Қазақстанда екінші сыныптың әдебиеттік оқу пәніндегі «Әкеммен ұрыс» әңгімесі жаңартылған оқу бағдарламасына енгізілмеді. Шығармадағы кейбір көріністер мен тапсырмалар ата-аналардың наразылығын тудырған.
Бұл туралы Syrmedia.kz Оқу-ағарту министрлігінің түсіндірмесіне сүйеніп хабарлады.
Дәрия Жұмагелдинованың «Ссора с отцом» атты әңгімесі әдебиеттік оқу оқулығына 2017 жылы енгізілген.
Шығармада сіріңкемен ойнаған баланы әкесі қатты ұрысып, жоғалуын талап етеді.
Бұған ренжіген бала бөлмесіне барып, жылап, еденде ұйықтап қалады.
Ата-аналардың ерекше назарын аударған тұс баланың ұйқыдан оянған сәтіне қатысты.
Әңгімеде әпкесінің баланы шешіндіріп, сүйіп, жылы сөздер айтқаны баяндалады.
Әлеуметтік желілерде ата-аналар осы көріністі ғана емес, әкесінің балаға қарым-қатынасын да сынға алды.
Сондай-ақ мәтіннен кейін оқушыларға қойылатын сұрақтар талқыланды.
Соның бірі баланың қандай отбасылық дәстүрді бұзғанын анықтауға арналған.
Оқу-ағарту министрлігі бұл шығармада әпкесінің әрекеті жақын адамына қамқорлық көрсету ретінде берілгенін түсіндірді.
Ведомствоның мәліметінше, әңгіме балаларды жанашырлыққа, түсіністікке және отбасы мүшелерін қолдауға тәрбиелеуді көздейді.
Шығарма «Отбасылық дәстүрлер» тақырыбын оқыту үшін енгізілген.
Алайда оның мазмұнына қатысты сын 2023 жылы да айтылған. Сол кезде қосымша сараптама жүргізілмеген.
Енді министрлік әңгіме жаңартылған міндетті шығармалар тізіміне енбегенін хабарлады.
Жаңа оқу бағдарламасы әзірге бекіту кезеңінде. Оқулықтарды әзірлеу бағдарламаны қабылдағаннан кейін басталады.
Демек, қазіргі шешім қолданыстағы оқулықтарды дереу алып тастауды емес, шығарманы болашақ оқу бағдарламасына енгізбеуді көздейді.
