Sona.kz

Метка: Басты жаңалықтар

  • Алматыда ​қалалық басқарма басшысының орынбасары пара алғаны үшін сотталды

    Алматыда ​қалалық басқарма басшысының орынбасары пара алғаны үшін сотталды

    Алматы қаласы Медеу аудандық соты қалалық коммуналдық инфрақұрылымды дамыту басқармасы басшысының орынбасары Н. Кажиннің үкімін жариялады, деп хабарлайды Сыбайлас жемқорлыққа қарсы іс-қимыл агенттігі.

    Ол аула аумақтарын санитарлық тазалау бойынша жұмыстарды мемлекеттік сатып алу шарттарын жасасуға жәрдемдесу сылтауымен 19,5 млн теңге сомасында жергілікті кәсіпкердің ақшалай қаражатын иемденгені үшін кінәлі деп танылды.

    «Кажинге мемлекеттік қызметте және мемлекеттік сектор субъектілерінде қызмет атқару құқығынан өмір бойына айыра отырып, 6 жылға бас бостандығынан айыру жазасы тағайындалды. Осы үкіммен мемлекет кірісіне айналатын жалпы сомасы 21 млн теңгеден астам екі автокөлік құралы түрінде мүлкі тәркіленді», – делінген агенттіктік таратқан хабарламасында.

    Сот актісі заңды күшіне енген жоқ.

  • Оқушылар уланған қытай снектерін сатуға тыйым салды

    Оқушылар уланған қытай снектерін сатуға тыйым салды

    Ақтөбе облысында мектеп оқушыларының жаппай улану фактісіне байланысты шығу тегі күмәнді Қытай тәттісі сатылымнан алынды. 

    Денсаулық сақтау министрлігінің cанитарлық-эпидемиологиялық бақылау комитеті Ақтөбе облысындағы мектеп оқушыларының шығу тегі күмәнді өнімдерден жаппай улану фактісі бойынша осы өнімдер сатылатын дүкендерге мониторинг жүргізген. Мониторинг барысында 1,5 мыңнан астам дүкен қамтылған.

    «Кеден одағының техникалық регламенттерін сақтау тұрғысынан зертханалық зерттеулер үшін шығу тегі күмәнді импорттық өнімдердің (снектер) 14 үлгісі сатып алынды. Зерттеу нәтижелері бойынша осындай өнімдердің құрамында дәм күшейткіштер (тағамдық қоспалар) бар екені анықталды: натрий глутаматы (Е621), натрий гуанилаты (Е627), натрий инозинаты (Е631), оларды өндірісте қолдану техникалық регламент талаптарында белгіленбеген. СЭБК атап өткендей, дәм күшейткіштері бар өнімдерді шамадан тыс тұтыну семіздікке әкеліп соқтырады, сонымен қатар аллергия, ас қорыту бұзылыстары, күйдіргі тудыруы мүмкін», деп хабарлады ДСМ.

    Еске салайық, бұған дейін мониторинг барысында тағамдарды таңбалауда өнімнің атауы, сандық құрамы, тағамдық және энергетикалық құндылығы, дайындалған күні мен жарамдылық мерзімі, сақтау шарттары, дайындаушының, импорттаушы ұйымның орналасқан жері, ГМО туралы мәліметтер жоқ екені анықталғанын хабарлаған едік. Ал Ақтөбе облысында осы тәттіден 23 оқушы уланып, ауруханаға түскен еді.

  • Қыз зорлаған 17 жасар жігітке үкім шықты

    Қыз зорлаған 17 жасар жігітке үкім шықты

    Түркістан облысында 14 жасар қызды зорлаған 17 жастағы жасөспірімге қатысты жаңа үкім шықты. Айыпталушы 7,5 жылға бас бостандығынан айырылды.

