Қонаевта коммуналдық және жедел қызметтер қатты соққан желдің салдарын жоюды күшейтілген режимде жүргізуде. Қалпына келтіру шаралары толықтай қала әкімдігі есебінен жүріп жатыр.
Қолайсыз ауа райы кезінде желдің жылдамдығы секундына 27 метрге дейін жетті. Тұрғын үйлердің шатырлары, электр желілері және қалалық инфрақұрылымның жекелеген нысандары зақымданды. Апат салдарын жоюға 300-ден астам адам мен 60-тан аса арнайы техника жұмылдырылды.
Жедел штаб құрылды. Алдын ала мәліметтерге сәйкес, шамамен 30 тұрғын үйдің шатырына зақым келген. Аумақтарды тазалау жұмыстары аяқталып, қалпына келтіру шаралары жоспарлы түрде жүріп жатыр.
Сондай-ақ қатты жел салдарынан 40 шақырымқа жуық электр желісі зақымданды. Қазіргі таңда ақаулар толықтай қалпына келтірілді.
Пәтер иелері кооперативтері қала әкімдігінің тұрғын үй-коммуналдық шаруашылық бөлімімен бірлесіп, шатырларды және инфрақұрылым нысандарын жөндеуде.
«Қала аумағында қатты жел түн бойы соғып, түске дейін сақталды. Табиғи құбылыстың салдарынан зардап шеккендер жоқ, азаматтардың өмірі мен денсаулығына қауіп тіркелмеді. Жедел штаб құрылып, барлық қызметтер жұмыс істеуде. Тұрғындардан түскен барлық өтінімдер бақылауда, бірде-бір мекенжай назардан тыс қалмайды. Қала тұрғындарын ауа райы болжамдары мен Құтқару қызметінің ескертулерін қадағалауға шақырамыз», – деді Қонаев қаласының әкімі Асхат Бердіханов.
Сонымен қатар Құтқару қызметі алдағы күндері желдің екпіні секундына 17–22 метрге дейін күшеюі мүмкін екенін ескертіп, тұрғындарды қауіпсіздік шараларын қатаң сақтауға шақырады.
