бұл заңсыз тауар сатылымға шығарылмақ болған. Ресми тыйым салынғанына қарамастан, жастар интернет-дүкен арқылы мессенджерлер мен әлеуметтік желілердегі арналарды пайдаланып, вейптерді сатумен айналысқан. Нәтижесінде заңсыз электронды темекі сатты деген күдікпен екі азамат полицияға жеткізілді.
Темекі өнімдеріне жатпайтын электронды тұтыну жүйелерінің, ароматизаторлар мен сұйықтықтардың айналымына байланысты сотқа дейінгі тергеу амалдары басталды, – деді Екібастұз қалалық полиция басқармасы бастығының міндетін атқарушы Төлеген Құдайбергенов.
Рейдтік іс-шаралар барысында интернет-дүкен арқылы тапсырыстар бойынша жеткізуге арналған вейп өнімдері бар автокөлік тоқтатылып, тексеру нәтижесінде заңсыз тауар табылды.
Полиция 20 маусымда Қазақстанда вейп және оларға арналған сұйықтықтардың айналымына тыйым салу туралы заң күшіне енгенін еске салады.
Алматыда өзенге құлаған баланы жақын жерде өтіп бара жатқан ер адам құтқарып қалды. Оқиғаның бейнежазбасы әлеуметтік желіде тарады.
Желідегі мәліметке сәйкес, оқиға Алматыдағы Есентай өзенінде 27 қазан күні болған. Бейнежазбадан ер адамның киім-кешегін шешпестен баланы судан шығарып алғанын көруге болады. Сондай-ақ судан шошып қалған баланың «рахмет, аға» деп алғыс айтқаны да естіледі.
Посмотреть эту публикацию в Instagram
2025 жылғы 1 қаңтардан бастап микроқаржы ұйымдарынан онлайн несие алу кезінде азаматтар биометриялық сәйкестендіруден өтіп қана қоймай, электрондық цифрлық қолтаңбаны да қолданады.
Алаяқтыққа қарсы күрестің жаңа шаралары туралы Ұлттық банк төрағасы депутаттық сауалға берген жауабында айтты.
«Онлайн микроқарызды ресімдеу кезінде 2025 жылғы 1 қаңтардан бастап биометриялық сәйкестендіруді және электрондық цифрлық қолтаңбаны міндетті түрде қатар қолдану талабы енгізіледі. Сондай-ақ микроқаржы ұйымдары ақшаны аударғанға дейін банк шотының немесе төлем картасының клиентке тиесілі екенін тексеруге міндеттеледі», — делінген жауапта.
Бұған қоса Қаржы нарығын реттеу және дамыту агенттігі банктерге онлайн несие ресімдеген кезде өтінімді дәл сол мезетте емес, ертесіне мақұлдауға кеңес береді. Осылайша клиент алаяқтар рәсімдеген кредиттен бас тарта алады.
Сондай-ақ, Ұлттық банк алаяқтық белгілері бар төлем транзакциялары бойынша деректер алмасу орталығын құрған. Антифрод-орталық қатысушыларға алаяқтық операцияларды анықтауға және бұғаттауға, алаяқтық белгілері бар операцияларға жедел ден қоюға, нақты уақыт режимінде ақпарат алмасуға мүмкіндік береді.
Антифрод-орталыққа барлық банк, бірқатар ірі төлем және микроқаржы ұйымдары, сондай-ақ Ішкі істер министрлігінің 21 аумақтық бөлімшесі мен орталық аппаратының өкілдері қосылған. Қазір ұялы байланыс операторлары қосылу сатысында.
Ғылым және жоғары білім министрлігі «Жоғары оқу орнының үздік оқытушысы» атағын беру бойынша конкурс жариялайды,.
Бұл конкурс ең үздік педагогикалық тәжірибені анықтауға бағытталған және 2015 жылғы 16 наурыздағы №124 бұйрыққа сәйкес өткізіледі. Конкурсқа ҚР азаматтары, ЖОО-ның штаттық оқытушылары қатыса алады. Қатысушының кемінде бес жылдық үзіліссіз ғылыми-педагогикалық өтілі болуы қажет.
Құжаттарды тапсыру мерзімі: 2024 жылғы 1 қарашадан 11 қарашаға дейін жалғасады.
Алматы қаласының прокуратурасы есірткі құралдары мен психотроптық заттар жарнамалап, таратылатын 16 телеграм-арнаны бұғаттады.
Тексеру барысында қатысушыларға тыйым салынған заттарды сатып алу мүмкіндігімен қатар «закладчик» жұмысы ұсынылғаны анықталды. Нәтижесінде, сот Медеу ауданы прокурорының тыйым салынған ресурстарды бұғаттау туралы талабын қанағаттандырды, олардың қызметі тоқтатылды.
Кінәлі тұлғаларды белгіленген жауапкершілікке тарту мақсатында қадағалау органы Қылмыстық кодекстің 299-1-бабы 1-бөлігі (есірткі, психотроптық заттарды немесе сол тектестерді, прекурсорларды насихаттау немесе заңсыз жарнамалау) бойынша сотқа дейінгі тергеп-тексеруді бастап, одан әрі тергеу үшін полицияға жолдады.
Алматы қаласының прокуратурасы жедел бұғаттау үшін азаматтарды ұқсас интернет-ресурстар анықталған жағдайлар туралы хабарлауға шақырады.