Sona.kz

Метка: Басты оқиғалар

  • Бас прокуратура «QI-Trade» қаржы пирамидасының жетекшісін экстрадициялады

    Бас прокуратура «QI-Trade» қаржы пирамидасының жетекшісін экстрадициялады

    Қазақстан Республикасының Бас прокуратурасы Қырғыз Республикасынан трансұлттық ұйымдасқан қылмыстық топтың құрамында қаржы пирамидасын құрғаны және басқарғаны үшін қылмыстық жауаптылыққа тарту мақсатында Қазақстан азаматын экстрадициялады.

    Аталған топтың мүшелері 2017-2020 жылдар аралығында Қазақстан аумағында «QI-Trade» қаржы пирамидасын ұйымдастырып, 4,7 мыңнан астам салымшының жалпы сомасы 15 миллиард теңге қаражатын заңсыз иемденген.

    Қылмыстық топтың кейбір мүшелері сотпен әртүрлі жазаға тартылған, ал күдікті қылмыс жасағаннан кейін бой тасалап, халықаралық іздеуге жарияланды.

    Іздеуде бола тұра, ол Қырғызстанда кісі өлтіру қылмысын жасап, қырғыз сотымен сотталды.

    Қазақстан Республикасы Бас прокуратурасының сұрауы бойынша ол уақытша ұстап берілді, ал қаржы пирамидасын құрғаны және басқарғаны үшін қылмыстық жауаптылыққа тартылғаннан кейін Қырғыз Республикасына қайтарылатын болады.

    Осылайша, көрші мемлекет аумағында жазасын өтегеннен кейін күдіктіні Қазақстан аумағында жасаған қылмысы үшін жаза күтетін болады.

    Еске сала кетейік, бұған дейін Бас прокуратура осы қылмыстық топтың екі мүшесін Ресей мен Польшадан экстрадициялап, олар қазір әртүрлі жылдарға бас бостандығынан айыруға сотталған.

     

  • Түркістанда Қазақ-корей университеті салынып жатыр

    Түркістанда Қазақ-корей университеті салынып жатыр

    Түркістанда Қазақ-корей бірлескен университеті ғимаратының құрылысы жалғасып жатыр. Бұл бастама Президент Қасым-Жомарт Кемелұлы Тоқаевтың білім сапасын арттыру үшін әлемдегі озық жоғары оқу орындарының филиалдарын елімізде ашу тапсырмасына орай қолға алынған.

    Жауапты басшылар мен мердігер компания басшысымен пікір алмасып, атқарылып жатқан жұмыстар туралы есептерін тыңдады.

    – Ғимарат биыл аяқталып, оқу жылына толық дайын болуы тиіс. Ұйымдастыру, үйлестіру жұмыстарымен де біраз уақыт кетеді. Сондықтан құрылыс қарқынын төмендетпей, сапалы әрі жүйелі атқарыңыздар, – деген Нұралхан Көшеров 18 қабатты ғимаратты аралап көрді. Сапалы құрылыс материалдарын қолдануды тапсырды.

    Бүгінде ғимараттың құрылысы қарқынды. Сыртын қаптау, терезелерін орнату жұмыстары жүруде. Нысан тамыз айында тапсырылады деп жоспарланған. Бірақ мамыр айына дейін аяқтап, тапсыру көзделіп отыр. Жұмысшылар саны да жеткілікті, құрылыс қарқынды.

  • Димаш Құдайбергеннің әні америкалық чарттарда бірінші орынға шықты

    Димаш Құдайбергеннің әні америкалық чарттарда бірінші орынға шықты

    Димаш Құдайбергеннің Smoke әні америкалық iTunes және Amazon чарттарында алдыңғы қатарға шықты. 

    2025 жылғы қаңтар айында шетелдік басылымдарда қазақстандық музыкант Димаш Құдайберген туралы бірнеше мақала жарияланды.

    Америкалық «iTunes Top 100» қосымшасында «Smoke» трегі 32-орында тұр. Тағы бір чарт «Amazon» – да ол ән «Best Sellers in Songs» санатында 10-орын иеленген. «Smoke» фольклорлық вайбты электронды музыкамен және барлық жағынан жоғары вокалмен үйлестіретін композиция деп бағаланған «Best Sellers in Pop» категориясында бұл ән бірінші орыннан көрінді.

    Димаш Құдайберген жайлы америкалық «Haute Living»  басылымына мақала да шыққан.