    #НеМолчиKZ қорының басшысы Дина Таңсәрі істің жай-жапсарын баяндады. Оның айтуынша, бірінші сатыдағы сот құқық бұзушыға қысқа мерзімге үкім шығарды, ал апелляциялық шағым жазаны бас бостандығын шектеуге ауыстырды.

    Бірақ Жоғарғы сот апелляциялық соттың шешімін бұзып, істі қайта жіберді.

    «Апелляциялық сот 14 жастағы қызды зорлаған жігітке қатысты шешімді қайта қарады. 17 жастағы жасөспірім қызды зорлап, өзін-өзі өлтіремін деп қорқытқан. Бұл іс 2023 жылдан бері жалғасып келеді. Біз барлық ақпарат пен дәйекті төрт күн бұрын жарияладық. Алғашында 2 жылға бас бостандығынан айырылса, кейін апелляциялық сот оны 2 жылға бас бостандығын шектеу жазасына кесті. Нәтижесінде 28 ақпанда сот барлық дәлелдемелерді, скриншоттарды, чаттарды, фотосуреттерді, қорғаушы мен айып тағушы тараптарының дәлелдерін назарға алды және ол оны 7,5 жылға бас бостандығынан айырды», – деді Таңсәрі.

    Еске салайық, жан түршігерлік қылмыс жайлы 2023 жылдың қазан айында белгілі болды. Жәбірленуші 9 рет зорлық көрген. Ол 17 жастағы жасөспірімнің пышақпен қорқытып, кәмелетке толмаған қызды онымен жыныстық қатынасқа түсуге мәжбүрлегенін хабарлады.

  • Нұрлан Нығматулиннің ағасына іздеу жарияланды

    Нұрлан Нығматулиннің ағасына іздеу жарияланды

    Мәжілістің бұрынғы спикері Нұрлан Нығматулиннің ағасы Арғын Нығматулинге іздеу жарияланғаны туралы хабарлама құқықтық статистика және арнайы есепке алу жөніндегі комитеттің ресми сайтында жарияланды.

     Арғын Нығматулинге бүгін іздеу салынды.

    «Туған күні: 28.06.1955, жынысы: еркек, Қазақстан Республикасының азаматы, Қазақ. Іздестіру ісі 03.03.2025 «Астана өңірде тіркелді. Іздестіруді жүргізетін орган: Қазақстан Республикасы Сыбайлас жемқорлыққа қарсы іс-қимыл агенттігі», – делінген сайтта.

    Арғын Нығматулин қарағандылық «Сарыарқа» хоккей клубының негізін қалаушылардың бірі ретінде аталады. 2018 жылы директор қызметінен кеткеннен кейін ол клубтың кеңесшісі болып қалды.

  • Алматыдағы №1 балалар үйі Қонаевқа көшірілмейтін болды

    Алматыдағы №1 балалар үйі Қонаевқа көшірілмейтін болды

    Бұған дейін Алматыдағы №1 балалар үйінің Қонаев қаласындағы әлі құрылысы бітпеген ғимаратқа көшетіні туралы ақпарат тараған еді. Мұны естіген тәрбиеленушілер де жылы орыннан кеткісі келмейтінін жеткізді.

    Алайда, шенеуніктер 1963 жылы салынған балалар үйінің ғимараты апатты жағдайда қалғанын, күрделі жөндеуге келмейтінін айтқан. Яғни, оның орнына Қонаев қаласынан жаңа ғимарат салынып жатқанын, оның 2025 жылдың жазына дейін аяқталатыны туралы уәде етілген. Сондай-ақ, балаларға абаттандырылған аумақ, жолдар, жарықтандыру және инженерлік желілер салып беру жағы да кепілдендірілген.

    Десе де, балалар үйінің тұрғындары мен олардың қорғаушылары бұл қадамды дұрыс емес деп санайды. Олардың пікірінше, «Қонаев қаласында жетім балаларға Алматыдағыдай оқу мен даму мүмкіндігі болмайды».  Сонымен қатар, бұл ғимаратқа түзеу колониялары жақын орналасқандықтан тағы да қосымша мәселе туындауы мүмкін екенін де жасырмайды.

