Sona.kz

Метка: Басты оқиғалар

  • Ақтауда құлаған ұшақ ішінде қандай тосын жағдай болған?

    Ақтауда құлаған ұшақ ішінде қандай тосын жағдай болған?

    Azerbaijan Airlines әуе компаниясының Embraer-190 ұшағымен болған оқиғаны тергеу туралы алдын ала есебі белгілі болды. Құжатта көрсетілгендей, «Azerbaijan Airlines» ұшағы Грозный әуежайына екі рет қона алмағандықтан Бакуге оралуды ұйғарған.

    Ұшақ апатына байланысты 53 беттік есепте мыналар жазылған:

    Ұшаққа бірінші соққы сағат 05:13:31-де тіркелген.

    Ұшаққа екінші соққы сағат 05:13:56-да тіркеледі.

    Сағат 05:14:58-де ұшқыш жағдайды анықтау үшін бортсерікке хабарласып, не болғанын сұрайды.

    Ұшқыш:

    – Алло, не болды?

    Бортсерік:

    – Екі орындық жарылды, мен… жаныңызға бара алмаймын, өйткені жолаушылар тұрып кетті, мен оларды отырғызып жатырмын.

    «Azerbaijan Airlines» ұшағы Бакуге оралуды ұйғарып, артынша Ақтауға ұшқан.

    Ұшқыш әуелі Баку мен Махачкаланың ауа райын сұраған, сосын Бакуге бет алмақ болады.

    Кейін Ақтаудағы ауа райын сұрайды. Қолайлы болған соң, сағат 05:42:40-та Ақтауға ұшады.

    Ұшақ 06:02:47-де Ақтау әуежайымен байланысады.

    Сағат 06:27:58-де ұшақ жерге құлайды.

  • 15 жылға сотталған Руслан Ысқақов аштық жариялады

    15 жылға сотталған Руслан Ысқақов аштық жариялады

    ҰҚК-ның бесінші департаментінің басшысы Руслан Ысқақов аштық жариялады. Бұл туралы оның адвокаты Евгений Яворский:

    «Қоғамға жариялағым келіп тұрған ақпарат. Қаңтар оқиғасына байланысты сотталған ҰҚК 5-департаментінің бұрынғы басшысы Руслан Серікұлы Көкшетау қаласының түрмесіне түскеннен кейін, аштық жариялады. 28 қаңтардан 3 ақпанға дейін ол осы күйде отыр. Адамдар бұндайды жайдан-жай жарияламайды, бір себептер бар. Құзырлы органдардан Русланның не үшін бұндай қадам жасағанын білуін сұраймын.Оны бұндай жағдайға не итермелегенін білу – біз үшін маңызды», – деді адвокат.  

    Айта кетейік, 27 қаңтар күні Руслан Ысқақов Арман Жұмагелдиевке жаппай тәртіпсіздік ұйымдастыруын қолдағаны үшін айыпталып, 15 жылға бас бостандығынан айырылды.

  • Журналист Әсем Жәпішева қамаудан шықты

    Журналист Әсем Жәпішева қамаудан шықты

    Ол 20 қаңтар күні Алматыда Qaznews24 сатиралық паблигінің авторы Темірлан Еңсебекке қолдау білдіріп, «Сатира – қылмыс емес» деген жазуы бар плакат ұстап пикетке шыққан еді. Алайда журналист Жәпішеваны полиция алып кетіп, 15 күнге қамады. Журналистке «Бейбіт жиын өткізу тәртібін бұзды» (488-бап) деген айып тағылған. Жәпішева сот шешімімен келіспеді.

    Еске салайық, 17 қаңтар күні QazNews24 қоғамдық парақшасының әкімшісі Темірлан Еңсебек 2 айға қамалды.

  • Хоккейден Қазақстан ерлер құрамасы алғашқы жеңісіне қол жеткізді

    Хоккейден Қазақстан ерлер құрамасы алғашқы жеңісіне қол жеткізді

    Қытайдың Харбин қаласында IX қысқы Азия ойындарының ерлер арасында шайбалы хоккейден топтық кезеңінің алғашқы ойындары басталды. Қазақстан құрамасы А тобындағы алғашқы ойында Тайландпен кездесті.