    Димаш Құдайберген бүкіл әлем бойынша көрермендерді неоклассика, поп-музыка, қазақ фольклоры мен заманауи музыканың бірегей бірігуімен баурап алып, Азияның ең танымал әртістерінің біріне айналуда. Димаштың өнердегі еркіндігі оған қайталанбас және мәңгі есте қаларлық дыбыстық ландшафт жасау үшін дәстүрлі қазақ әуендерін әлемдік музыкамен араластыра отырып, әртүрлі музыкалық стильдерді еркін зерттеп, жаңа өнер жауһарын ойлап табуға мүмкіндік беруде. Димаш үшін музыка – жай ғана көңіл көтеру құралы емес, бұл әлемдік сахнада Қазақстанның бай мәдениетін көрсетуге арналған платформа, – деп жазады шетелдік БАҚ қазақстандық әнші жайлы.

    БАҚ әншінің кейінгі туындыларының ішінен 2024 жылғы 26 сәуірде шыққан Smoke композициясына жүгінеді. Туындының композиторы – Димаштың өзі болса, ал мәтін авторлары Кэндис Келли мен Дмитро Гордон.

    30 қаңтарда Smoke трегі америкалық чарттарда алдыңғы қатарға шықты. iTunes Top 100 қосымшасында ән 32-орында тұр.

  • Алмас Кішкенбаев өзіне айып таққандарға жауап берді

    Алмас Кішкенбаев өзіне айып таққандарға жауап берді

    Әнші Алмас Кішкенбаев өзіне қатысты ақпаратты жоққа шығарып, телеарналарды кінәлады.

    Журналист Михаил Козачков өзінің Telegram арнасында 40 жас шамасындағы ер адам сыраға тапсырыс беріп, ішімдікті жеткізген 17 жастағы курьерге тиіскенін және ол адамның аты Алмас Кішкенбаев екенін жазған болатын.

    Полиция департаменті мұны жоққа шығармады. Алайда әнші бұл іске өзінің қатысы жоқ екенін айтты.

    Ашуланып отырмын. Ешкім қарамайтын сапасыз арналарға түрлісін шығарады. Оны халық көрмейді, олар инстаграмдағы анонсты көреді де, қорытынды шығарады. Мені кінәлап тастайды. Қайдағы біреу, қайдағы біреу демей-ақ қояйын, ол да адам баласы. Бірақ мен оны мүлдем танымаймын. Неге мен мүлдем танымайтын адаммен байланыстырады? деп ашуланды әнші.

  • Екі қазақстандық полицейлерден 2500 доллар бопсалады деген күдікке ілінді

    Екі қазақстандық полицейлерден 2500 доллар бопсалады деген күдікке ілінді

    Қырғызстанның ІІМ Ішкі тергеу қызметі мен Шу облысы ІІД қызметкерлері ақша бопсалағаны үшін екі шетелдік азаматты ұстады, деп хабарлайды «АКИpress» порталы.

    1 ақпанда Қазақстан азаматтары әлеуметтік желілерде компроматтық видео жариялаймыз деп қорқытып, Шу облысының жол полициясы басқармасының қызметкерлерінен 2500 АҚШ долларын талап еткені туралы ақпарат түскен.

    Аталған факті бойынша Қырғыз Республикасы Қылмыстық кодексінің 208-бабы (бопсалау) бойынша қылмыстық іс қозғалды.

    «Тергеу барысында Сокулук ауданы, Военно-Антоновка ауылында қызмет атқарған полицияның жедел уәкілі А.Н. мен полиция аға сержанты М.Б. Mercedes-Benz автокөлігін тоқтатқаны анықталды. Оны Қазақстан азаматы, жүргізуші куәлігі жоқ Б.А. басқарған, ішінде А.Р. де болған. 

    Көлікті айып тұрағына сүйреп апара жатқанда, екі азамат патрульдік көліктің жәшігіне 6000 сом тастап, ақша жатқанын бейнежазбаға түсірген. Кейін осы видеоны пайдаланып, полицейлерден 2500 доллар талап еткені анықталды. Полиция 1990 жылы туған Б.А. мен 1984 жылы туған А.Р.-ды ұстап, уақытша ұстау изоляторына қамады», – делінген хабарламада.

    Тінту кезінде күдіктілерден таңбаланған ақшалай қаражат тәркіленді, ал істі толық анықтау үшін сот-медициналық сараптамалар тағайындалды.
    Қазіргі уақытта тергеу жалғасуда.

