Sona.kz

Метка: Асхат Бердіханов

  • Асхат Бердіханов Шеңгелді шаруаларымен кездесті

    Асхат Бердіханов Шеңгелді шаруаларымен кездесті

    Басқосуда сорғы станцияларының жай-күйі, тарифтердің өзгеруі, су алуға лимит, топырақ құнарлығы, паразиттерге қарсы өңдеу секілді түйткілді мәселелер көтерілді.

    Ауыл шаруашылығы бөлімінің басшысы Асқар Ибраимовтың сөзінше, биыл Шеңгелді ауылдық округінде 11 мың гектардан астам аумақ игерілді. Күзгі дала жұмыстарының нәтижесінде жиналған 8 мың тонна пияз бен картоп қоймаларда сақталған. Өнімді ірі сауда орталықтарына өткізу үшін келіссөздер жүргізілуде. Сондай-ақ «Қонаев ӘКК» АҚ-ның тұрақтандыру қорына өткізу мәселесі қарастырылуда.

    Келесі сұрақ – су тарифі. №2 сорғы станциясының басшылығы 2026 жылы тариф 1 текше метр суға 30 теңге болуы мүмкін екенін айтып, шаруаларға хабарлама берген. Тарифтің өсуі су желілерін күтіп ұстау мен жөндеу шығындары, электр энергиясы тарифінің өсуіне байланысты болып отыр. Түбегейлі шешім әлі қабылданған жоқ, алдағы уақытта қоғамдық тыңдалым өтеді.

    Ал №4 сорғы станциясының су желілері тозып, биыл бірнеше рет апат орын алған. Осыған байланысты станцияны сатып алып, мемлекет иелігіне өткізу, кейіннен күрделі жөндеу проблемасы талқылануда. Егер нысанды сатып алмайтындай жағдай болса, басқа техникалық шешімдер қарастырылады. Шаруаларға бұл жағдай да толығымен түсіндірілді.

    Сонымен қатар жиында «Қапшағай Бидай Өнімдері» ЖШС-на бидай өткізу, «PepsiCo» компаниясына картоп өткізуге болатыны айтылды. Ірі зауыттармен жұмыс істеу шаруалардың тиімді әрі пайдалы қызметін қамтамасыз етеді.

    «Шаруалармен үнемі кездесулер өткізіп, бірқатар проблемаларды шештік. Алдағы маусымда да бірлесе қызмет етейік. Барлық жобалар, жоспарлар өздеріңізбен ақылдаса отырып, жүзеге асырылады», – деді Асхат Бердіханов пікірін білдіріп.

    Өз кезегінде ауыл шаруашылығы тауарларын өндірушілер су лимитін өзгерту, топырақ құнарлығын зерттеу, зиянкестерге қарсы өңдеу жайлы сұрақтарын қойды. Жиынның хаттамасы жасалып, соның негізінде тиісті шаралар қабылданады.

  • Саяжай тұрғындарымен кездесу: Бас жоспар мәселесі талқыға салынды

    Саяжай тұрғындарымен кездесу: Бас жоспар мәселесі талқыға салынды

    Негізгі баяндамадан соң тұрғындар өздерін толғандыратын бірқатар сұрақтарды қойды. Оның негізгісі саяжайларға шағынаудан статусын беру болды.

    «Бұл мәселе тек Бас жоспар бекітілгеннен кейін шешімін табады. Аталған құжатқа өзгерістер енгізіліп, мемлекеттік сараптамаға жолданды. Оның оң қорытындысы шығарылса, қаланың шекарасы бекітіліп, саяжай массивтеріне шағынаудан статусы беріледі. Барлық процесс ауқымды жұмыс екенін естен шығармайық. Уақыт қажет», – деді әкім.

    Шаһар басшысының сөзіне сүйенсек, Бас жоспар бекітілгеннен кейін ауыз су тарту, жаңа жол салу жобалары дайындалады.

    Қала әкімі түйткілдің түйіні тарқамай тұрғанына қарамастан, соңғы жылдары мұнда айтарлықтай жұмыс жасалғанын да атап өтті. Мысалы:
    • Саяжайларға балалар, спорт алаңдары салынды;
    • ауыз су құбырлары мемлекет меншігіне алынып, «Қонаев Су Арнасы» мекемесінің иелігіне өтті;
    • 81,3 шақырым электр желісі ауыстырылып, жөнделді;
    • көше жарығы орнатылды;
    • кейбір аумақтарда жол жөнделді;
    • аялдамалар мен жасанды жол дөңестері қойылды;
    • бейнебақылау камералары орнатылды;
    • мемлекеттік мекеме 1200 метр ауыз су құбырын жаңартты (абоненттер жыл соңына дейін жаңа желіге қосылады);
    • барлық саяжайға газ тарту бойынша жобалық-сметалық құжат әзірленуде.

