30 желтоқсанда өңір басшысы Нұрдәулет Қилыбай Түпқараған ауданы мәслихатының депутаттарына Қазақстан Республикасы президенті әкімшілігімен келісілген Ержан Күмісқалидің кандидатурасын аудан әкімі қызметіне ұсынды. Бұған дейін бұл қызметті Рахат Елтізаров атқарған. Ал Ержан Күмісқали Мұнайлы ауданының әкімі болған еді.
Ержан Қүмісқали 1983 жылы туған. Оңтүстік Қазақстан мемлекеттік университетін «құқықтану» мамандығы бойынша тәмамдаған. Еңбек жолын 2007 жылы Жаңаөзенде мұғалім болып бастаған.
«Депутаттар кандидатураны қолдады. Олар Ержан Күмісқалидің тәжірибелі басшы ретінде өзін жақсы жағынан көрсеткенін атап өтіп, оған сенім білдірді. Өңір басшысы бұған дейін Түпқараған ауданының әкімі болған Рахат Елтізаровқа атқарған жұмысы үшін алғыс айтып, жаңа әкімге сәттілік тіледі», деп хабарлады Маңғыстау облысы әкімдігінің баспасөз қызметі.
