Sona.kz

Метка: Басты оқиғалар

  • Кәмелетке толмағандардың әрекеті үшін ата-аналарына әкімшілік хаттама толтырылды

    Кәмелетке толмағандардың әрекеті үшін ата-аналарына әкімшілік хаттама толтырылды

    Кәмелетке толмағандардың әрекеті үшін ата-аналарына әкімшілік хаттама толтырылды.

    Әлеуметтік желіде бірнеше баланың автокөлікке зақым келтіріп жатқан видеосы тарады. Жазбаны блогер Алишер Кашеп Instagram парақшасында жариялаған.

    Кадрларда үш баланың көліктің капотына шығып, алдыңғы әйнегін тепкілеп жатқан сәті түсірілген. Оқиға Астанадағы Қосшығұлұлы көшесіндегі аулалардың бірінде болған.

    Сондай-ақ осы аумақтағы бейнебақылау камералары көліктердің бүлінуінің өзге де деректерін тіркеген.

    Астана қалалық полиция департаментінің мәліметінше, бейнежазбадағы балалар анықталған.

    Олардың жасы әкімшілік жауапкершілікке тартуға жетпегендіктен, хаттамалар ата-аналарына қатысты толтырылған.

    Ата-аналарға балаларды тиісінше тәрбиелемегені үшін әкімшілік жауапкершілік жүктелген.

    Жиналған материалдар кәмелетке толмағандардың істері жөніндегі комиссияға жіберілді.

  • 600 доп, күш шоуы және болашақ чемпиондар: Қонаевта тарихи дода басталды

    600 доп, күш шоуы және болашақ чемпиондар: Қонаевта тарихи дода басталды

    Қонаев қаласында мектеп оқушылары арасында алғаш рет «Болашақ чемпиондар лигасы» атты спорт додасы бастау алды. Жас спортшыларды біріктірген бұл жарыс футбол, волейбол және баскетбол спорт түрлерін қамтып, алдағы екі ай бойы жалғасады.

    Жарыстың салтанатты ашылу рәсімі ерекше форматта өтті. Спортшылар шеруі, акробатикалық қойылымдар мен әсерлі шоу қатысушыларға көтеріңкі көңіл-күй сыйлады.

    Қонаев қаласының әкімі Асхат Бердіханов жас спортшыларға сәттілік тіледі.

    «Бұл жарыс – жай ғана бәсеке емес. Бұл – достықтың, табандылықтың және жеңіске деген жігердің алаңы. Бүгінгі алаңда жүрген әрбір жас спортшы – ертеңгі ел мақтанышы, болашақ чемпион. Қалада бұқаралық спортты дамытуға ерекше көңіл бөлініп келеді және мұндай жобалар жас буынға үлкен серпін береді», – деді қала әкімі.

    Шара барысында қала әкімдігі тарапынан жас спортшыларға қолдау ретінде 600 дана доп тарту етілді.

    Кештің шарықтау сәтінде көрермендер ерекше шоуға куә болды. Әскери қызметтегі қала тұрғыны Айдар Тезеков күш өнерін көрсетіп, шегені ағашқа қолмен қағып, гір тасының үстінде жаттығу жасап, көпшілікті таңғалдырды. Тұрғынға спортқа деген сүйіспеншілікті қалыптастыру жолындағы еңбегі үшін қала әкімінің Алғыс хаты табысталды.

    Салтанатты рәсім барысында «Болашақ чемпиондар лигасының» кубогі ретрокөлікпен сахнаға шығарылып, жарыс ресми түрде ашық деп жарияланды.

    Аталған дода жас спортшыларға өз мүмкіндігін көрсетуге, тәжірибе жинауға және үлкен спортқа қадам жасауға жол ашпақ.

  • Кеген ауданында республикалық маңызы бар автожолдың бір бөлігі опырылып қалды

    Кеген ауданында республикалық маңызы бар автожолдың бір бөлігі опырылып қалды

    2026 жылғы 3 сәуірде Кеген ауданында «Кеген — Нарынқол» республикалық маңызы бар автожолының 20-шақырымында жол төсемінің опырылуы орын алды. Алдын ала  мәлңмет бойына оқиғаға су өткізу құбырының  толып қалуы салдарынан топырақтың шектен тыс ылғалдануы  себеп болған.

    Кеген ауданы Төтенше жағдайлар бөлімі бастығының міндетін уақытша атқарушы, капитан Оспаевтың мәліметінше, апат салдарынан зардап шеккендер мен жарақаттанғандар жоқ. Қазіргі уақытта жергілікті атқарушы органдардың күшімен көлік қозғалысын қамтамасыз ету мақсатында айналма жол салу жұмыстары жүргізілуде. Жағдай құзырлы органдардың бақылауында.

