Көкшетауда төрт жасар бала ашық құдыққа құлап, қаза тапты
Көкшетауда ауладан жоғалып кеткен төрт жасар баланың денесі ашық құдықтан табылды. Қайғылы оқиғаға байланысты қылмыстық іс қозғалды.
9 қазан күні түстен кейін баланың анасы полицияға ұлының жоғалғаны туралы арыз берген. Оның айтуынша, бала үйдің ауласында жүрген жерінен із-түзсіз кеткен.
Осыдан кейін баланы іздестіру жұмыстары ұйымдастырылды.
Кешкі сағат 20:00 шамасында іздеу аяқталып, төрт жасар баланың денесі құдықтан табылды.
Алдын ала мәлімет бойынша, бала ашық құдыққа құлап, суға батып кеткен.
Кәмелетке толмаған баланың өліміне байланысты қылмыстық іс қозғалып, тергеу басталды.
Қазір оқиғаның барлық мән-жайын анықтау қажет. Атап айтқанда, құдықтың кімге тиесілі екені, оның не себепті ашық қалғаны және қауіпсіздігіне кім жауапты болғаны әзірге белгісіз.
