Апелляциялық сот заңгер әрі блогер Әділетхан Молдаханға қатысты бірінші сатыдағы сот үкімін өзгеріссіз қалдырды. Ол екі жыл алты айға бас бостандығынан айыру жазасын өтейді.
Апелляциялық сот отырысы 22 қыркүйекте Алматыда өтті.
Сот қорғау тарапының уәждерін қанағаттандырмай, бұған дейін шығарылған үкімді күшінде қалдырды.
Шешім жарияланғаннан кейін Әділетхан Молдаханның жұбайы жылап жіберді. Оның айтуынша, отбасы жәбірленушілерге моральдық зиян үшін тағайындалған өтемақыны төлеген және бұл жағдай апелляциялық сотта ескеріледі деп үміттенген.
Бұған дейін Алмалы аудандық соты Әділетхан Молдаханды Әл-Фараби даңғылында адам өліміне әкелген жол-көлік оқиғасына байланысты көрінеу жалған ақпарат таратқаны үшін кінәлі деп таныған.
Сот оған екі жыл алты айға бас бостандығынан айыру жазасын тағайындады.
Сонымен қатар Молдаханға бес жыл бойы қоғамдық-саяси, публицистикалық және блогерлік қызметпен айналысуға тыйым салынды.
Осылайша, апелляциялық соттан кейін бірінші сатыдағы сот тағайындаған жаза өзгеріссіз қалды.