  • Алматы полициясы қоғамдық тәртіпті бұзған шетелдік жасөспірімдерді елден шығару мәселесін қарастыруда

    Алматы полициясы қоғамдық тәртіпті бұзған шетелдік жасөспірімдерді елден шығару мәселесін қарастыруда

    Алматы қалалық Полиция департаменті қоғамдық орындарда агрессивті мінез-құлық көрсеткен кәмелетке толмағандар тобын анықтады. Тексеру барысында ұсталғандардың Тәжікстан Республикасының азаматтары екені белгілі болды. Қазіргі уақытта жасөспірімдер Кәмелетке толмағандарды бейімдеу орталығына орналастырылып, олармен тиісті профилактикалық жұмыстар жүргізілуде.

    Оқиғаға байланысты жасөспірімдердің заңды өкілдері бала тәрбиесіндегі міндеттерін тиісінше орындамағаны үшін әкімшілік жауапкершілікке тартылды. Ішкі істер органдары аталған тұлғаларды Қазақстан Республикасының аумағынан мәжбүрлі түрде шығару (выдворение) мәселесін қозғады. Материалдар Медеу аудандық Полиция басқармасының өндірісінде, барлық мән-жайлар анықталуда.

  • Гвардиялық гарнизонның рота командиріне қатысты қылмыстық іс сотқа жолданды

    Гвардиялық гарнизонның рота командиріне қатысты қылмыстық іс сотқа жолданды

    Қазақстан Республикасының Бас прокуратурасы Гвардиялық гарнизонның әскери бөлімі рота командиріне қатысты қызметке салғырт қарау дерегі бойынша қылмыстық істі тергеудің аяқталғанын хабарлады. Тергеу мәліметтеріне сәйкес, лауазымды тұлғаның жеке құрамның қызмет өткеруі мен қарумен жұмыс істеуін тиісінше бақыламауы ағымдағы жылдың қаңтар айында қатардағы жауынгер Е. Рүстемұлының қаза болуының бір себебі болған.

    Сонымен қатар, тергеу барысында командир тарапынан қаза тапқан сарбаздың қызметтестеріне қатысты билікті асыра пайдалану деректері анықталды. Қазіргі уақытта қажетті дәлелдемелер жинақталып, іс мәні бойынша қарау үшін сотқа жолданды. Бас әскери прокуратура 27 қаңтарда орын алған әскери қызметші өлімінің өзге де мән-жайларын анықтау бойынша тергеу амалдарын жалғастыруда. Тергеу барысы қадағалау органының ерекше бақылауында.

    Сотқа дейінгі тергеп-тексерудің өзге мәліметтері жария етуге жатпайды.

  • Астана полициясы Салық Зиманов көшесінде заңсыз жарыс ұйымдастырған жүргізушілерді жауапкершілікке тартты

    Астана полициясы Салық Зиманов көшесінде заңсыз жарыс ұйымдастырған жүргізушілерді жауапкершілікке тартты

    Құқық бұзушылардың арасында Skoda автокөлігін тізгіндеген 18 жастағы азамат, сондай-ақ Toyota Highlander маркалы көліктерін басқарған 33 жастағы ер адам мен кәмелетке толмаған жасөспірім болған.
    Аталған тұлғаларға қатысты апаттық жағдай туғызғаны үшін әкімшілік хаттамалар толтырылды.

    Кәмелетке толмаған жасөспірімнің заңды өкілі көлік құралын басқару құқығы жоқ тұлғаға бергені және бала тәрбиесіндегі міндеттерін тиісінше орындамағаны үшін әкімшілік жауапкершілікке тартылды. Барлық автокөліктер мамандандырылған коммуналдық тұраққа қойылды. Ведомство мәліметінше, жыл басынан бері елордада апаттық жағдай туғызғаны үшін 1800-ге жуық, ал маневр жасау ережелерін бұзғаны үшін 3 мыңға жуық жүргізуші жазаланған.

  • Ақтөбеде Harmony Rider Technology қаржы пирамидасын ұйымдастырушылар 6 жылға дейін бас бостандығынан айырылды

    Ақтөбеде Harmony Rider Technology қаржы пирамидасын ұйымдастырушылар 6 жылға дейін бас бостандығынан айырылды

    Тергеу амалдарын Ақтөбе облысы бойынша Қаржылық мониторинг агенттігінің департаменті жүргізді.

    Тергеу барысында 2024 жылы бір топ тұлға шетелде электросамокаттарды жалға берумен айналысатын халықаралық компания кейпінде қаржы пирамидасының қызметін ұйымдастырғаны анықталды. Салымшылардың табысы тек жаңа қатысушылардың қаражатын тарту есебінен қалыптасқан. Салымдар көлемі 350-ден 20 000 АҚШ долларына дейін болған. Қызметке заңды сипат беру үшін Ақтөбеде кеңсе жұмыс істеп, үгіт-насихат жұмыстары әлеуметтік желілер мен офлайн-презентациялар арқылы жүргізілген.
    Қаржы пирамидасына жалпы сомасы 197 млн теңгеден астам қаражат құйған 115 салымшы тартылған. Алынған табыс криптоәмияндар арқылы шығарылып, кейіннен конвертацияланған.

