Семейде жергілікті университеттің алты студенті банк шоттарын ақша аудару және қолма-қол ақшаға айналдыру үшін пайдалану дерегі бойынша тергеуге іліккен.
Бұл туралы Қаржылық мониторинг агенттігі хабарлады. Тергеуді ҚМА-ның Абай облысы бойынша департаменті жүргізіп жатыр.
Тергеу нұсқасы бойынша, бір топ адам дропперлерді іздеп, олардың банк шоттарын пайдаланған. Семейде жергілікті университеттің алты студенті анықталып, жауап алынды.
ҚМА мәліметінше, студенттерге тиесілі банк карталары ақша қабылдау үшін пайдаланылған. Кейін түскен қаражат бірнеше бөлікке бөлініп, басқа шоттарға аударылған. Бұл ақшаның шығу тегін жасырып, қаржы қозғалысын бақылауды қиындатуға және кейін қаражатты қолма-қол ақшаға айналдыруға мүмкіндік берген.
Бір студенттің шотына ғана 25 азаматтан 16 миллион теңгеден астам қаражат түскен.
Тергеу барысында ақша жіберген азаматтардың интернет-алаяқтыққа байланысты істер бойынша жәбірленушілер екені анықталған.
Жәбірленушілер Абай, Қарағанды, Ақтөбе, Түркістан, Атырау, Батыс Қазақстан, Павлодар, Ақмола, Жамбыл және Алматы облыстарында, сондай-ақ Алматы мен Шымкент қалаларында тұрады.
Тергеу жалғасып жатыр. ҚПК-нің 201-бабына сәйкес өзге ақпарат жарияланбайды.