    Сонымен қатар халық үй жануарларының иесіз қаңғып, көшелерде жүретінін айтып, шағымданды. Бұл сұрақ полиция басқармасының бақылауына алынды.

    Айта кетейік, Қонаев қаласының аумағында 8 саяжай кооперативі орналасқан.

  • Әр сұрақты толық қарап, нақты шешім қабылдаймыз – Асхат Бердіханов

    Әр сұрақты толық қарап, нақты шешім қабылдаймыз – Асхат Бердіханов

    Баяндамадан соң, тұрғындар бірқатар келелі мәселелерді көтерді.

    Ең алдымен халық дәріхананың, сондай-ақ амбулаторияда УДЗ және рентген маманының жоқтығын айтты. Жас мамандар Шеңгелдіге көшіп келгеннің өзінде баспанамен қамту мәселесін де қарастыру қажет.

    Бұл сұраққа қалалық көпсалалы аурухана директорының орынбасары Айсұлу Оңғарова жауап берді. Айтуынша, жақын арада 3 маман УДЗ, рентгенге түсіру бағыттары бойынша жұмыс істей бастайды. Ал тұрғын үй беру жайында қала әкімі айтты.

    «Осы уақытқа дейін бұл түйткіл қозғалған. Жергілікті әскери бөлім арқылы пәтерлерді алып, мамандарға беру жайлы келіссөз жүргізіп жатырмыз. Ауыл әкіміне баспанаға мұқтаждардың тізімін жаңартуды тапсырамын. «Дипломмен ауылға» бағдарламасы да жұмыс істеп тұр. Дәріхана ашу сұрағын аурухана басшылығы қарастырады. Маңызды кәсіпкерлік нысанды ашамын деушілер болса, қолдау қажет», – деді Асхат Бердіханов.

    Ауыл тұрғындары көтерген тағы бір мәселе – қоғамдық көлік тапшылығы. Қазіргі таңда Шеңгелді–Қонаев бағытында қатынайтын автобустар саны жеткіліксіз. Бұл туралы жауап берген автопарк өкілдері қосымша автобус сатып алу бағытында жұмыс жүргізіліп жатқанын мәлімдеді.

    Сондай-ақ Шеңгелдінің жаңа тұрғын үй аумақтарындағы инфрақұрылым жайы назарға алынды. Жұртшылықтың айтуынша, кейбір көшелерде әлі күнге дейін су, жарық және жол мәселесі шешілмеген.

    Аталған жайтқа байланысты Асхат Бердіханов ауыл әкімі Мақсат Жазиевті сынға алды.

    «Қазір жаңа үйлер түсіп жатқан жерге электр желісі тартылуда. Дегенмен, басқа да желілерді жүргізуге жүйелі түрде тоқталып, алдын ала инженерлік-коммуникациялық инфрақұрылым жобасын дайындау қажет еді. Бұл ең бірінші ауыл әкіміне сын. Әр сұрақты толыққанды қарауымыз тиіс. Бұлай іс еткеніміз жарамайды. Жоба жасау, басқа жоспарларды түгендеуді ТҮКШ бөліміне тапсырамын», – деді қала әкімі.

    Бұдан бөлек, әлеумет көтерген бос ғимараттарды пайдаға асыру, сквер салу, жайылым жер тапшылығы сұрақтары хаттамалық тапсырма негізінде шешімін табады.

  • Асхат Бердіханов электр жабдықтарын шығаратын компанияның жұмысымен танысты

    Асхат Бердіханов электр жабдықтарын шығаратын компанияның жұмысымен танысты

    «ПФ Электросервис» ЖШС-нің іргесі 1991 жылы қаланған.

    Мұнда шамдар, өнеркәсіп орындарына қажетті электр жабдықтарының жиынтығы, трансформаторлы қосалқы станциялар шығарылады. Сондай-ақ компания токты үнемдеу технологиясына, электр энергиясының сапасына ғылыми-зерттеу жұмыстарын жасау, монтаждау секілді қызмет түрлерін көрсетеді.

    Бұл серіктестік бірқатар ірі шетелдік зауыттармен әріптестік қарым-қатынас орнатқан.

  • Саяжайлардың инфрақұрылымын дамыту мәселесі қарастырылды

    Саяжайлардың инфрақұрылымын дамыту мәселесі қарастырылды

    Жиналыста Бас жоспардың орындалуы, саяжай массивтерін газдандыру, тұрмыстық қатты қалдықтарды шығару, электр желілерін жөндеу сияқты инфрақұрылымға қатысты сұрақтар қарастырылды.

