Sona.kz

Рубрика: Саясат

  • Нартай Аралбайұлы: Орманшылардың жалақысы барлық өңірде өспеді

    Нартай Аралбайұлы: Орманшылардың жалақысы барлық өңірде өспеді

    ҚР Парламенті Мәжілісінің депутаты Нартай Аралбайұлы бірнеше өңірде  орманшылардың жалақысы өспегенін жеткізді. Осы мәселені шешу мақсатында ол депутаттық сауалын ҚР Премьер — Министрінің Бірінші орынбасары Роман Склярға жолдады.

    «Семей орманында өрт болып ондаған отандасымыз опат болған кезде Үкімет өкілдері «2023 жылдың 1 шілдесінен бастап орманшылардың жалақысы өседі» деп кесіп айтқан еді. Бірақ айтылған сөз айтылған жерде қалды. Жалақы орман шаруашылығындағы басшылық құрам мен санаулы мамандық иесіне қосылғаны болмаса орман үшін от кешкен мыңдаған маман түкке жетпейтін жалақымен сол күйі қала берді», — деді  Нартай Аралбайұлы.

    Депутат орманшылардың жалақысын өсіру бойынша қол қойылған құжаттың барлық өңірде жүзеге аспағанын сынады. 

    «2024 жылдың 1 шілдесінде  Премьер-Министр Олжас Бектенов еліміздегі орман шаруашылығы және табиғатты қорғау мекемелері қызметкерлерінің лауазымдық жалақыларына үстемақы қосу туралы  қаулыға қол қойды. Орман және табиғатты қорғау ұйымдары қызметкерлеріне еңбекақы төлеу жүйесін, шарттары мен мөлшерлерін жетілдіру мақсатында «Азаматтық қызметшілерге, мемлекеттік бюджет қаражаты есебінен қаржыландырылатын ұйымдардың қызметкерлеріне еңбекақы төлеу жүйесі туралы» Қазақстан Республикасы Үкіметінің қаулысына өзгерістер енгізілді. Бөркімізді аспанға атып, алақайладық.

    Құжатқа сәйкес, орман өртін сөндіру бекеттерінің, орман шаруашылығы мекемелерінің, қоршаған ортаны қорғау және орман орналастыру ұйымдарының қызметкерлері лауазымдық жалақыларына 100 пайызға дейін өсімақы алуы керек еді. Олардың қатарында орман өртін сөндірушілер, өрт сөндіру көлігінің жүргізушілері, тракторшылар, радио операторлар, өрт сөндіру машиналарын, жабдықтар мен аппараттарды жөндеу жөніндегі шеберлер, өрт бақылау мұнарасының бақылаушылары бар еді. Шіліңгір шілдеден бастап жалақымыз еселеп артады деп елдің еңсесі тіктеліп қалды. Бірақ, 2023 жылы үмітінің күлі көкке ұшқан орманшылар 2024 жылы да дәл сол жағдайды бастан кешуде», — деді халық қалаулысы.

    Себебі аталған қаулы Қызылорда облысында,  Арал ауданында, Павлодар облысында, Маңғыстау облысында, Қостанай облысында, Жетісу облысында орындалмады деген дерек келді. Депутат  орманшылардың жазған арызы қолында екенін жеткізді. 

    «Орманшылардың жалақысын көтерудің жүгі жергілікті бюджетке артылыпты, ол қамбада қаржы жоқ екен. Қаулысы бар да қаржысы жоқ. «AMANAT» партиясы бұл жағдайды бірнеше рет көтергенін қаперлеріңізге сала кетейін.Салдары ауыр, жалақының төмендігінен жастар орманшы болып қызметке барғысы келмейді. Орман бар, орын бос, жалақы жетпейді.Жоғарыда айтылған мәселелерді зерделеп, 2024 жылдың 1 шілдесінде қол қойылған  қаулының толыққанда орындалуын қадағалап, Қазақстандағы орман шаруашылығындағы мамандардың лауазымдық жалақыларына 100 пайыздық өсімақының қосылуын қамтамассыз етуіңізді сұраймын», -деп Нартай Аралбайұлы депутаттық сауалын қорытындылады.

     

     

  • Депутат Дайрабаев су шаруашылығындағы былықты жіпке тізіп берді

    Депутат Дайрабаев су шаруашылығындағы былықты жіпке тізіп берді

    ҚР Парламенті Мәжілісінің депутаты Жигули Дайрабаев  су шаруашылығындағы кемшіліктерді тізіп,  Премьер-Министрдің орынбасары Қанат Бозымбаевқа депутаттық сауал жолдады.