    Айта кету керек. бұл жағдайға Аружан Саин бастаған қоғам белсенділері араласты. Ол Instagram парақшасында балалар үйіне барып, тәрбиеленушілермен кездесіп, пікір алмасқанын салды. Онда балалар ғимараттың ешқандай апаттық жағдайда емес екенін айтқан.

    Ал Алматы облысының білім басқармасы жаңа балалар үйінің құрылысы бекітілген жоспар бойынша жүргізіліп жатқанын хабарлады.

    «Учаскенің таңдауы бірқатар факторларға, соның ішінде санитарлық және экологиялық нормаларға сәйкес, сондай-ақ әлеуметтік инфрақұрылымды одан әрі дамыту мүмкіндігіне байланысты болды. Заречное ауылы Қонаев қаласынан 20 шақырым жерде орналасқан. Ауыл Алматы мен Қонаев қалаларының арасында орналасқан», – деп хабарлады ведомство.

    Құрылыс аяқталғаннан кейін балаларға қолайлы жағдай жасалады: абаттандырылған аумақ, асфальт жолдар, жарықтандыру және инженерлік желілер бәрі салынады.

    Сондай-ақ, Алматы облысы Білім басқармасы балалар үйінің жерін Әлия Назарбаева сияқты жеке тұлғаларға сату туралы қауесеттерді жоққа шығарды және балаларды қорлау фактілері расталмаған деп сендірді. Балалар үйіне арнайы келген Алматы облысы білім басқармасының басшысы Салтанат Беспаева:

    «Біз балалар үйі мен оның тәрбиеленушілеріне қатысты барлық мәселелерді бақылауда ұстаймыз. Жаңа ғимаратты қажетті құрал-жабдықтармен, көліктермен және оқу құралдарымен қамтамасыз ету ғана емес, балалардың өмір сүруіне жайлы және қауіпсіз жағдай жасау маңызды. Ал Алматыдан Қонаевқа қалай келіп-кетеміз деген қызметкерлер үшін сол жерде арнайы жатып істейтін бөлмелер қарастырылады», – деді Салтанат Беспаева.

    Сонымен, Алматыдағы №1 балалар үйі Қонаевқа көшірілмейтін болды. Бұл туралы №1 балалар үйінің тәрбиеленушілерімен және Алматы облысының әкімі Марат Сұлтанғазиевпен кездескен Бала құқықтары жөніндегі уәкіл Динара Зәкиева да хабарлады.

    Ол балалар үйінің тәрбиеленушілері мен Алматы облысының әкімімен өткен кездесудің қорытындысы бойынша келесі ақпаратпен бөлісті:

    – Баганашылдағы балалар үйінде тұрып жатқан балалар осы үйде қала береді;
    – Жаңа ғимарат Нүсіпбаев атындағы интернаттың балаларына беріледі (бұған дейін ол жерде жағдайдың өте нашар екенін және балаларға тиісті жағдай жасалмағанын жазған едім);
    – Жаңа ғимараттың бір корпусын Кәмелетке толмағандарды бейімдеу орталығына береді, ол жерге облыстың барлық ауданынан келген балалар қабылданады, осылайша оларды қалаға тасудың қажеті болмайды, – деді ол.

    Ал Алматы облысының әкімі Марат Сұлтанғазиев Алматы қаласындағы №1 балалар үйінің тәрбиеленушілерімен кездесу барысында: «Балалар Алматыда қалғысы келетіндерін айтты, өйткені жаңа ортаға бейімделу және әлеуметтік ортадан ажырау олардың психологиялық жағдайына кері әсер етуі мүмкін. Бұл фактор шешім қабылдауда басты назарға алынды. Сондықтан қалада білім алып жүрген тәрбиеленушілер өздеріне үйреншікті ортада оқуын жалғастырады, ал жаңадан қабылданатын балалар Қонаев қаласына орналастырылады», – деді облыс әкімі.