    Сәулет және қала құрылысы бөлімі мамандарының сөзінше, Бас жоспарға саяжайлар «шағынаудандар» есебінде енгізілген. Қазіргі таңда құжатқа өзгерістер енгізілуде. Бас жоспар қайта бекітілгеннен кейін «шағынаудан» мәртебесі беріледі. Одан кейін егжей-тегжейлі жоспар жасалады.

    Екінші мәселеге келсек, бұған дейін саяжайлардан тұрмыстық қатты қалдықтарды шығарумен ешқандай компания айналыспаған. Енді бұл жұмысты «Қонаев көркейту» мемлекеттік коммуналдық мекемесі атқарады.

    «ТҮКШ бөлімі конкурс ойнатқан болатын. Онда қала бойынша үш компания жеңімпаз атанды. Соның ішінде «Қонаев Көркейту» мекемесі Шеңгелді ауылдық округі мен саяжайлардағы тұрмыстық қатты қалдықтарды шығару бойынша қызмет көрсетуші болып анықталды», — деді ТҮКШ бөлімінің басшысы Тимур Ақмырзаев.

    Сондай-ақ мамандар көгілдір отын тарту туралы да түсіндіріп өтті. Мәліметке сүйенсек, құрылыс жұмыстары қаланың Кешенді даму жоспары аясында жүзеге асады деп күтілуде. Қазіргі таңда жобалық-сметалық құжаты әзірленіп жатыр.

    Алдағы апталарда осы саяжайда жол шұңқырларын жөндеу, істен шыққан жарық бағаналарын бұзып, алып тастау секілді жұмыстар жасалады.

    Жиналыс соңында қала әкімі Асхат Бердіханов аталған проблемалық сұрақтарға байланысты пікірін білдірді.

    «Бүгінде саяжайлардың түйткілдері біртіндеп шешіліп келеді. Кей кооперативтер өз жұмысын тоқтатты, кей саяжайлардың электр желілері мен ауыз су, суармалы су құбырлары әкімдік меншігіне өтті. Мұның бәрі ортақ жұмыстың нәтижесі. Осы қалыптан таймай, өздеріңізбен ары қарай да қызмет етуді жалғастырамыз. Инфрақұрылымды дамытып, саяжайларды жандандыру халықтың әл-ауқатына тікелей әсер ететіні сөзсіз. Бүгін айтылған сұрақтар күн тәртібінен түспейді», — деді шаһар басшысы.

    Ақпаратқа қоса кетейік, Қонаев қаласының аумағында 8 саяжай кооперативі орналасқан.

  • «Үй салу жақсы, оның сапалы болуы одан да маңызды» – Асхат Бердіханов

    «Үй салу жақсы, оның сапалы болуы одан да маңызды» – Асхат Бердіханов

    Қонаев қаласында көпқабатты тұрғын үйлердің құрылысы қарқынды жүріп жатыр. Олардың көбі жеке компаниялардың қаржысына салынуда.

    Қонаев қаласының әкімі шаһарды кезекті рет аралау барысында бірқатарына кіріп шықты. Алдымен ол «Самұрық» ТҮК-ке барды. Бұл кешен 11,6 гектар жерде тұрғызылады деп жоспарлануда. Жоба 2029 жылға дейін жүзеге аспақ. Тартылатын инвестиция сомасы – 65 млрд.теңгені құрайды. Қазір құрылыстың 1-кезеңі жүріп жатыр. Мұнда жалпы аудан 160 мың шаршы метрден астам тұрғын үй бой көтереді.

    Келесі нысан 10 шағынауданда орналасқан «NNS City» тұрғын үй кешені болды. Тапсырыс беруші – «Али-Нұр транс» ЖШС. Мұнда 21 көпқабатты тұрғын үй салынады. Қазір төртеуінің құрылысы аяқталған, жақын арада ауланы абаттандыру басталады. Содан кейін бірден қолданысқа беріледі.

    «Инженерлік желілерді тарту жұмыстары уақытылы жүргізілуі тиіс. Кейіннен қоныстанған халық арасында сапасыз құрылысқа шағым болмауы қажет. Әкімдікпен бірлесе, ақылдаса қызмет етіңіздер. Үй салу жақсы, оның сапалы болуы одан да маңызды», — деді Асхат Бердіханов.

