Sona.kz

Метка: Басты оқиғалар

  • Шерзат ісі: Адвокат соттан әділет пен ең ауыр жаза талап етті

    Шерзат ісі: Адвокат соттан әділет пен ең ауыр жаза талап етті

    Талдықорғанда 16 жасар Шерзат Полаттың өліміне қатысты өтіп жатқан сотта жәбірленуші тараптың адвокаты Мейірман Шекеев сот жүйесіне, адамдық пен ар-ұятқа үн қатты.

    Ол жарыссөзін: «Сотталушылар неше жыл алса да тірі қалады, ал менің балам өлді», – деген Шерзаттың әжесінің сөзінен бастады. Адвокат күдіктілердің қансырап жатқан баланы ұруын тоқтатпағанын, бұл – адамгершілікке жатпайтын қатігездік екенін айтты.

    «90-жылдардың бандиттері мұндай болмаған», – деген Шекеев бұл істі қарапайым сот процесі емес, бүкіл әділет жүйесінің ар-ожданы сынға түскен сәт деп бағалады.

    Сөз соңында ол соттан ең ауыр жаза тағайындауды және Шерзаттың отбасына моральдық, материалдық өтемақы өндіруді сұрады.

    Сот процесінде сонымен қатар, маңызды бейнежазба дискісінің жоғалғаны, көліктегі бейнетіркегіш жазбасының жойылып, кейін қалпына келтірілгені де белгілі болды.

  • Ақнәр Хамит: Екінші құрбысы өз нұсқасын айтты

    Ақнәр Хамит: Екінші құрбысы өз нұсқасын айтты

    Қайғылы түнде бірге болған екінші құрбысы Рана алғаш рет мәлімдеме жасап, оқиға барысын баяндады.

    Рананың айтуынша, сол түні Ақнәр мен Дидар дәмханадан кейін өз пәтеріне шақырып, алкоголь ішкен. Біраз уақыттан соң Ақнәрдің мінезі күрт өзгеріп, айқайлап, құрбыларына шабуыл жасаған. Рана оны “өз-өзіне қол жұмсамақ болды, сүрелер оқыды, түсініксіз әрекеттер жасады” деп сипаттады.

    Рана Ақнәрдің бұрын да терезеден секірмек болғанын, ақпанда жатақханада және сәуірде Дидардың үйінде осындай жағдай қайталанғанын айтты.

    Полиция істің бақылауда екенін мәлімдеді. Қазір “Өзін-өзі өлтіруге итермелеу” бабы бойынша тергелуде. Қоғам белсенділері мен отбасы “Қинау” және “Адам өлтіру” баптарын қосуды талап етуде. Күдіктілер бостандықта жүр.

  • Сотта Шерзат ісі бойынша жаза мерзімдері жария етілді

    Сотта Шерзат ісі бойынша жаза мерзімдері жария етілді

    Мемлекеттік айыптаушы Дана Сәрсенбай әрбір күдіктіге қатысты жаза сұрады:
    • Абзал Шынасыл – 23 жыл
    • Равиль Сакиев – 20 жыл
    • Азамат Тоқтаубаев – 15 жыл
    • Нұркияс Ілиясов – 9 жыл
    • Шыңғыс Белғожаев, Дархан Аскентай, Нұрбол Тоқтаубаев, Дидар Қалиахмет – әрқайсысына 7 жылдан
    • Дидар Ысқақ (кәмелетке толмаған) – 1 жыл 6 ай

    Қылмыстық баптар: адам өлтіру, бұзақылық, қылмысқа оқталу және ауыр қылмыс туралы хабарламау.

    Прокурор жәбірленуші тараптың материалдық және моральдық өтемақы талаптарын толық қанағаттандыруды сұрады. Мысалы, Шынасыл мен Сакиевтен 100 млн теңге моральдық өтемақы, сонымен қатар жерлеу шығындары үшін 2,8 млн теңге өндіру талап етілуде. Қалған айыпталушылардан да 20 млн теңгеден өндіру сұралды.

    Соттағы жарыссөздер жалғасып жатыр.

