Sona.kz

Метка: Басты оқиғалар

  • Қазақстанда екі әлеуметтік төлем артады

    Қазақстанда екі әлеуметтік төлем артады

    2026 жылдың 1 қаңтарынан бастап Қазақстанда Мемлекеттік әлеуметтік сақтандыру қорынан (МӘСҚ) төленетін еңбекке жарамсыздық пен асыраушысынан айырылу бойынша төлемдер 10 пайызға индексацияланады, деп хабарлайды Sona.kz Еңбек және халықты әлеуметтік қорғау министрлігіне сілтеме жасап.
    Ведомствоның мәліметінше, төлем мөлшері әрбір жағдайда жеке есептеледі. Ол соңғы екі жылдағы орташа айлық табысқа, еңбекке жарамсыздық коэффициентіне, асырауындағы адамдар санына және міндетті әлеуметтік сақтандыру жүйесіне қатысу өтіліне байланысты.
    Өткен жылы:
    •Асыраушысынан айырылған 66 мың отбасы 25,3 млрд теңге алды. Орташа айлық төлем – 74 460 теңге.
    •Еңбекке жарамсыз болған 97 мың адамға 34,5 млрд теңге төленді. Орташа төлем – 71 468 теңге.
    ? Асыраушысынан айырылу төлемі 18 жасқа дейін, ал күндізгі бөлімде оқыса – 23 жасқа дейін тағайындалады.
    ? Еңбекке жарамсыздық төлемі МӘСҚ қатысушыларына мүгедектік бойынша мемлекеттік жәрдемақыға қосымша төленеді және 30%-дан 100%-ға дейінгі еңбекке жарамсыздық дәрежесінде беріледі.
    Еске салайық, қыркүйектегі Жолдауында Президент Қасым-Жомарт Тоқаев әлеуметтік қолдау жүйесін сынға алып, көмектің көбіне шынайы мұқтаждарға емес, санаттарға бөлініп берілетінін айтты. Мемлекет басшысының пікірінше, артық жеңілдіктер масылдықты күшейтіп, даму ресурстарын тежейді.
  • Қонаев қаласының әкімі Сычуань делегациясын қабылдады

    Қонаев қаласының әкімі Сычуань делегациясын қабылдады

    Қонаев қаласының әкімі Асхат Бердіханов ҚХР-дың Сычуань провинциясының делегациясын қабылдады.

    Кездесуде шаһарға инвестиция тарту мәселесі қарастырылды. Делегаттар бірқатар ауқымды жобаларды жүзеге асыра алатындарын жеткізді. Оның ішінде − медициналық орталықтар құру, күре жолдарды жарықтандыру, жол-көлік инфрақұрылымын дамыту.

    Шаһар басшысы Қонаев қаласы Алматы-Өскемен автомобиль жолының бойында тұрғандықтан, логистиканы дамыту өзекті екенін атап өтті.

    «Алдағы уақытта сіздермен логистика саласы бойынша жұмыс істейік. Кәсіпкерлік бөлімі, менің орынбасарларым инвестжобаларды толығымен сүйемелдейді. Ынтымақтастыққа, әріптестікке дайынбыз. Инвестиция салудың жолдары жайлы айтып, түсіндіруге әзірміз», — деді Асхат Бердіханов.

    Естеріңізге сала кетейік, қазіргі таңда инвестициялық портфельде қала бойынша 39 жоба бар. Оның 11-і туризмді дамытуға бағытталған.

  • Өңірде алғаш рет: «Самұрық-Қазына» директорлар кеңесіне жасанды интеллект мүше болды

    Өңірде алғаш рет: «Самұрық-Қазына» директорлар кеңесіне жасанды интеллект мүше болды

    SKAI атты нейрожелі «Самұрық-Қазына» Ұлттық әл-ауқат қорының директорлар кеңесіне толыққанды мүше болып енді, деп хабарлайды Sona.kz қордың баспасөз қызметіне сілтеме жасап. Бұл – Орталық Азияда алғаш рет жасанды интеллект корпоративтік басқару деңгейінде дауыс беру құқығына ие болған жағдай.

    Қордың мәліметінше, SKAI озық жасанды интеллект алгоритмдері негізінде жасалған. Ол «Қазақтелекомға» тиесілі, Қазақстандағы қуаты бойынша екінші орында тұрған Al Farabium суперкомпьютерінде жабық режимде жұмыс істейді.

    Цифрлық тәуелсіз мүше 2008 жылдан бері құжаттар мен шешімдерді талдап, қорытынды жасап, дауыс беру кезінде өз пікірін білдіреді. «Самұрық-Қазынада» атап өткендей, жасанды интеллектті енгізу басқарушылық шешімдердің ашықтығы мен тиімділігін арттыруға мүмкіндік береді.