    Осы қаражатқа ұйымдастырушылар үш автокөлік сатып алған, олар сот шешімімен мемлекет пайдасына тәркіленді.

    Ұйымдастырушылар 6 жылға дейінгі мерзімге бас бостандығынан айыру жазасына кесілді. Сот үкімі заңды күшіне енді.

  • ҚР Жоғарғы соты: Жалға алушыларды мәжбүрлі түрде шығару тек сот тәртібімен жүзеге асырылады

    ҚР Жоғарғы соты: Жалға алушыларды мәжбүрлі түрде шығару тек сот тәртібімен жүзеге асырылады

    Қазақстан Республикасының Жоғарғы соты конституциялық жаңалықтар аясында азаматтарды тұрғын үйден шығару тәртібіне қатысты түсініктеме берді. Жоғарғы сот органының ұстанымына сәйкес, заңнама жылжымайтын мүліктің заңды иелерінің құқықтарына басымдық бере отырып, сонымен бірге азаматтарды соттың заңды күшіне енген шешімінсіз тұрғын үйден өз бетінше айырудан қорғауға кепілдік береді.

    Бұл норма ҚР Конституциясында бекітілген, сондай-ақ Азаматтық кодекспен (188-бап) және «Тұрғын үй қатынастары туралы» заңмен (8-бап) реттеледі. Тұрғын үйді кез келген мәжбүрлі босату, соның ішінде мемлекет мұқтажы үшін алу, кепілге қойылған мүлікті өндіріп алу немесе жалдау шартын бұзу жағдайларында сот тәртібі міндетті болып табылады. Процесс барысында сот тұлғаның тұрғын үйде болуына заңды негіздерінің бар-жоғын анықтайды. Сонымен қатар, меншік иесі мүлікке билік ету құқығын сақтайды және жалға алушы шарт талаптарын бұзған жағдайда оны бұзуға құқылы.

    2025 жылғы сот статистикасына сәйкес, үйден шығару туралы 2,7 мың істің тек 6%-ы (160 іс) меншік иелері мен жалға алушылар арасындағы дауларға қатысты болған.

  • Ақтауда 146 млн теңге бюджет қаражатын жымқырған бухгалтер 5 жылға бас бостандығынан айырылды

    Ақтауда 146 млн теңге бюджет қаражатын жымқырған бухгалтер 5 жылға бас бостандығынан айырылды

    Ақтау қалалық соты Маңғыстау облысы бойынша Қаржылық мониторинг агенттігінің департаменті тергеген аса ірі мөлшердегі алаяқтық туралы қылмыстық іс бойынша үкім шығарды. Тергеу барысында жергілікті бухгалтердің жүкті әйелдерді қолдауға арналған әлеуметтік төлемдерді заңсыз алудың қылмыстық схемасын ұйымдастырғаны анықталды.

    Қылмыстық жоспарды іске асыру үшін сотталушы әлеуметтік желілер арқылы жәрдемақы мөлшерін арттыру бойынша қызметтерін ұсынған. Ол туыстары мен таныстарының ЭЦП-сын пайдалана отырып, іс жүзінде шаруашылық қызметпен айналыспайтын жалған жеке кәсіпкерлерді (ЖК) тіркеген. Жалған еңбек шарттарын, жұмысқа қабылдау туралы бұйрықтарды және есеп айырысу ведомостарын дайындау арқылы заңды табыс көрінісі жасалған. Осы мәліметтер негізінде мемлекет жоғары мөлшерде төлемдер тағайындаған, содан кейін зейнетақы және әлеуметтік аударымдар кері қайтарылып отырған. Келтірілген шығынның жалпы сомасы 146 млн теңгені құрады.

    Қылмыстық жолмен алынған табысқа сотталушы пәтер сатып алған, ол тергеу кезінде бұғатталды. Сот шешімімен әйел мүлкі тәркіленіп, 5 жылға бас бостандығынан айырылды. Үкім заңды күшіне енді.

  • Атырау облысында полиция жолға шығып кеткен кәмелетке толмаған екі баланы қауіпсіз жерге шығарды

    Атырау облысында полиция жолға шығып кеткен кәмелетке толмаған екі баланы қауіпсіз жерге шығарды

    Атырау облысының полиция департаменті бейнебақылау камералары арқылы автокөлік жолында велосипедпен жүрген екі бүлдіршінді анықтады. Қауіпті жағдайды дер кезінде байқаған кезекші бөлім оқиға орнына жақын маңдағы патрульдік экипажды жіберді.

    Тәртіп сақшылары балаларды автожолдан қауіпсіз жерге шығарып, кейіннен оларды заңды өкілдеріне табыстады. Ата-аналармен балалардың қауіпсіздігін қамтамасыз ету және оларды қараусыз қалдырмау бойынша профилактикалық түсіндірме жұмыстары жүргізілді. Полиция департаменті ересектерді жол қозғалысы ережелерін қатаң сақтауға және балалардың жүріс-тұрысын бақылауда ұстауға шақырады.