    1-кезеңде, отандастарымыз ойын тізгінін бірден қолға алып, қарсылас қақпасына 4 гол соқты.

    2-кезеңде, Тайланд құрамасы қорғанысты күшейтіп, қазақстандықтар тек 2 гол ғана соқты.

    Соңғы кезеңде, Қазақстан құрамасы арадағы есепті ұлғайта түсті. Хоккейшілеріміз қарсылас қақпасына тағы 6 гол соғып, қорытынды есеп 12:0 болды.

    Әділ Бекетаев және Артем Королев 2 голдан соқса, Алихан Өмірбеков, Роман Старченко, Евгений Рымарев, Андрей Буяльский, Вячеслав Колесников және Руслан Оспанов мергендігімен көзге түсті.

    Айта кетейік, IX қысқы Азия ойындары 2025 жылдың 7-14 ақпан аралығында Қытай Халық Республикасы Хэйлунцзян провинциясының Харбин қаласында өтеді. Спортшылар 11 спорт түрі бойынша 64 медаль жиынтығын сарапқа салады.

  • Биыл Алматыда 10 базар жаңартылады

    Биыл Алматыда 10 базар жаңартылады

    Министрліктің Жол картасына сай Алматыдағы «Арлан», «Батыр», «Тұлпар», «Арыстан», «Жібек Жолы», «Азия», «Тау самалы», «Береке», «Сауда кент» және «Сарыарқа» базарларында жаңғырту жұмыстары жүргізіледі.

    Өткен аптада ҚР СИМ Сауда комитетінің төрағасы Айдар Әбілдабеков Алматыдағы 4 базарға барып, алдағы жаңғырту жұмыстарына дайындығын көріп қайтты. Базар иелері бұл жұмыстарды 2025 жылдың желтоқсанына дейін аяқтауы керек.

    «Базарларды жаңғырту – бұл тек қана бизнес өкілдеріне жағдай жасау емес, сатып алушылар үшін қолайлы орта құру. Дегенмен жергілікті әкімдікте құрылыс құжаттарына келісім беру әдетте созылып кетеді. Базар иелері көп ретте осы жағдайға шағымданады. Эскиз, жұмыс жобасы сияқты құжаттардың келісілуі ұзақ уақыт алатынын  күнделікті өмірде де көріп жүрміз. Базарларды жаңғырту жұмыстары уақыты аяқталуы үшін жергілікті әкімдіктерді кәсіпкерлермен дер кезінде бірлесе жұмыс істеуге шақырамыз»,  – деді Айдар Әбілдабеков.

    Алматыда  қазір 38 сауда базары бар. Оның 4-арнайы базар болса, қалған 34-і әмбебап базар. Сауда заңнамасына сай сауда базарлары өз аумағында  көлік тұрағымен қамтылған, сауда орындары санитарлық және өрт қауіпсіздік талаптарына сай, онлайн төлем жүргізу мүмкіндігі болуы шарт. Айта кетейік, 2025 жылдың соңына дейін жаңғырту жұмыстары жүргізілмеген базар иелері келер жылдың басынан бастап әкімшілік жауапкершілікке тартылады.

     

  • Астанада полиция қызметкері жаттығу залында көз жұмды

    Астанада полиция қызметкері жаттығу залында көз жұмды

    Астанадағы «Алатау» спорт кешенінде полицей қайтыс болды, деп хабарлайды қалалық полиция департаменті. Полиция мәліметінше, ер адам жаттығудан кейін залдың шығаберісінде өзін жайсыз сезініп, есінен танып құлаған.

    «Жедел жәрдем мамандары реанимациялық шаралар жасаған. Бірақ олар полицейдің өмірін құтқарып қала алмаған. Медициналық қорытындыға сәйкес, өлімнің себебі – миокард инфарктісі. Қызметкердің қайтыс болу фактісі бойынша сотқа дейінгі тергеп-тексеру басталды», – делінген хабарламада.

    Ішкі істер министрі Ержан Сәденов полицейдің отбасына көңіл айтты.