  • Интернет кеңістігінде заңға қайшы контент екі есе өскен – Аида Балаева

    Интернет кеңістігінде заңға қайшы контент екі есе өскен – Аида Балаева

    Мәдениет және ақпарат министрі Аида Балаева әлеуметтік желі қолданушыларынан ойланбай әрекет етпеуді, сондай-ақ заң талаптарына сәйкес онлайн-платформаның бұғатталуы мүмкін жазбалар мен пікірлер қалдырмауды сұрады. Бұл туралы министр Facebook-тегі парақшасында жазды.

    Балаеваның сөзінше, қазіргі уақытта интернет кеңістігінде бірқатар өзекті мәселелер қызу талқылануда. Мониторинг көрсеткендей, онлайн-платформаларда көбінесе заңға қайшы, қарапайым тілмен айтқанда, шындыққа жанаспайтын ақпарат жиі таралады.

    «Осыған байланысты желілік ресурстардың әкімшілерін жаңалықтар ағынын мұқият қадағалап, расталмаған ақпараттың таралуына жол бермеуге және заңға қайшы контентті жоюға шақырамын. Әлеуметтік желі қолданушыларынан да ойланбай әрекет етпеуді, сондай-ақ заң талаптарына сәйкес онлайн-платформаның бұғатталуы мүмкін жазбалар мен пікірлер қалдырмауды сұраймын.

    Миллиондаған азамат жаңалықтарды онлайн платформалардан алатынын ескере отырып, біздің министрлік тыйым салу шараларына сирек жүгінетінін атап өткім келеді. Дегенмен, желілік ресурстардың әкімшілері де өз әрекеттерінің салдарын түсініп, ақпарат таратуда ең алдымен оқырман мен қоғам алдындағы жауапкершілікті жіті ұғынуға тиіс», – деп жазды министр.

    Аида Балаеваның мәліметінше, татистикаға сүйенсек, 2023 жылдан 2024 жылға дейінгі аралықта Қазақстан интернет сегментінде анықталған заңға қайшы контент көлемі екі есе өсіп, 116 354 материалға жетті.

    Өткен жылы онлайн-платформаларда 78 539 заңға қайшы материал анықталып, оның 24,3%-ы жойылды.

    «Достар, кез келген мемлекеттің тұрақтылығын қамтамасыз ететін басты факторлар – ауызбіршілік пен ынтымақ. Сондықтан бәріміз Мемлекет басшысы атап өткендей, нағыз құқықтық мемлекет қалыптастырудың басты кілті саналатын заң мен тәртіп қағидатын берік ұстануымыз қажет», – деп қорытындылады Мәдениет және ақпарат министрі.

  • ҚМДБ әйелдердің мешітте намаз оқуына қатысты мәлімдеме жасады

    ҚМДБ әйелдердің мешітте намаз оқуына қатысты мәлімдеме жасады

    Қазақстан мұсылмандар діни басқармасы әйелдердің мешітке барып жамағатпен намаз оқуыны тыйым салынбайтынын, бірақ үйінде оқығаны абзал екенін айтты.

    «Алла Елшісі (оған Алланың салауаты мен сәлемі болсын): «Әйел­деріңе ме­шіт­ке ба­руға тыйым салмаңдар. Бі­рақ үйле­рі олар үшін ме­шіт­ке ба­ру­дан да қайырлы» деген. Ханафи мәзһабының ғалымдары фитнаға (бұзақылық) түсіп қалу қаупі болғандықтан, жас әйелдердің мешітке барып жамағатпен намаз оқуын мәкруһ санаған. Себебі Алла Елшісі (оған Алланың салауаты мен сәлемі болсын): «Үйле­рі олар үшін ме­шіт­ке ба­ру­дан да қайырлы» деген. Ал жасы үлкен, қарт әйелдердің таң және ақшам мен құптан намаздарында мешітке баруына болады. Бұл – имам Әбу Ханифаның көзқарасы. Өйткені ниеті бұзақылар бесін мен екінті намазында қаптап жүреді. Ақшам намазында кешкі асын ішумен әлек, таң намазы мен құптанда ұйқыда болады дейді. Әбу Юсуф пен Мұхаммедтің пікірі бойынша қарт әйелдер барлық парыз намазда мешітке бара алады», – деп жазылған хабарламада.