    «2017 жылы «Ақтөбе, Жамбыл және Түркістан облыстарының су шаруашылығы және гидромелиоративтік жүйелерін реконструкциялау» жобасын іске асыруға мемлекеттің кепілдігімен 173,8 млн АҚШ доллар немесе 53,9млрд. теңге Еуропалық Қайта Құру және Даму Банкі тарапынан алынған болатын.

    Қарыз қаражатының қолжетімділік мерзімінің аяқталуына, оның толық игерілмеуіне және құжаттарды рәсімдеу уақыты созылуына байланысты Еуропалық Қайта Құру және Даму Банкі 664,9 млн. теңге қосымша комиссия есептеген.

    Аталған жобалар бойынша жұмыстар 2021 жылы аяқталуы керек еді. Алайда, жобалау-сметалық құжаттаманың сапасыз әзірленуіне, мердігерлердің жауапсыз жұмысына байланысты Үйлестіру кеңесінің шешімімен 2023 жылға, одан кейін 2025 жылға ауыстырылды.

    Бүгінде осы жобалардың орындалу барысыда мәз емес. Бұған кім жауап береді? Артық кеткен шығындардың сұрауы барма?», — деді депутат, «Ауыл» партиясы Фракциясының мүшесі Жигули Дайрабаев.

    Халық қалаулысы  жаз айында өңірлерді аралау барысында Жамбыл облысының сайлаушылары осы мәселені көтергенін жеткізді.

    «Бүгінгі күнге жоспарланған 315 каналдың тек 137 каналы жөндеуден өткен.Жұмыстың баяу жүруі жыл сайынғы вегетациялық кезеңнің өткеру сапасын төмендетуге әкеледі, берілетін судың шығыны 20-30 пайыздан асады», — деді депутат. 

    Жигули Дайрабаевтың мәліметінше,  Ақтөбе  қаласы бойынша инфрақұрылымның жетіспеушілігі салдарынан бөлінген 5,6 млрд теңгенің 1,3 млрд теңгесі игерілмеген. Ал Түркістан облысы бойынша бөлінген 18,5 млрд. теңгенің тек 2,2 млрд. игерілген.

    «Бұдан басқа, «Ирригациялық және дренаждық жүйелерді жетілдіру» (ПУИД-2) жобасы бойыншада шешілмеген сұрақтар көп.Түркістан, Қызылорда, Жамбыл облыстарында бұл жоба аясында жыл басынан тек 3,35 млрд. теңге Үкімет Резервінен бөлінген.Сондай-ақ, өткен жылдан бері Дүниежүзілік Банк тарапынан төленетін 1,1 млрд. теңге қарыз әліде болса төленбеген, ал жобаны орындау мерзіміне аз уақыт қалды.Бюджетті нақтылау кезінде қаржы бөлінеді деген уәделестікте жоқ.Қажетті 28 млрд. теңгені сонда Үкімет қашан бөлмекші? Шешуге тиісті мәселені одан әрі ушықтырмай нақты жұмыс ұйымдастыру керек емес пе?»,— деп толықтырды Жигули Дайрабаев.

    Депутат, елімізде су тапшылығы жыл өткен сайын күрделі мәселеге айналып келе жатқанын жеткізді.

    «Ал бізде суды үнемді және тиімді пайдалану тетіктері әліде болса жоқ. Сондықтан жыл сайын миллиардтаған теңгенің шығыдарын көрудеміз.Тасқын суды жинау және қауіпсіз өткізуді қамтамасыз ету үшін салалық министрлік 2,6 млрд. текше метр су сақтай алатын 42 жаңа су қоймасын салуды, жалпы көлемі 3,7 млрд. текше метр болатын 37 су қоймасы мен 14,5 мың шақырым ирригациялық каналды реконструкциялауды жоспарлап отыр екен.Министрлік бұрынғы жоспарлаған міндеттерін орындамай жатып, құрылыстың басталуы 2012 жылдан бері созылып келе жатқан, жырға айналған Жамбыл облысындағы 3 су қоймаларының мәселесі әлі шешілмеуде, аталған Қалғұтты, Ырғайтты мен Ақмола су қоймаларының құрылысы 34,5 мың гектар суармалы жерді тиімді пайдалануға мүмкіндік берер еді»,- деді Ж. Дайрабаев.