  • Алтынай Жорабаева: «Хан Шатырдың» күзетшісі суретке түсу үшін рұқсат қағаз талап етті»

    Алтынай Жорабаева: «Хан Шатырдың» күзетшісі суретке түсу үшін рұқсат қағаз талап етті»

    Қазақстандық танымал әнші елордадағы сауда орталықтарының бірінде оқырмандарымен суретке түсемін деп келеңсіз жайға тап болған. Оның ашуына тиген – күзетшінің әрекеті.

    «Хан Шатырдан» атып шықтық. Мені танып, менімен фотоға түскісі келген халық көп болды. Олармен әңгімелесіп, алтын сататынымды айтып тұрсам, күзетші келді. «Бұл жерде фотоға түсуге және түсіруге болмайды. Әкімшіліктен рұқсат қағазыңыз болуы керек» деді. Мен тыңдармандарыммен фотоға түсу үшін рұқсат қағаз алып жүруім керек екен. Бұл қайдан шыққан заң?! Ол жерде командамен клип түсіріп жатсам, талап етуге болады. Мен де түсінемін. Бір-екі минутта халық мені қоршап алды. Мен олармен фотоға түстім. Одан кейін алтын сататын бизнесімді таныстырдым. Арасында парақшасын білетіндерге рақмет ретінде тәтті ұсындым. Міне, бас аяғы бір-екі минут ғана аялдадым. Екі ортада күзетші келіп, салғыласып ұрысып тастады. Қатты ашуланып қалдым», – деді әнші.

  • Алматы мен Алатау қаласының арасында сутегімен жүретін тікұшақ-такси пайда болуы мүмкін

    Алматы мен Алатау қаласының арасында сутегімен жүретін тікұшақ-такси пайда болуы мүмкін

    Көлік министрі Марат Қарабаев Үкімет отырысынан кейін өткен баспасөз мәслихатында Қазақстанда қашан пилотсыз такси қызмет көрсете бастайтынын айтты.

    «Біз қазір мобильді жолаушы тасымалы дейтін жобаны көбірек талқылап жатырмыз. Былтыр жыл аяғында біз Оңтүстік Кореяға барған едік. Сол кезде осындай мәселені талқыладық. Әуежайдан Алатау қаласына дейін жолаушыларды тасымалдауға аэромобильдер пайдалану көзделіп отыр. Бұл өзі шу шығармайтын, сутегі тұтынатын, 5 адамға дейін жолаушы сиятын тікұшақ деуге болады. Қазір бұл бағытта Оңтүстік Корея мен АҚШ компаниялары табысты жұмыс істеп жатыр. Қазақстандық компаниялардың бірі осындай жобаны іске асыруға қызығушылық танытты», – деді ол.

    Министрдің айтуынша, аталған жоба әлі зерттеліп жатыр.

    «Бұл осы мәселені айтарлықтай терең зерттедік және әлі де пилоттық жоба ретінде іске асыру мәселелерін пысықтап жатырмыз. Бірінші сатысында Алматыдан Алатау қаласына дейін сынап көреміз. Бұл 2026 жылға қарай пилоттық негізде іске қосылуы мүмкін деп болжап отырмыз», – деді Марат Қарабаев.

  • Ақылы жолдардан түсетін кіріс 2026 жылы 100 млрд теңгеге жетуі мүмкін

    Ақылы жолдардан түсетін кіріс 2026 жылы 100 млрд теңгеге жетуі мүмкін

    Үкімет отырысында көлік министрі Марат Қарабаев ақылы жолдардан түсетін табыстың айтарлықтай өскені туралы баяндады.

    2024 жылы түсім сомасы 48 млрд теңгеге жетті. Биыл қосымша 4 мың шақырым ақылы учаскені іске қосу жоспарлануда, бұл кірісті 60 млрд теңгеге дейін ұлғайтуға мүмкіндік береді. Келесі жылы бұл көрсеткіш 100 млрд теңгеге дейін өсуі мүмкін.

    «Бұл ретте, осы ақылы жолдардан түскен қаражаттың бір бөлігін құрылыс жұмыстарына алынған қарыздардың пайыздық мөлшерлемелерді өтеуге жұмсау мәселесі қарастырылуда», – деп атап өтті министр.

