Маңғыстау облысында Қазақстан Әскери-теңіз күштерінің жаттығуы кезінде тоғыз әскери қызметші қаза тапты. Тағы жетеуін іздеу жалғасып жатыр.
Қайғылы оқиға 24 қыркүйекте Каспий теңізінің жағалауында оқу-жауынгерлік тапсырманы орындау кезінде болған.
Қорғаныс министрлігінің алдын ала мәліметінше, 19 әскери қызметшіні теңізге ағызып әкеткен.
«Қазіргі уақытта тоғыз әскери қызметшінің қаза тапқаны тіркелді. Үшеуі құтқарылды, олардың біреуі ауруханаға жатқызылды. Қалғандарын іздеу жұмыстары жүргізіліп жатыр», — деп хабарлады Қорғаныс министрлігі.
Осылайша, соңғы ресми мәлімет бойынша, тағы жеті әскери қызметшінің қайда екені әзірге белгісіз.
Қорғаныс министрлігі оқиғаны алдын ала ауа райының күрт нашарлап, желдің күшеюімен байланыстырып отыр.
Оқиға орнына Қорғаныс министрі Дәурен Қосанов бастаған комиссия шұғыл аттанды.
Қайғылы оқиға болған күні Маңғыстау облысында дауылды ескерту жарияланған. Қазгидромет өңірдің батысында, солтүстігінде және орталығында оңтүстік-шығыстан соғатын желдің екпіні секундына 15–20 метрге дейін жетіп, шаңды дауыл болатынын болжаған. Ақтауда желдің жылдамдығы секундына 9–14 метр болады деп күтілген.
Осы күні таңертең Қорғаныс министрлігі Каспий теңізінің қазақстандық секторында «Хазар Қорғаны – 2026» оқу-жаттығуы өтіп жатқанын хабарлаған еді.
Оқу-жаттығуға Әскери-теңіз күштерінің корабльдері мен катерлері, гидрографиялық кемелер, ҰҚК Шекара қызметінің Маңғыстау облысы бойынша бөлімшесінің корабльдері және Әуе қорғанысы күштерінің авиациясы жұмылдырылған.
Әскери қызметшілер бірлескен маневр жасау, әуе және суасты қауіптеріне қарсы әрекет ету тапсырмаларын орындаған. Оқу-жаттығудың жеке бір бөлігі іздестіру-құтқару жұмыстарын ұйымдастыруға арналған.
Қорғаныс министрлігі «Хазар Қорғаны – 2026» оқу-жаттығуын Әскери-теңіз күштерінің жауынгерлік даярлығын жетілдіру және жеке құрамның елдің теңіз шекарасын қорғау міндеттерін орындауға дайындығын арттыру кезеңі деп сипаттаған.
Әзірге қайғылы оқиғаның тікелей «Хазар Қорғаны – 2026» оқу-жаттығуы аясында болғаны немесе Әскери-теңіз күштерінің басқа жауынгерлік даярлық шарасына қатысты екені ресми түрде нақтыланған жоқ.
Сондай-ақ әскери қызметшілерді нақты қай сәтте теңізге ағызып әкеткені және тапсырманы қай бөлімше орындағаны белгісіз.
БАҚ мәліметінше, оқиға Ақтаудан шамамен 43 шақырым жердегі Omir Glamping демалыс базасының маңында болған. Материал жарияланған сәтте оқиғаның нақты орны ресми түрде нақтыланбаған.
Іздестіру-құтқару жұмыстары жалғасып жатыр.