    Ал, депутат су шаруашылығы бойынша жаңадан  құрылған министрліктің жұмысына көңілі толмайтынын жеткізді. 

    «Мемлекет басшысы былтырғы Жолдауында су ресурстарының маңыздылығын атап, оны тиімді пайдалануды тапсырып, жаңа ведомства құрып еді. Дегенмен, қазіргі жүргізіліп жатқан жұмыстар халықтың көңілінен шықпауда, су шаруашылығы саласындағы ұйымдастыру жұмыстары сылбыр жүруде. Министрлік құрылғанына бір жыл өтседе, бүкіл Республика бойынша ревизиялық жұмыстар әлі толық біткен жоқ.

    Мәселен, Шығыстағы судың 40%-на ие Семей өңірінде Облыстық деңгейде ҚазСуШар мекемесі әлі күнге дейін құрылмаған, Ұлытаудада осындай жағдай. Су шаруашылығы объектілерін ұстау, пайдалану мен құрылыстарының қауіпсіздігін қамтамасыз ететітін ұйымы болмаса, басқасы туралы не айтуға болады!

    Осыған орай, сауалда көтерілген 3 мәселе бойынша қандай шаралар қабылдануда? Құрылыстардың аяқталу және күрделі жөндеу жұмыстары қай уақытта бітеді?Осы сұрақтарға жауап  беруіңізді сұраймыз», -деді ҚР Парламенті Мәжілісінің депутаты Жигули Дайрабаев Премьер-Министрдің орынбасары Қанат Бозымбаевқа жолдаған депутаттық сауалында.

  • Қазақстан-Қытай шекарасы үш күнге жабылды

    Қазақстан-Қытай шекарасы үш күнге жабылды

    Қытай Халық Республикасының құрылған күнін мерекелеуге байланысты Қазақстан-Қытай шекарасындағы автомобильді өткізу пункті үш күнге жұмысын тоқтатты. Бұл туралы Мемлекеттік кірістер комитетінің баспасөз қызметі мәлім етті.

    «Мемлекеттік кірістер комитеті Қытай Халық Республикасының құрылған күнін мерекелеуіне байланысты 2024 жылғы 1 қазаннан бастап 3 қазанға дейін Қазақстан-Қытай шекарасындағы автомобильді өткізу пунктерінде тұлғалардың, көлік құралдары мен жүктердің өтуі жүзеге асырылмайтынын хабарлайды», — делінген ақпаратта.

    Қазақстан-Қытай шекарасындағы теміржол өткізу пункттері штатты режимде жұмысын жалғастырады.

  • Ұлттық олимпиада комитетіне жаңа бас хатшы тағайындалды

    Ұлттық олимпиада комитетіне жаңа бас хатшы тағайындалды

    Астанада Қазақстан Ұлттық олимпиадалық комитеті Бас Ассамблеясының кезектен тыс жиыны өтті.

    Бас ассамблеяның күн тәртібінде қаралған мәселенің бірі – жаңа бас хатшыны сайлау. Геннадий Головкин Әлімжан Ақаевтың кандидатурасын ұсынып, ұсынысты қатысушылар бірауыздан бекітті.

    Әлімжан Ақаев 2024 жылдың ақпанынан бастап Қазақстан ҰОК президентінің халықаралық мәселелер жөніндегі кеңесшісі қызметін атқарған.

  • Су шаруашылығы мамандарының жалақысы өседі

    Су шаруашылығы мамандарының жалақысы өседі

    Бұл туралы су ресурстары және ирригация министрі Нұржан Нұржігітов Қарағанды облысына ресми іс-сапары барысында айтты.

    «Биыл «Қазсушар» қызметкерлерінің еңбекақысы орта есеппен 25 пайызға өсті. Еңбекақысы тариф есебінен төленетіндердің де, республикалық бюджеттен алатындардың да айлығы көтерілді. Келесі жылы да біз су саласындағы мамандардың еңбекақысын көтеру бойынша жұмысты жалғастырамыз. Еліміздің су қауіпсіздігін қамтамасыз ететін мамандардың еңбегі лайықты түрде бағалануға тиіс», – деді министр.
  • Экс-министр Тұрғымбаев жазасын қалай өтеп жатыр?

    Экс-министр Тұрғымбаев жазасын қалай өтеп жатыр?

