Шымкент қаласы бойынша Қаржылық мониторинг агенттігінің департаменті М.Әуезов атындағы Оңтүстік Қазақстан университетінде бюджет қаражатын жымқыру дерегі бойынша сотқа дейінгі тергеп-тексеруді аяқтады, деп хабарлайды Sona.kz.
Агенттік мәліметінше, күдіктілер қатарында университеттің бұрынғы бірінші проректоры, қаржы және әкімшілік департаменттерінің директорлары, өндірістік-техникалық бөлім қоймасының меңгерушісі, сондай-ақ мердігер ұйымдардың басшылары бар.
Тергеу барысында күдіктілер мемлекеттік сатып алу бойынша жалған келісімшарттар жасағаны анықталған. Бұл келісімдер аясында тауарлар іс жүзінде жеткізілмеген немесе нарықтық бағадан бірнеше есе қымбат бағада сатып алынған. Аударылған қаражат аффилирленген жеке кәсіпкерлер мен коммерциялық ұйымдардың шоттарына түсіп, кейін қолма-қол ақшаға айналдырылып, қатысушылар арасында бөлінген.
АФМ келтірген дерекке сәйкес, осы схема арқылы университет басшылығы құны 20 млн теңге болатын бір кресло сатып алған, ал оның нарықтағы бағасы 200 мың теңгеден аспайды.
Нақты жеткізілімдердің болмағанын жасыру мақсатында күдіктілер тозған тауарлы-материалдық құндылықтарды балансынан формалды түрде есептен шығарып, оларды ары қарай пайдалана берген. Ал олардың орнына келуі тиіс жаңа тауарлар іс жүзінде жеткізілмеген.
Аталған заңсыз әрекеттер салдарынан мемлекетке 321 млн теңге көлемінде залал келтірілген. Тергеу барысында күдіктілер 264 млн теңгені ерікті түрде өтеген.
Сот санкциясымен күдіктілердің мүлкіне төрт тұрғын үйге, бір автокөлікке және банктік шоттардағы 40 млн теңге көлеміндегі қаражатқа тыйым салынды.
Қылмыстық іс сотқа жолданды. ҚР ҚПК-нің 201-бабына сәйкес өзге ақпарат жария етуге жатпайды.