    Одан соң әкім күрделі жөндеуден өтіп жатқан 8-10 шағынауданның жолын көрді. Бұл жерде көше жарығын орналастыру мәселесі қарастырылды. Жолаушылар тасымалы және автомобиль жолдары бөлімінің басшысы Бағдат Алиевтің сөзінше, жоба 2026 жылға өтпелі болады. Әкім көше жарығын қоюда адамдарға ыңғайлы болуы қажеттілігін атап өтті. Бүгінде мұнда біршама жұмыстар аяқталған, тротуар бордюрлары, аялдамалар қойылып, жолдың кей бөлігіне асфальт төселген. Бұл жұмыстар қаланың Бас жоспарына сәйкес атқарылуда.

    Айта кетейік, биыл Шеңгелді ауылдық округіндегі елдімекендердің жолы ағымдағы жөндеуден өтуде. Сондай-ақ «Көшпенділер қалашығына» жаңадан жол салынуда. «Қарлығаш» ықшамауданында да жол күрделі жөндеуден өтуде.

    Құрылыс саласына келсек, жыл басынан 18843 шаршы метр тұрғын үй қолданысқа берілді. Ал құрылыс жұмыстарының көлемі 9,7 млрд.теңгені құрады.

  • Қонаевтың қарт тұрғындарына құрмет көрсетілді

    Қонаевтың қарт тұрғындарына құрмет көрсетілді

    Ардақты ардагерлердің мерекесіне орай, Қонаев қаласының әкімі Асхат Бердіханов Кербұлақ және Қосқұдық ауылдарында тұратын көнекөз қария мен әжейлерді құттықтап, үйлеріне барды.

    Дүйсен атамыз бен Сарқыт апамыздың отау құрғанына биыл 51 жыл уақыт болған. Қазірде олар Кербұлақ ауылындағы үлгілі отбасылардың бірі. Бір ұл, бір қыз тәрбиелеген қарттар әлі күнге дейін туған жеріне, еліне деген сүйіспеншілігін жоғалтпаған. Қилы замандарда да ауылын тастап кетпеген. Ата мен әже зейнет жасына дейін егіншілікте қызмет жасап, балаларын оқытып, жеткізіп, қара шаңырақтың иесі болып отыр.

    Ал Қосқұдық тұрғыны Тілеукен Шаяхметова – жасы 85-ті алқымдаған алтын құрсақты ана, кітапханашы. Әженің отбасы станса құрылғанда осы өңірге көшіп келген. Әкесі де, балалары да – әулетімен түгел теміржолшы.

    Шаһар басшысымен ақ дастархан басында әңгімелескен қарттар ақжарма тілектерін айтты.

    «Осы күнімізге де шүкір. 10 құрсақ көтеріп, ұлды ұяға, қызды қияға қондырдық. Ауыл үшін талай тер төгіп, еңбек еттік. Балаларыммен қатарлас екенсіңдер, мерекені елеп-ескеріп, құттықтап жатқандарыңа алғыс. Біздің жасымызды берсін! Көгеріп, көктеңдер, балаларым», – деді Тілеукен әже.

    Бұдан бөлек, Қонаев қаласының тұрғындары, отау құрғандарына 50-60 жыл болған Сәрсенбековтер мен Абышевтер әулетіне сый-сияпаттар тарту етілді.

    Мерекеде жалғызбасты қарттар да назардан тыс қалған жоқ. Оларға қала әкімдігінің атынан азық-түлік себеттері жеткізілді.

    Сондай-ақ қаланың алғаш іргесін қалаған құрылысшылар, «Ардагерлер кеңесі» мен «Аналар кеңесінің» мүшелері, түрлі салада қызмет еткен зейнеткерлер, белсенді қарияларға қала әкімінің Алғыс хаты табысталды.

  • Асхат Бердіханов Шеңгелді ауылдық округіндегі бірқатар нысанды аралады

    Асхат Бердіханов Шеңгелді ауылдық округіндегі бірқатар нысанды аралады

    Әкім алдымен ауылдарда салынып жатқан тас жолдың сапасын тексерді. Жауапты бөлім мамандарының айтуынша, жақын арада барлық елдімекендердегі құрылыс жұмыстары аяқталады.

    Одан кейін шаһар басшысы қоғамдық көлік мәселесі жайында Кербұлақ ауылының тұрғындарымен кездесті. Ол жақын арада Қонаев пен екі ортаға қатынайтын автобус бағыты ашылатынын атап өтті. Тиісті құжаттар рәсімделу үстінде.

    Бұдан бөлек, Асхат Бердіханов Шеңгелдідегі мал сою алаңы мен өрт сөндіру депосының құрылыс барысымен танысты. Мал сою алаңы кейіннен ветеринарлық бөлімнің иелігінде болады. Ал депо тұрғызылған соң, Қонаевтың өрт сөндіру бөлімінен 1 техника бөлінеді. Бұл — төтеншеліктердің жұмысын жеңілдетуге бағытталған шаралардың бірі.