    Бюджетке түсетін жүктемені азайту әрі өзін-өзі ақтау мақсатында реконструкциялау және жөндеу жұмыстары аяқталған учаскелерде «ақылы жол» мәртебесін кезең-кезеңімен енгізу жалғасуда. Қазіргі уақытта бүкіл еліміз бойынша ұзындығы 3,2 мың шақырым ақылы жол жүйесі жұмыс істейді.

    Сонымен қатар министр жол бойындағы қызмет көрсету нысандарының дамуын атап өтті. Бүгінде елімізде 1 446 жол бойы сервистік объектілері жұмыс істейді, оның 90%-ы ұлттық стандарт талаптарына сәйкес келеді. 2025 жылы бұл көрсеткішті 100%-ға дейін жеткізу, сондай-ақ 400-ден астам заманауи қызмет көрсету нысандарын салу үшін ірі инвесторларды тарту жоспарлануда.

    «2029 жылға дейін 60 бірлік кешенді объектілердің құрылысы жоспарланған, оның ішінде 10 бірлігі осы жылы жүзеге асырылады. Инвестиция көлемі 120 млрд теңге. Оларда жатын орын, TIR тұрағы және жанармай бекеттері қарастырылған. Жол бойы сервистік объектілерін дамытудың негізінде елімізде бірінші рет отандық қонақүйлер жүйесі және олардың франшизасы қалыптасатын болады. Бұл жол бойы объектілерінің тасымал процессімен қатар, автотуризмнің де дамуына септігін тигізеді», – деп атап өтті Марат Қарабаев.

  • Биыл елімізде 13 мың шақырым жол жөндеуден өтеді

    Биыл елімізде 13 мың шақырым жол жөндеуден өтеді

    ҚР Көлік министрі Марат Қарабаев Үкімет отырысында 2025 жылы жөндеу жұмысы 13 мың шақырым жолды қамтитыны жоспарланғанын айтты.

    «Оның 9,5 мың шақырымы қажетті қаржымен қамтамасыз етілген, қалған шақырымын қаржыландыру мәселесі пысықталуда. Жаңа жобалар бойынша құрылыс маусымы басталғанға дейін мердігерлерді анықтау үшін конкурстық рәсімдер өткізіледі. 2025 жылдың қорытындысы бойынша республикалық жолдардың нормативтік жағдайы 94%-ды, ал жергілікті жолдарда – 91%-ды құрайды.

    Өткен жылдары басталған ұзындығы 1,08 мың шақырым жобалардың: Қалбатау – Майқапшағай (405 км), Күрті – Қонаев (67 км), Қызылорда – Жезқазған (398 км) және Ұзынағаш – Отар (42 км) құрылысы жалғасуда. Сондай-ақ жалпы ұзындығы 1 045 шақырым бірінші техникалық санаттағы жаңа магистралдардың құрылысы басталады», – деді Көлік министрі Марат Қарабаев.

    Министр мердігерлерді таңдау кезінде отандық компанияларға немесе шетелдік әріптестердің қатысуымен консорциумға артықшылық берілетінін, бұл қазақстандық құрылыс секторының одан әрі тұрақты дамуына ықпал ететінін атап өтті.

    «вБұдан басқа, Президенттің тапсырмасы бойынша, 2029 жылға дейін 3 мың шақырым жолды бірінші және екінші санаттарға ауыстыра отырып, реконструкциялау жоспарланып отыр. Бұл аталған сала мен ел экономикасының дамуына жаңа серпін береді.

    Ағымдағы жөндеумен 6,6 мың шақырым қамтылады. Басты мақсат – халықтың әл-ауқатын жақсарту үшін өңіраралық және аудандық жолдарды қосу. Биыл Солтүстік Қазақстан, Ақмола және Абай облыстарында ауқымды жұмыстар жоспарланған», – деді ведомство басшысы.

    Жөндеу жүргізілмегеніне 30 жылдан 50 жылға дейін болған жолдар, Петропавл – Жезқазған (703 км), Қандыағаш – Шалқар (246 км), Жаңаөзен – Түрікменстан шекарасы (156 км), Қарағанды – Аягөз – Боғас (452 км) толық жөндеуден өтеді.