    ІІМ Қылмыстық-атқару жүйесі комитеті мен Астана сотында бұрынғы ішкі істер министрі Ерлан Тұрғымбаев жазасын қалай өтеп жатқаны айтылды, – деп хабарлайды Tengrinews.kz тілшісі.

    Тамызда сот Тұрғымбаевқа лауазымдық өкілетін асыра пайдаланғаны үшін шартты түрде 5 жылға үкім шығарды.

    Астана қаласының қылмыстық істер жөніндегі ауданаралық сотының үкімі 2024 жылғы 26 тамызда заңды күшіне енді, оған шағым түспеген.

    «Сот үкімімен пробациялық бақылау белгіленді, оны уәкілетті мемлекеттік орган тұрғылықты жері бойынша пробация қызметі арқылы жүзеге асырады», – деп жазылған сот мәліметінде.

    Пробациялық бақылау қағидалары бойынша Тұрғымбаевтың уәкілетті мемлекеттік органға хабарламай, тұрақты тұрғылықты жерін немесе жұмысын өзгертуге құқығы жоқ.

    Сотта «экс министр арнайы білезік таға ма» деген сұраққа да жауап берілді. Мәліметке сүйенсек, қылмыстық істі қарау кезінде сотталған адам білезік тақпаған, өйткені ол қамауда болған. Қазір жағдай қалай екені нақтыланбады.

    Еске салайық, бұған дейін сот билікті асыра пайдаланды деп айыпталған бұрынғы ішкі істер министрі Ерлан Тұрғымбаевтың ісіне қатысты үкім шығарғаны хабарланды.

    Сот үкімімен экс-шенеунік ҚР Қылмыстық кодексінің 362-бабының 4-бөлігінде көзделген қылмысты жасағаны үшін кінәлі деп танылып, 10 жылға белгілі бір лауазымдарды атқару құқығынан айырыла отырып, 5 жылға бас бостандығынан айырылды.

    Оған сыбайлас жемқорлыққа қатысты айып тағылмағандықтан, ҚР Қылмыстық кодексінің 63-бабы негізінде тағайындалған жазаны шартты деп санау ұйғарылды.

  • Ел президенттері тағы да Астанаға келді

    Ел президенттері тағы да Астанаға келді

    Германияның Федералдық канцлері Олаф Шольцтің қатысуымен өтетін саммитке қатысу үшін Орталық Азия елдерінің басшылары Астанаға келе бастады. 

    Орталық Азия мемлекеттері басшылары мен Германия Федералдық канцлерінің кездесуіне Қырғыз Республикасының Президенті Садыр Жапаров ұшып келді. Жапаровты премьер-министр орынбасары, үкімет аппаратының басшысы Ғалымжан Қойшыбаев қарсы алды.

    Сапар барысында Президент Садыр Жапаров Орталық Азия елдері президенттерінің неміс кәсіпкерлерімен кездесуіне қатысады. Сонымен қатар, Германия Федералдық канцлері Олаф Шольцпен екіжақты келіссөздер жүргізеді.

    Сондай-ақ бүгін Тәжікстан Республикасының президенті Эмомали Рахмон аталмыш кездесуге қатысуға ұшып келді. Эмомали Рахмонды премьер-министр Олжас Бектенов әуежайдан қарсы алды.

  • Подвалдан Паралимпиадаға:Еркін Ғаббасов қалай жаттыққанын айтты

    Подвалдан Паралимпиадаға:Еркін Ғаббасов қалай жаттыққанын айтты

    41 жастағы Еркін Ғаббасов Паралимпиадаға қалай жаттыққанын айтты.

    «Подвалдан Паралимпиадан бірақ шықтың деп жолдастарым қалжыңдайды. Бұл әрине қалжың, себебі үлкен жаттығудан өттік. 2021 жылдан дайындалдым»,- деді Паралимпиада ойындарының нысана атудан күміс жүлдегері Еркін Ғаббасов.

    Жеңімпаз, дайындықтың басым бөлігі мектептің жертөлесінде өткенін айтады. Ал, жеңімпаздың жанында жары Шынар әркез қолдау білдіріп жүреді.

    «Біздің үш баламыз бар. Үлкеніміз 21 жаста. Алдағы мақсатымыз Алтын медальға қол жеткізду»,- деді Еркін Ғаббасовтың жары Шынар.

    https://www.instagram.com/reel/C_-ExMyMa5n/?igsh=azBtNnFmZHc4NW0x

     

    Естеріңізге сала кетейік, бүгін Қазақстан Республикасы Президентінің Жарлығымен Париж қаласында өткен XVII жазғы Паралимпиада ойындарында жоғары жетістіктерге жеткен спортшылар мен атлеттердің жаттықтырушылары мемлекеттік наградалармен марапатталды.