    Шаһар басшысы жергілікті Мәдениет үйінің де жағдайымен танысты. Нысан 1987 жылы қолданысқа берілген, 2010 жылы күрделі жөндеуден өткен. Қазіргі таңда 220 орындық Мәдениет үйінің кафельдері сынып, қабырғасы қақыраған, спорт зал жылу жүйесіне қосылмаған. Мұнда 100 орындық кіші зал да бар. Ғимаратты толықтай жөндеуден өткізу мақсатында жобалық-іздестіру жұмыстары жүруде. Кейіннен жобалық-сметалық құжаты әзірленіп, мемлекеттік сараптамаға жолданады. Шаһар басшысы бұл мәселені қатаң бақылауда ұстауды тапсырды.

  • Қонаевта №6 жағажайдың болашағы талқыланды

    Қонаевта №6 жағажайдың болашағы талқыланды

    Қонаевта №6 жағажайды дамыту мәселесіне арналған кеңейтілген жиын өтті. Оған Мәжіліс депутаты Наурыз Сайлаубай, қала әкімі Асхат Бердіханов, тиісті бөлім өкілдері және жағажай аумағында жұмыс істейтін кәсіпкерлер қатысты.

    Қазір бұл аумақты 42 кәсіпкер жыл сайын үш ай мерзімге жалға алады. Соңғы үш жылда полиция 34 ұрлық, 18 бұзақылық, 3 орташа ауырлықтағы денсаулыққа қасақана зиян келтіру және 200-ден астам әкімшілік құқықбұзушылық тіркеген. Сондай-ақ, өрт қауіпсіздігі, су айдындарын пайдалану ережелері және салық тәртібі бойынша көптеген заңбұзушылық анықталған.

    Аким Асхат Бердіхановтың айтуынша, №6 жағажай бюджет есебінен абаттандырылады. Жоба дайын және қазір мемлекеттік сараптамадан өтуде. «Біз №5 жағажайды жаңартып, демалушылардың ағыны артқанын көрдік. Сол тәжірибені қалған 7 коммуналдық жағажайға енгіземіз», – деді әкім.

    Депутат Наурыз Сайлаубай бұл бастаманы қолдап, қала көркейсе, елдің де көркейетінін атап өтті. Жиын соңында қатысушылар жағажай аумағын аралады.

  • Асхат Бердіханов саяжай тұрғындарымен жиын өткізді

    Асхат Бердіханов саяжай тұрғындарымен жиын өткізді

    Жиында «Алтын Алма» саяжайындағы проблемалық сұрақтар талқыланды. Оның қатарында ауыз су, электр энергиясы, жол, газ жүргізу, елдімекен статусын алу секілді сұрақтар болды.

    Сәулет және қала құрылысы бөлімі мамандарының сөзінше, Қонаев қаласының аумағында 9 саяжай алабы бар. Бас жоспар бойынша барлығы қала құрамына енгізілген. Алайда, құжатқа түзетулер мен өзгерістер енгізілуіне байланысты шағынаудан статусын беру әзірше мүмкін болмай отыр. Бұл сұрақ шешілмейінше күн тәртібінен түспейді.

    Келесі мәселе — ауыз су жүргізу бойынша арнайы жоба дайындалуда. Биыл мемлекеттік сараптамадан өтеді деп жоспарлануда. Оған дейін ағымдағы жөндеу ретінде үш аумаққа су құбырлары салынады. Қазір сүзгі станциясына қосу нүктесі анықталуда.

    «Сондай-ақ бұл саяжайға биыл көше жарығын орнату жоспарлануда. Газ тарту бойынша жобалық-сметалық құжаты әзірленіп жатыр», — деді ТҮКШ бөлімінің басшысы Тимур Ақмырзаев

    Ал жаңа жолдарды салу мәселесі бойынша жолаушылар тасымалы және автомобиль жолдары бөлімінің басшысы Бағдат Алиев айтты.

    «Жаңа жолдарды салу жобасы уақытша тоқтатылды. Себебі, Бас жоспарға өзгерістер жасалуда», — деді ол.

    Дегенмен, әкім көше жолдарын тегістеуге қанша қаражат қажет екенін есептеп, келесі бюджеттің нақтылауына құжаттарды дайындауды тапсырды.

    Басқосу нәтижесінде хаттама жазылып, бөлімдерге орындауға жіберілді. Бұдан бөлек, шаһар басшысы «Алтын Алма» саяжайын аралап, кемшіліктерді көріп шықты.