Қазақстанға Ресейден мефедрон өндіріп, таратумен айналысқан қылмыстық топты ұйымдастырды деген күдікті экстрадицияланды. Алматыдағы жасырын зертханалардың бірінде екі адам химиялық заттан уланып, қаза тапқан.
Бұл туралы Қазақстанның Бас прокуратурасы хабарлады.
Тергеу мәліметінше, күдікті Алматы мен еліміздің басқа өңірлерінде психотроптық заттарды өндіру және сатумен айналысқан ұйымдасқан қылмыстық топ құрған.
Ол 2021 жылдан бастап қаржылық қиындыққа тап болған адамдарды заңсыз жұмысқа тартып отырған.
Топ мүшелері психотроптық заттарды дайындау, тасымалдау, қаптау және тарату жұмыстарын атқарған.
Ал олардың әрекетін ұйымдастырушы Telegram мессенджері арқылы қашықтан үйлестірген.
2024 жылы оның нұсқауымен Алматыда бірнеше жасырын есірткі зертханасы жабдықталған.
Солардың бірінде психотроптық заттарды өндіру кезінде екі адам ауыр химиялық уланудан көз жұмған.
Бас прокуратураның мәліметінше, бұл жағдайдан кейін де заңсыз өндіріс тоқтамаған. Қылмыстық әрекетке жаңа адамдар тартылған.
2024 жылғы 19 қыркүйекте полиция қызметкерлері зертханалардың бірінің жұмысын тоқтатты.
Тінту барысында 24 келіден астам химиялық зат, арнайы жабдықтар, қорғаныс құралдары және дайын өнім табылған.
Ал қылмыстық топты ұйымдастырды деген күдікті 2025 жылғы шілдеде Ресей аумағында ұсталған.
Қазақстан Бас прокуратурасының сұрауы бойынша ол елге экстрадицияланып, тергеу изоляторына қамалды.
Күдіктіге тағылған айыптар бойынша мүлкін тәркілей отырып, 20 жылға дейін бас бостандығынан айыру жазасы қарастырылған.
Оның кінәсі сотта анықталуы тиіс.
