Премьер-министр Олжас Бектенов Премьер-министрдің орынбасары Қанат Бозымбаевқа Маңғыстау облысындағы төтенше жағдай орнына дереу баруды тапсырды.
Бозымбаев Каспий теңізіндегі оқу-жаттығу кезінде әскери қызметшілердің қаза болу себептерін тергейтін Үкімет комиссиясын басқарады.
Комиссия Премьер-министрдің өкімімен құрылды.
Олжас Бектенов қайғылы оқиғаның себептерін жан-жақты тергеуді және қаза тапқан әскери қызметшілердің отбасыларына қажетті көмек көрсетуді тапсырды.
Комиссия құрамына Қорғаныс министрі, Маңғыстау облысының әкімі, Еңбек және халықты әлеуметтік қорғау, Төтенше жағдайлар, Денсаулық сақтау және Көлік министрліктерінің басшылығы кірді.
Сондай-ақ оның жұмысына Бас әскери прокурор мен Шекара қызметінің өкілдері қатысады.
Қайғылы оқиға 24 қыркүйекте Маңғыстау облысында Әскери-теңіз күштерінің оқу-жаттығуы кезінде болды.
Ауа райының күрт нашарлап, желдің күшеюінен 19 әскери қызметшіні теңізге алып кеткен.
Соңғы ресми мәлімет бойынша тоғыз адам қаза тапты, үшеуі құтқарылды. Қалғандарын іздеу жалғасып жатыр.
Әскери қызметшілердің қазасына байланысты қылмыстық іс қозғалды. Жедел-тергеу тобы құрылып, қажетті сот сараптамалары тағайындалды.