     

     

  • Паралимпиада жеңімпаздарына мемлекеттік наградалар табысталды

    Паралимпиада жеңімпаздарына мемлекеттік наградалар табысталды

    Мемлекеттік наградаларды Премьер-Министр Олжас Бектенов табыстады. Қазір шара Үкімет үйінде өтіп жатыр.

    Қазақстан Республикасы Президентінің Жарлығымен Париж қаласында өткен XVII жазғы Паралимпиада ойындарында жоғары жетістіктерге жеткен спортшылар мен атлеттердің жаттықтырушылары мемлекеттік наградалармен марапатталды.

    Атап айтқанда:

    Алтын медаль иегерлері Дегтярев Давид Мамиевич
    І дәрежелі «Барыс» орденімен, Науатбек Ақмарал Маратқызы ІІІ дәрежелі «Барыс» орденімен наградталды.

    Күміс медальға қол жеткізген Ғаббасов Еркін Тілеуғабылұлы, Жұмағали Нұрдәулет Мақсұтұлы және Шәмей Ерғали «Парасат» орденінің кавалерлері атанды.

    «Құрмет» орденімен Паралимпиада ойындарының қола жүлдегерлері Мұқашбеков Дастан Мұратұлы, Райфова Зарина Райфқызы, Федосова Даяна Владимировна және Шүкірбеков Жұрқамырза Бақытұлы марапатталды.

    Ұлттық құрама бас бапкерлері мен спортшылардың жеке жаттықтырушыларының арасынан 5 азаматқа «Парасат» ордені, 7 адамға «Құрмет» ордені берілді. Сонымен қатар екі жаттықтырушы Қазақстан Республикасы Президентінің Құрмет грамотасымен наградталды.

     

  • Қытайлық 100 аса кәсіпорын өз өнімдерін ұсынды

    Қытайлық 100 аса кәсіпорын өз өнімдерін ұсынды

    Қорғас халықаралық ынтымақ орталығында Шаньдунь провинциясы тауарөндірушілерінің экспортқа бағытталған алғашқы көрмесі өтті. Қытай елінің 100-ден аса кәсіпорны өз өнімдерін жұрт назарына ұсынып, сауда-саттық жасады. Ауыл шаруашылығы техникалары, құрылыс материалдары мен құрал-саймандар, басқа да тұрмыстық заттарды саудалауға  делдалсыз, тікелей келісімшарт жасауға мүмкіндік туды. Тауар өндірушілер Қазақстан нарығына сапалы өнімдерін ұсынып, тіпті инвестиция тартуға да ниет білдіріп отыр.

     «Біздің Шыңжаңда және Шандуньде екі зауытымыз бар. Жылына 200 тоннадан астам есік және терезеге қажет металл жабдықтарын шығарамыз. Алматы және Жетісу облысына экспорттауға және сол өңірлерге шағын зауыт салып беруге мүмкіндігіміз бар», — деді  аллюминий зауытының өкілі

    Жанг Жи Юн.

    Қазақстан тарапынан сауда жасауға бұл жолы 200-ге жуық кәсіпкер барып, қызығушылық танытты. Сондықтан мұндай экспортқа бағытталған көрме-жәрмеңкелерді алдағы уақытта Қазақстанда да өтпек. Жалпы Қорғас ынтымақ орталығының әлеуеті жылдан-жылға еселеніп, тәулігіне екі тараптан мыңдаған турист кіріп, арзан бағада сауда жасап қайтып жүр. Ал Қазақстан және Орталық Азия сауда саттық қауымдастығы ұйытқы болған шара екі ел арасындағы экономикалық қарым-қатынасты арттырары сөзсіз.

    «Өте үлкен мүмкіндік. Біз жаңа ғана шыны жүн шығаратын завод өкілдерімен сөйлестік. Олар бізге  келіп, Қазақстанға өзіміздің зауыттарды қойып,  қалай жұмыс істеу керек,  шикізатты қалай аламыз, барлығын үйретіп, көрсетеміз дейді. Бұл керемет.  Ондай ақпаратты  біз үй жақтан таба алмаймыз», — деді жеке кәсіпкер Айрат Талғатұлы.