Каспий теңізіндегі оқу-жаттығу кезінде Ақтау гарнизоны әскери қызметшілерінің қаза болуына байланысты қылмыстық іс қозғалды.
Бұл туралы прокуратура органдары хабарлады.
Тергеу үшін жедел-тергеу тобы құрылды. Оқиға орнында Ішкі істер министрлігінің, Төтенше жағдайлар министрлігінің және прокуратура органдарының қызметкерлері жұмыс істеп жатыр.
Қазір оқиғаның барлық мән-жайын жан-жақты анықтауға бағытталған тергеу әрекеттері жүргізілуде. Қажетті сот сараптамалары тағайындалды.
Қайғылы оқиға 24 қыркүйекте Маңғыстау облысында Әскери-теңіз күштерінің оқу-жаттығуы кезінде болды.
Қорғаныс министрлігінің алдын ала мәліметінше, Каспий жағалауында оқу-жауынгерлік тапсырманы орындау барысында ауа райы күрт нашарлап, жел күшейген. Соның салдарынан 19 әскери қызметшіні теңізге алып кеткен.
Қазіргі уақытта тоғыз әскери қызметшінің қаза тапқаны расталды. Үш адам құтқарылды, олардың бірі ауруханаға жеткізілді. Қалған әскери қызметшілерді іздеу жалғасып жатыр.
Прокуратура қылмыстық істің әскери қызметшілердің қаза болу фактісі бойынша қозғалғанын хабарлады. Қылмыстық кодекстің қай бабы бойынша тергеу жүріп жатқаны әзірге нақтыланбады.
Оқиға орнына Қорғаныс министрі Дәурен Қосанов бастаған комиссия да жіберілді.
