Мемлекеттік кірістер комитеті қытайлық Pinduoduo маркетплейсімен қазақстандықтар сатып алатын тауарлар туралы ақпарат алмасу тетігін талқылап жатыр. Бірақ әзірге деректер беріліп жатқан жоқ: тараптар техникалық интеграция мен ақпарат беру тәртібін ғана қарастыруда.
Бұл туралы МКК 15 қыркүйекте Pinduoduo өкілдерімен өткен кездесуден кейін хабарлады. Кездесуде шетелдік маркетплейстердің Қазақстандағы электрондық саудасына салық салу, трансшекаралық сауданың ашықтығын арттыру және операциялар туралы ақпараттың дұрыстығы талқыланған.
Тараптар консультацияны жалғастыруға келісті. Алайда комитет Pinduoduo-дан нақты қандай мәліметтер алғысы келетінін әзірге жариялаған жоқ.
Салық органдары нақты нені көре алады?
Қазір бұл сұрақтың нақты жауабы жоқ.
МКК-нің ресми хабарламасында тек «Қазақстан азаматтарына сатылатын тауарлар туралы деректермен алмасу» жөнінде айтылған. Сатып алушының аты-жөні, нақты тапсырыс сомасы, сатып алу саны, жеткізу мекенжайы, төлем тәсілі немесе басқа да жеке ақпарат беріле ме, белгісіз. азірдің өзінде салық органдары Pinduoduo-дан кімнің не сатып алғанын көре алады деуге негіз жоқ.
17 қыркүйекте ықтимал өзгерістерді Informburo.kz те талдады. Басылымның мәліметінше, тараптар әзірге келіссөз жүргізіп жатыр, ал берілетін ақпараттың нақты құрамы анықталмаған.
МКК-ге мұндай ақпарат не үшін қажет?
Комитет бұл бастаманы трансшекаралық электрондық сауданың ашықтығын арттыру және шетелдік маркетплейстерге салықтық әкімшілендіруді жетілдіру қажеттілігімен түсіндіреді.
Мұндай ақпарат мемлекетке шетелдік платформалардың Қазақстандағы нақты сауда айналымын дәлірек анықтауға және оны салықтық есептілікпен салыстыруға мүмкіндік береді.
Ал азаматтың жеке қажеттілігі үшін бір тауар сатып алуының өзі автоматты түрде оған қосымша салық міндеттемесі пайда болады деген сөз емес.
Мемлекеттің негізгі назары шетелдік платформалардың айналымына, олардың салық міндеттемелеріне және жеке пайдалануға арналған сатып алулар мен коммерциялық мақсаттағы жүйелі тауар тасымалын ажыратуға бағытталуы мүмкін.
Pinduoduo-дағы тауарлар қымбаттай ма?
Сарапшылар мұндай тәуекел болуы мүмкін екенін айтады, бірақ әзірге бұл тек болжам.
Informburo.kz-ке пікір білдірген қаржы кеңесшісі Арман Байганов маркетплейстердің айналымына салықтық бақылау күшейсе, кейбір тауарлардың бағасына әсер етуі мүмкін екенін айтқан. Алайда сатып алушыларға жаңа төлем енгізу немесе бағаны көтеру туралы қандай да бір шешім қабылданған жоқ.
Сондықтан қазіргі кезеңде қазақстандық сатып алушылар үшін іс жүзінде ештеңе өзгерген жоқ.
Pinduoduo МКК-ге сатып алулар туралы жаңа деректерді әлі бере бастаған жоқ. Тараптар мұндай жүйенің қалай жұмыс істейтінін және қандай мәліметтер қамтылатынын ғана талқылап жатыр.
Ең маңызды мәселе де осы болады: мемлекет тек маркетплейстің жалпы сауда статистикасын ала ма, әлде жекелеген азаматтардың нақты сатып алулары туралы ақпаратқа да қол жеткізе ме?