    ҚМДБ Шариғат және пәтуа бөлімі мәліметінше, мешітте әйелдерге арналған бөлек жер болса және ол жерге барар жол да көпшілікке көрінбейтіндей болса, оқасы жоқ.

    «Басты мақсат – әйелдің абыройы мен қоғамда түрлі бүліктердің тууына жол бермеу», – деді ҚМДБ өкілдері.

  • Жемқорларға қатаң жаза қолданылуы мүмкін

    Жемқорларға қатаң жаза қолданылуы мүмкін

    Енді жегі құрттай болған жемқорлардың елден шығуына тыйым салынуы ықтимал.

    – Айта кетейін, бұл бірінші рет көтеріліп жатқан сұрақ емес, бұл бізде баяғыдан бері талқылануда. Бұл бастама бұрыннан қарастырылуда. Бұл бағыттағы жұмыс жалғасуда, тиісті ұсыныстар бар, – деді Данияр Бигайдаров.

    Агенттік өкілінің сөзінше, парамен ұсталғандарды елден шығармау мәселесі басқа да құзырлы органдармен бірлесе қаралып жатыр.

    – Талқылау нәтижесі көрсетеді. Бұл бағыттағы жұмысты біз ғана қабылдай алмаймыз, мұны бүкіл мемлекеттік орган, аппарат қабылдауы тиіс. Депутаттар қолдаса, әрине, енгізілуі мүмкін, – деп сөзін қорытындылады ол. 

  • Болат Мажағұлов 8 жыл 6 айға сотталды

    Болат Мажағұлов 8 жыл 6 айға сотталды

    Астана қаласының қылмыстық істер жөніндегі ауданаралық сотының судьясы Әсел Мұқышеваның үкімі бойынша Болат Мажағұлов тағылған айыптар бойынша кінәлі деп танылып, 8 жыл 6 айға сотталды. Ол өзіне қызметте болған кезде берілген мемлекеттік наградасынан айырылады.

    Еске сала кетейік, Астана қаласы Мәдениет басқармасының бұрынғы басшысы Болат Мажағұлов өткен жылдың қыркүйек айының басында ұсталды. Тергеуді ҚМА (Қаржы мониторингі агенттігі) жүргізді.

    Экс-шенеунікке ҚР ҚК 189-бабының 4-бөлігі, 2-тармағы бойынша («Сеніп тапсырылған бөтен мүлікті иемдену немесе ысырап ету») айып тағылды. Тергеу нұсқасы бойынша, «Солнце» субұрқағын салу кезінде бір миллиардтан астам теңге жымқырылған.

    2016 жылы елорданың туған күніне орай пайдалануға берілген «Солнце» субұрқағы Орталық Азиядағы ең ауқымды жоба ретінде таныстырылған еді. 80 метрге дейін көтерілетін су ағындары жарқын шоу жасап, елорда тұрғындары мен қонақтарын қуантты.

    Алайда 2019 жылға қарай субұрқақ жарамсыз болып, су ағындарын бүркуін тоқтатты. ҚМА мәлімдеуінше, субұрқақ құрылысында сапасыз материалдар пайдаланылып, мемлекеттік сатып алу рәсімдерін өткізбестен келісімшарттарға қол қойылған.

  • 1223 елді мекенді су басу қаупі бар

    1223 елді мекенді су басу қаупі бар

    Қазақстанның 1223 елді мекені су басу қаупі бар аймақта. Бұл туралы Сенаттағы Үкімет сағатында төтенше жағдайлар министрі Шыңғыс Әрінов хабарлады.

    ТЖМ осы орындардың инфрақұрылымын ықтимал су тасқынына дайындау үшін жергілікті билік органдарымен және басқа да мемлекеттік органдармен өзара әрекеттеседі.

    «Мысалы, елді мекендерді қорғау үшін 576 км қорғаныс бөгеттері мен қорғандары тұрғызылып, нығайтылды. 164 км дренаждық жүйе жөнделіп, салынды, автомобиль және темір жолдардың астына 960 су өткізу құрылымы орнатылды және ауыстырылды, 658 км каналдар мен арықтар орнатылды. 74 өзеннің қауіпті учаскелерінде үш жүз шақырымнан астам тереңдету және жағалауды нығайту жұмыстары жүргізілді. Елді мекендердің ішінде нөсер және дренаж жүйелерінің құрылысы мен жөндеуі жүргізіліп жатыр», – деді Шыңғыс Әрінов.