  • Шетелден алынған тауарға 5% салық салынбақ

    Шетелден алынған тауарға 5% салық салынбақ

    Қазақстан азаматтары шетелдік онлайн-дүкендерден алған тауарлары үшін 5% мөлшерінде кедендік төлем төлеуге міндеттелуі мүмкін. Бұл ЕАЭО-ның Кеден кодексіне енгізілетін жаңа ережелер аясында қарастырылып жатыр.

    Комитет мәліметінше, мұндай тауарлар енді “электрондық сауда тауарлары” деп жеке санатқа бөлінеді. Арнайы декларация да енгізіледі. Алайда құны 200 еуроға дейінгі заттар бұрынғыдай баж салығынан босатылады.

    Тапсырыс жеткізу екі жолмен жүреді: шетелден тікелей немесе отандық қойма арқылы. Ереже ЕАЭО елдері мақұлдағаннан кейін күшіне енеді.

  • 20 жыл бойы жасырынып жүрген есірткі тасымалдаушы экстрадицияланды

    20 жыл бойы жасырынып жүрген есірткі тасымалдаушы экстрадицияланды

    Ол героин мен опийді ірі көлемде тасымалдап, сатумен айналысты деген күдікке ілінген.

    Бас прокуратураның мәліметінше, 2003 жылы күдікті Өзбекстаннан Қазақстан арқылы Ресейге есірткі жеткізумен айналысқан қылмыстық топ құрамында болған. Ол есірткіні сақтау, тасымалдау және басқа қатысушыларға өткізуге жауапты болған.

    Сол жылы Қызылорда мен Қарағанды облыстарында өткен арнайы операция кезінде 35 кг героин мен 28 кг опий тәркіленіп, бірнеше қылмыскер ұсталған. Ал күдікті із суытып үлгеріп, 20 жыл бойы жасырынып жүрген.

    Ол 2024 жылдың желтоқсанында Ресейдің Самара облысында ұсталып, жақында Қазақстанға жеткізілді. Қазір тергеу изоляторында отыр.

  • Шеңгелдіде балабақша ашылды

    Шеңгелдіде балабақша ашылды

    1 маусым – Халықаралық балаларды қорғау күні ауыл тұрғындары үшін қуанышты жаңалықпен басталды. Шеңгелдіде 50 орынға арналған жаңа жекеменшік балабақша есігін айқара ашты.

    Мекеменің ашылу салтанатына қала әкімінің орынбасары Сәуле Нұрсолтанова қатысып, жұртшылықты айтулы күнмен және жаңа балабақшаның ашылуымен құттықтады.

    «Бұл балабақшадан елге тұтқа болатын азаматтар өсіп шықсын. Мерекелеріңіз құтты болсын! Ауыл тұрғындарына, балақайларға зор денсаулық, ашық аспан, мол бақыт тілейміз!» – деді қала әкімінің орынбасары.

    Бүгінде Қонаев қаласында (ауылдық округтерді қоса есептегенде) барлығы 19 балабақша жұмыс істейді. Оның ішінде 12-сі – мемлекеттік, 7-еуі – жекеменшік. Осы көрсеткіш бүгін тағы бір балабақшамен толықты

  • Тәттілер мен сыйлықтар, демалыс пен ойын-сауық: Қонаев қаласында Халықаралық балаларды қорғау күні тойланды

    Шараға Қонаев қаласы әкімінің орынбасары Сәуле Нұрсолтанова қатысып, барлық бүлдіршіндерді мерекемен құттықтады.

    Мерекелік концертке өнер мектептері, балабақшалар мен түрлі шығармашылық орталықтардың тәрбиеленушілері қатысты. Көпшілік назарына би қойылымдары, әндер мен көркем композициялар ұсынылды. Ерекше балалар да сахна төрінен табылып, өнерлерін паш етті.

    Сондай-ақ орталық алаңда балалар шығармашылығынан көрме ұйымдастырылып, отбасылық ойындар ойнатылды, балмұздақтар таратылды. Бұдан бөлек, бүлдіршіндер ретро-көліктерге отырып, қаланы аралап шықты.

