Қазақстанда «Яндекс» сервистерінің жұмысы алдағы екі-үш күнде толық қалпына келуі мүмкін. Бұл туралы жасанды интеллект және цифрлық даму министрі Жаслан Мәдиев мәлімдеді.
Zakon.kz хабарлауынша, министр Ақорда кулуарында компания сервистеріндегі ақауларға қатысты сұраққа жауап берген.
Мәдиевтің айтуынша, «Яндекс» платформасының жұмысын тұрақтандыру шараларын бастап кеткен.
Ол барлық қызметтің екі-үш күн ішінде толық іске қосылатынына үміт білдірді.
Алайда компанияның өзі ақаудың нақты қашан жойылатынын әзірге айта алмай отыр.
Яндекс Go өкілдері пайдаланушылардан, жүргізушілер мен курьерлерден қолайсыздықтар үшін кешірім сұрады.
Компанияның мәліметінше, техникалық мамандар сервистердің жұмысын қалпына келтірумен айналысып жатыр.
Бұған дейін Яндекс Go баспасөз қызметі ақаулар деректер орталықтарының зақымдануына байланысты туындағанын хабарлаған.
Инженерлер алдымен ең көп адам пайдаланатын сервистерді қалпына келтіруге басымдық беріп отыр.
Компания Қазақстан азаматтарының жеке деректері ел аумағындағы серверлерде сақталатынын да түсіндірді.
Жасанды интеллект және цифрлық даму министрлігі бұл серверлердің қалыпты режимде жұмыс істеп тұрғанын мәлімдеді.
Дегенмен жеке деректердің Қазақстанда сақталуы сервистің барлық технологиялық жүйесі ел ішінде орналасқанын білдірмейді.
Компанияның түсіндіруінше, инфрақұрылымның кейбір бөліктері әртүрлі мемлекеттерде орналасқан.
Сондықтан бір елдегі техникалық ақау бірнеше мемлекеттегі сервистердің қолжетімділігіне бір мезгілде әсер етуі мүмкін.
Осылайша, министр атаған екі-үш күн әзірге болжамды мерзім болып отыр. Компания сервистердің толық қалпына келетін нақты күнін жариялаған жоқ.
Пайдаланушыларға өзгерістер туралы ресми арналар арқылы хабарланатыны айтылды.