    Сарапшылардың айтуынша, жасанды интеллекттің корпоративтік басқаруға енгізілуі ұлттық компаниялардың цифрландыруындағы жаңа кезеңге айналып, өңірдегі басқа құрылымдарға үлгі болуы мүмкін.

  • «Үй салу жақсы, оның сапалы болуы одан да маңызды» – Асхат Бердіханов

    «Үй салу жақсы, оның сапалы болуы одан да маңызды» – Асхат Бердіханов

    Қонаев қаласында көпқабатты тұрғын үйлердің құрылысы қарқынды жүріп жатыр. Олардың көбі жеке компаниялардың қаржысына салынуда.

    Қонаев қаласының әкімі шаһарды кезекті рет аралау барысында бірқатарына кіріп шықты. Алдымен ол «Самұрық» ТҮК-ке барды. Бұл кешен 11,6 гектар жерде тұрғызылады деп жоспарлануда. Жоба 2029 жылға дейін жүзеге аспақ. Тартылатын инвестиция сомасы – 65 млрд.теңгені құрайды. Қазір құрылыстың 1-кезеңі жүріп жатыр. Мұнда жалпы аудан 160 мың шаршы метрден астам тұрғын үй бой көтереді.

    Келесі нысан 10 шағынауданда орналасқан «NNS City» тұрғын үй кешені болды. Тапсырыс беруші – «Али-Нұр транс» ЖШС. Мұнда 21 көпқабатты тұрғын үй салынады. Қазір төртеуінің құрылысы аяқталған, жақын арада ауланы абаттандыру басталады. Содан кейін бірден қолданысқа беріледі.

    «Инженерлік желілерді тарту жұмыстары уақытылы жүргізілуі тиіс. Кейіннен қоныстанған халық арасында сапасыз құрылысқа шағым болмауы қажет. Әкімдікпен бірлесе, ақылдаса қызмет етіңіздер. Үй салу жақсы, оның сапалы болуы одан да маңызды», — деді Асхат Бердіханов.

    Одан соң әкім күрделі жөндеуден өтіп жатқан 8-10 шағынауданның жолын көрді. Бұл жерде көше жарығын орналастыру мәселесі қарастырылды. Жолаушылар тасымалы және автомобиль жолдары бөлімінің басшысы Бағдат Алиевтің сөзінше, жоба 2026 жылға өтпелі болады. Әкім көше жарығын қоюда адамдарға ыңғайлы болуы қажеттілігін атап өтті. Бүгінде мұнда біршама жұмыстар аяқталған, тротуар бордюрлары, аялдамалар қойылып, жолдың кей бөлігіне асфальт төселген. Бұл жұмыстар қаланың Бас жоспарына сәйкес атқарылуда.

    Айта кетейік, биыл Шеңгелді ауылдық округіндегі елдімекендердің жолы ағымдағы жөндеуден өтуде. Сондай-ақ «Көшпенділер қалашығына» жаңадан жол салынуда. «Қарлығаш» ықшамауданында да жол күрделі жөндеуден өтуде.

    Құрылыс саласына келсек, жыл басынан 18843 шаршы метр тұрғын үй қолданысқа берілді. Ал құрылыс жұмыстарының көлемі 9,7 млрд.теңгені құрады.

  • Түркістанда белсенділер тағы бір күдікті педофилді анықтады

    Түркістанда белсенділер тағы бір күдікті педофилді анықтады

    Түркістан облысында «Жаңа адамдар» қозғалысының белсенділері кәмелетке толмаған қызды азғыруға тырысқан ер адамды ұстағанын хабарлады, деп жазады Sona.kz Egov.press телеграм каналына сілтеме жасап.

    Қозғалыс өкілдерінің айтуынша, олар әлеуметтік желіде 11 жастағы қыздың атынан жалған парақша ашқан. Біраз уақыттан кейін Сауранбай Базарбек есімді азамат байланысқа шығып, жазысу барысында интимдік кездесуді табанды түрде ұсынған.

    Белсенділер барлық жазбалар мен дәлелдерді жинап, күдіктіні полиция қызметкерлеріне тапсырды. Қазіргі уақытта оған қатысты тексеріс жүргізіліп жатыр, нәтижесі бойынша заңды баға беріледі.

    Айта кетейік, бұған дейін де «Жаңа адамдар» қозғалысының мүшелері еліміздің түрлі аймақтарында осындай жағдайларды әшкерелеген болатын. Қоғам белсенділері мұндай жұмыс балалардың қауіпсіздігі мен олардың құқықтарын қорғауға бағытталғанын айтады.