    Жалпы Қонаев қаласында мереке кең көлемде аталып өтті:

    ✔️ Оқушылар «Қазақстан балалары» онкүндігі аясында түрлі шараларға қатысты
    ✔️ 30 мамыр күні 80 ерекше балаға арналған салтанатты шара өтті. Оларға сыйлықтар таратылып, түрлі қызықты ойындар ұйымдастырылды
    ✔️ мүгедектігі бар, көпбалалы және әлеуметтік осал топтан шыққан 490 баланы бассейндерге, ойын-сауық орталықтарына демалысқа апару жоспарланып отыр.

    Бұл шаралар әкімдікпен қатар, Отбасын қолдау орталығы, қаладағы қоғамдық бірлестіктермен бірге ұйымдастырылды.

  • Қонаевта дезинсекцияның ІІ кезеңі өтті: маса мен шіркейге қарсы күрес жалғасуда

    Қонаевта дезинсекцияның ІІ кезеңі өтті: маса мен шіркейге қарсы күрес жалғасуда

    Дезинсекцияның ІІ кезеңі 29 мамыр мен 1 маусым аралығында жүзеге асырылды. Өңдеу жұмыстары кешкі сағат 23:00-ден таңғы 06:00-ге дейін жүргізілді. Бұл ретте рұқсат етілген, санитарлық талаптарға сай инсектицидтік құралдар қолданылады. Атап айтқанда, «Бактицид», «Ультрагран», «Циперметрин» сынды арнайы препараттар зиянкес жәндіктерге қарсы тиімді әсер етеді.

    Өңдеу жұмыстарына арнайы техника мен дрондар жұмылдырылып, жеке қорғаныс құралдарымен жабдықталған мамандар тартылған.

    Айта кетейік, бұл бағыттағы шаралар кезең-кезеңімен жаз бойы жалғасып, тамыз айына дейін жүргізіледі. Қала әкімдігі тұрғындарды өңдеу жұмыстары кезінде қауіпсіздік шараларын сақтауға шақырады.

  • 663 миллион теңге талап: Шерзат ісінде азаматтық талаптар жарияланды

    663 миллион теңге талап: Шерзат ісінде азаматтық талаптар жарияланды

    Талдықорғанда Шерзат Полаттың өліміне қатысты сотта жәбірленуші тарап күдіктілерден 662,8 млн теңге моральдық және материалдық өтемақы талап етті. Бұл туралы марқұмның әкесі Қаржаубай Нұрымовтың адвокаты Мейірман Шекеев мәлімдеді.

    Арызда ұлын жерлеуге кеткен 2,8 млн теңге, сондай-ақ 9 айыпталушыдан әртүрлі мөлшерде моральдық өтемақы сұралған. Талап бойынша, әрбір жәбірленуші — Нұрымов, Гүлбара Бишембиева және Жұмабике Қадырова — бірнеше айыпталушыдан 100–120 млн теңгеден өтемақы алуы тиіс.

    Сот азаматтық талаптарды қабылдады.

  • Шерзат соты: Көліктегі әңгіме жазбасы тыңдалды

    Шерзат соты: Көліктегі әңгіме жазбасы тыңдалды

    Сотта Land Cruiser көлігіндегі видео мен аудиожазба тыңдалды. Онда Абзал Шынасыл, Нұрқияс Ільясов және басқалар оқиғадан кейін көлікте не болғанын талқылаған. Шынасыл «ештеңе көрмедік деп айтыңдар» десе, Сакиев: «Өліп қалды ма? Сотталсақ, сотталып кетейік!» деген.

    Жазбада Грузия мен Ресейге қашу, төбелес орнында дәлел қалды ма деген де әңгімелер айтылған. Жәбірленуші тарап көлікте болған Эльмира Нұрбекова мен Дана Жақсыгелдіні қайтадан сотқа шақыруды сұрады. Алайда судья бұл өтінішті қанағаттандырмады. Сот жәбірленушілерсіз жалғасуда.