блда 34 танымал блогер заңсыз онлайн-казино жарнамалағаны үшін әкімшілік жауапкершілікке тартылды. Бір бөлігіне айыппұл салынса, қалған істер Мәдениет министрлігіне жолданған, деп хабарлайды Sona.kz. АФМ-ге сілтеме жасап.
Анықталған мәліметке сәйкес, бірнеше танымал есім аталды. Рэпер Baller (Шыңғысхан Қопбаев) биылдың өзінде бес рет құмар ойындарды насихаттағаны үшін жазаланған. 600 мыңнан астам оқырманы бар блогер әрі музыкант Ринат Шамшыраққа да әкімшілік іс қозғалды. Сондай-ақ Қайсар Камза мен Наиль Турғанов (Niko Net) тәртіп бұзушылардың қатарынан табылды. Соңғысы жарнама арқылы 8 млн теңгеден астам пайда тапқан.
Нұрғазы Тоқтаров та назарға ілікті. Ол жазылушыларын белсенді түрде онлайн-казиноға тартқан. Жарнамадан тапқан 16 млн теңгенің жартысын өзі сол платформаларда ұтылып қалған. Ал Қайсар Камза Telegram-арнасын құмар ойындарды насихаттау алаңына айналдырып, нұсқаулықтар мен жалған «жеңіс» роликтерін жариялаған.
Аталған іске бірқатар инфлюенсер қыздар да қатысты: Зухра Хакиева, Мариям Құлжабаева, Диана Халметова, Әсем Аубакирова, Арина Байкова және Кумисай Айымбетова.
АФМ мәліметінше, кей блогерлер айыппұл төлегеннен кейін де заңсыз жарнаманы жалғастырған. Енді олардың ісі қылмыстық деңгейде қаралуы мүмкін – бұл әрекет заңсыз ойын бизнесіне көмектесу ретінде бағаланбақ.