  • Мемлекет басшысы Telegram негізін қалаушы Павел Дуровты қабылдады

    Мемлекет басшысы Telegram негізін қалаушы Павел Дуровты қабылдады

    Астанада өтіп жатқан Digital Bridge 2025 халықаралық форумының аясында Қазақстан Президенті Қасым-Жомарт Тоқаев Telegram мессенджерінің негізін қалаушысы Павел Дуровпен кездесті, деп хабарлайды Sona.kz Ақордаға сілтеме жасап.

    Әңгіме барысында білім беру, жасанды интеллект және киберқауіпсіздік салаларындағы ынтымақтастық мәселелері талқыланды. Мемлекет басшысы Telegram-ның еліміздің цифрлық күн тәртібін дамытуға қосып отырған үлесін жоғары бағалады.

    Компания ресми түрде Astana Hub технопаркінің қатысушысы атанып, Қазақстанда өз кеңсесін ашты және AIem.Ai орталығында жасанды интеллект зертханаларын іске қосты.

    Өз кезегінде Павел Дуров Президентке жасанды интеллект бағытындағы бірлескен жобаларды жүзеге асыру перспективаларын таныстыр

  • Ақтауда түркі халықтарының “Қорқыт ата” халықаралық кинофестивалі ашылды

    Ақтауда түркі халықтарының “Қорқыт ата” халықаралық кинофестивалі ашылды

    Ақтауда алғаш рет түркі елдерінің “Қорқыт ата” халықаралық кинофестивалінің салтанатты ашылу рәсімі өтті, деп хабарлайды Sona.kz Маңғыстау облысы әкімдігіне сілтеме жасап.

    Іс-шараға Маңғыстау облысы әкімінің бірінші орынбасары Асхат Оралов, Халықаралық ТҮРКСОЙ ұйымының Бас хатшысы Сұлтан Раев, Ұлттық киноны қолдау мемлекеттік орталығы басқарма төрағасы Құрманбек Жұмағали және Әзербайжан, Түркия, Түрікменстан, Қырғызстан, Өзбекстан, Венгрия мен Қазақстаннан келген 250-ден астам өнер қайраткері қатысты.

    Қызыл кілеммен әлемдік өнер жұлдыздары жүріп өтті. Қонақтар фестивальдің алғашқы фильмін тамашалап, мәдени бағдарламаға қатысты.

    Асхат Оралов шара қонақтарын құттықтап, фестивальдің тек аймақ үшін ғана емес, бүкіл Қазақстан үшін маңызды екенін атап өтті. Оның айтуынша, “Қорқыт ата” кинофорумы бауырлас елдер арасындағы мәдени байланыстарды нығайтып, ортақ құндылықтарды дәріптеуге мүмкіндік береді.

    Бес күн бойы Маңғыстауда 50-ге жуық фильм тегін көрсетіліп, шығармашылық кездесулер мен тәжірибе алмасулар ұйымдастырылады. Фестивальге қазақстандық жұлдыздармен қатар, түрік актері Бурак Өзчивит те қатысады.

    Қонақтар Бозжыра, Айрақты, Торыш сынды Маңғыстаудың көрікті жерлерін аралап, өңір мәдениетімен жақынырақ танысады. Фестивальдің жабылу және марапаттау рәсімі 4 қазанда өтеді.

  • Қостанайда дәрігерін соққыға жыққан науқастың соты басталды

    Қостанайда дәрігерін соққыға жыққан науқастың соты басталды

    Қостанайда облыстық аурухананың хирургы Антон Кистановты ұрып-соққан науқас сот алдында жауап беріп жатыр, деп хабарлайды Sona.kz HALYQSTAN-ға сілтеме жасап.

    Оқиға 17 шілдеде болған. Кезегін ұзақ күткеніне ашуланған пациент дәрігердің қабылдау бөлмесіне кіріп, кенеттен басынан ұрып жіберген. Соққы салдарынан дәрігер қабырғаға соғылып, ауыр жарақат алды: миы шайқалып, субдуралды қан құйылу мен бас сүйегінің сынуы тіркелген. Ол жансақтау бөліміне жатқызылып, кейін Астанаға шұғыл жеткізілген.

    Қазіргі уақытта Кистанов ауруханадан шыққанымен, жұмысқа қайта орала алмай отыр. Дәрігерде есте сақтау қабілетінің ішінара жоғалуы, оқу мен жазуда қиындықтар бар.

