Маңғыстау облысындағы әскери оқу-жаттығу кезінде қаза тапқан әскери қызметшілер саны 12 адамға жетті.
Нақтыланған мәлімет бойынша оқу-жауынгерлік тапсырманы орындау кезінде ауа райы күрт нашарлап, жел күшейген. Соның салдарынан 17 әскери қызметшіні теңізге алып кеткен.
Олардың 12-сі қаза тапты.
Үш әскери қызметші құтқарылды. Тағы екі адамды іздеу жалғасып жатыр.
Оқиға орнында барлық мемлекеттік органның жұмысы үйлестіріліп, іздестіру-құтқару шаралары жүргізілуде.
Бұған дейін теңізге 19 әскери қызметші кеткені және тоғыз адамның қаза тапқаны хабарланған еді. Кейін бұл деректер нақтыланды.
Премьер-министрдің орынбасары Қанат Бозымбаев басқаратын Үкімет комиссиясы оқиға орнында жұмыс істеп жатыр.
Әскери қызметшілердің қазасына байланысты қылмыстық іс қозғалды. Оқиғаның барлық мән-жайы мен себептерін тергеу анықтайды.
Президент Қасым-Жомарт Тоқаев қаза тапқан әскери қызметшілердің туған-туыстары мен жақындарына көңіл айтты.
25 қыркүйек Қазақстанда Жалпыұлттық аза тұту күні болып жарияланды.
Қорғаныс министрлігі де қаза тапқан әскери қызметшілердің отбасыларына көңіл айтты.
Іздестіру-құтқару жұмыстары жалғасып жатыр.
