Еңбек және халықты әлеуметтік қорғау министрлігі демалыс және мерекелік күндерді ауыстыру мәселесі бойынша не дейді?
Елімізде атап өтілетін мерекелердің құқықтық негіздері «Қазақстан Республикасындағы мерекелер туралы» заңмен реттеледі.
Бұрын келесі жылдың күнтізбесін Үкімет қаулысымен бекітетін. Кейін бұл функциялар Еңбек министрлігіне берілді, алайда ведомство кейбір мерекелік күндердің ауыстырылуы туралы алдын ала емес, мереке жақындаған кезде хабарлай бастады.
Еңбек кодексіне сәйкес, мереке және демалыс күндері жұмыс уақытын ұтымды пайдалану мақсатында уәкілетті орган демалысты жұмыс күніне ауыстыруға құқылы.
«Демалыс күндерін басқа жұмыс күндеріне ауыстыру әр жолы жеке тәртіпте қарастырылатынын атап өткен жөн», – делінген министрліктің жауабында.
Былтыр қарашада Еңбек және халықты әлеуметтік қорғау министрі Светлана Жақыпова 2025 жылы демалыс күнін ауыстыру туралы бұйрыққа қол қойды. Құжатқа сәйкес, 2025 жылы жексенбі, 5 қаңтардағы демалыс күні жұма, 3 қаңтарға ауыстырылды. Алайда 2025 жылға басқа ауыстырулар жоспарланбаған.
Биыл күнтізбе бойынша 121 демалыс және 244 жұмыс күні.