    Айыпталушы Абылайхан Серенжепов сотта кінәсін мойындады. Белгілі болғандай, ол бұған дейін бірнеше рет әкімшілік және қылмыстық жауапкершілікке тартылған: көлік жүргізу құқығынсыз мас күйінде көлік айдағаны үшін, сондай-ақ Ақмола облысында топтық қарақшылық жасағаны үшін шартты түрде 3 жыл 9 айға сотталған.

    Сот барысында науқастың ашуына дәрігердің қабылдауды кешіктіргені себеп болғаны айтылды. Алайда Кистанов сол күні таңертең екі шұғыл операция жасағаны анықталды.

  • Астанада Digital Bridge 2025 халықаралық технологиялық форумы басталды

    Астанада Digital Bridge 2025 халықаралық технологиялық форумы басталды

    Астанада дәстүрлі Digital Bridge 2025 халықаралық технологиялық форумы өз жұмысын бастады, деп хабарлайды Sona.kz Kazinform-ға сілтеме жасап.
    Форумның пленарлық отырысына Қазақстан Президенті Қасым-Жомарт Тоқаев қатысып, сөз сөйлейді. Мемлекет басшысы цифрлық даму, жасанды интеллект және инновациялар саласындағы Қазақстанның басым бағыттарын айқындап бермек.
    Форумның құрметті қонағы ретінде Қазақстанға ресми сапармен келген Венгрия Президенті Тамаш Шуйок қатысуда.
    Форум аясында әлемдік hi-tech индустриясының жетекші өкілдері жиналды. Спикерлер қатарында:
    •Павел Дуров, Telegram мессенджерінің негізін қалаушы және CEO;
    •Ли Кай Фу, Sinovation Ventures және 01ai компанияларының бас директоры;
    •Питер Норвиг, Стэнфорд университетінің ғылыми қызметкері, Google сарапшысы;
    •Мансур Ибрагим Әл Мансури, G42 International компаниясының бас директоры;
    •Илья Стербулаев, Стэнфорд университетінің профессоры;
    және басқа да танымал мамандар бар.
    Форумның негізгі мақсаты – жасанды интеллектті дамыту, цифрлық экономиканы күшейту және халықаралық әріптестікті тереңдету.
  • Қонаевта жергілікті нышан жобасын әзірлеу бойынша конкурс жарияланды

    Қонаевта жергілікті нышан жобасын әзірлеу бойынша конкурс жарияланды

    1. Жобаны әзірлеу:
    — қоғамдық келісім мен жалпы ұлттық бірлікті нығайту,
    — геральдикалық белгілерді сақтауға,
    — өңірдің ұлттық дәстүрлерін, тарихи, мәдени, географиялық, әлеуметтік-экономикалық ерекшеліктерін есепке алу қағидаларына негізделеді.

    2. Жобаны әзiрлеу кезiнде Қазақстан Республикасының Мемлекеттiк Туы мен Мемлекеттiк Елтаңбасының бейнесін, сондай-ақ дiни, рулық және тайпалық белгiлердiң бейнесін пайдалануға тыйым салынады.

    3. Жобаны әзірлеу кезінде мыналар ескеріледі:
    — жоба бұрын пайдаланылмаған және өзінің ерекшелігімен жергілікті жердің болашақ даму бағытын құруды айқындайтын жаңа жұмыс болып табылады;
    — жобаның визуалды құрамдас бөлігі, үш өлшемді кескіні және (немесе) моделі анық бедері бар;
    — жобада ресми атаулар, жазулар және басқа да мәтіндер қазақ тілінде жазылады;
    — жобаны әзірлеу кезінде авторлық құқықты және (немесе) сабақтас құқықты бұзуға, плагиатқа жол берілмейді.

    4. Жобаның авторы Қазақстан Республикасының азаматтары болып танылады.

    5. Жобаны жасауға бірнеше жеке тұлға қатысқан жағдайда олардың барлығы оның авторлары (бірлескен авторлары) болып саналады.

    6. Жобаны әзірлеу кезінде ұлттық этнографиялық элементтерді (ою-өрнектерді) пайдалануға рұқсат етіледі.
    Конкурсқа қатысуға өтінім қазақ және орыс тілдерінде қабылданады және жобаның сипаттамасын қамтиды.

    Конкурсқа қатысуға өтінімдерді Қонаев қаласының ішкі саясат бөліміне (электронды көшірмесі ovp_qonaev@mail.ru  почтаға) қағаз және электронды тасымалдағышта 2025 жылғы 31 желтоқсанынан кешіктірілмей ұсынылуы тиіс!

    Сұрақтар туындаған жағдайда 87055435477 (Төребеков Жеңіс Еркімбекұлы) нөмірі арқылы хабарласуға болады.