    Айта кетейік, 240 орынға есептелген жаңа балалар үйінің ауданы 4000 шаршы метр. Онда жайлы тұрғын бөлмелер, оқу сыныптары және демалыс аймақтары қарастырылған. Жақын маңда 900 орындық мектеп орналасқан, ал балаларды тасымалдау үшін арнайы автобус бөлінеді. Кешеннің ашылуы жаз айларына жоспарланған. Бұдан бөлек, жаңа ғимараттың бір бөлігі инфрақұрылымдық мәселелерге тап болған Нүсіпбаев атындағы интернатқа беріледі.

  • Қостанай облысында зират су астында қалды

    Қостанай облысында зират су астында қалды

    Қарасу ауданындағы айналма каналдағы су жағаға шығып, зиратты су басқан. Новоселовка ауылының тұрғындары күн жылығаннан кейін, өз үйлерін су басады деп қорқып отыр.

    Ауыл тұрғындары су деңгейінің көтеріліп жатқанынан қауіптеніп отыр. Ауылдағы зиратты су басқан. Оның айналысына қазылған шұңқырдың да көмегі болмапты. 14 шақырымдық канал қоқыспен бітеліп, мұз қатып қалған екен.

    «Олар не болатынын білмеді ме? Барлығы білді! Егер бұл зиратта туыстарының қабірлері болса, олар не сезінетінін көргім келеді. Жақында көптеген ескерткіштер орнатылды және олардың бағасы арзан емес. Бірақ бұл мәселе емес. Әзірге өлгендерге зиян тиді. Ал су ағынынан бір сәтте бүкіл елді мекенді су басуы мүмкін. Жауапты адамдар осы уақытқа дейін қайда болды? Неліктен жергілікті тұрғындар шу шығармайынша, ешкім қозғалмайды? Неліктен ешкім өз сөздері үшін жауап бермейді?», – дейді ауыл тұрғындары. 

    Төтенше жағдайлар департаменті жағдайды бақылауда ұстайтындықтарын айтып сендірді.

    «Қарасу ауданының Новоселовка ауылында температураның төмендеуіне байланысты су бұру каналында мұз пайда болды. Сондықтан су арнаның шетінен өте бастады. Су зират аумағына жетіп, оны ішінара су басқан. Қазірде судың таралуы тоқтады. Қазір канал тереңдетіліп, кеңейтілуде. Сондай-ақ суды Құндызды өзеніне өткізу үшін мұзды қопсыту жұмыстары жүргізілуде. Арнайы техниканың алты бірлігі жұмылдырылды», – деді Қостанай облысы ТЖД.

  • Жетісу облыстық білім басқармасы: «Мектеп директорының орнында қалу-қалмауын комиссия шешеді»

    Жетісу облыстық білім басқармасы: «Мектеп директорының орнында қалу-қалмауын комиссия шешеді»

    Талдықорғандағы Абай атындағы №1 орта мектеп-гимназиясы оқушыларының «ойыны» әлеуметтік желіге тарап кетіп, көпшілікті шошытқан еді. Онда бірнеше бала қатарласын жан-жақтан төмпештеп, дәретханаға кіргізіп бара жатқан көріністен бөлек «Сотталушыны кіргіземіз!» деген дауыс естіледі. Әрі қарай әлгі баланы дәрет алатын жерге отырғызып, екінші біреу шалбарының ауын ағытып жатқан жерінен бейнежазба үзілген.

    Бұл бейнежазбаны балалар Tik-Tok желісіне өздері жүктеген көрінеді.

    Бұл мәселеге орай жергілікті білім саласы мамандары барлық мектепте буллингтің алдын алу және психологиялық қолдау көрсету шаралары жүргізілетінін, тәртіптік бақылау күшейтілетінін атап өтсе, Жетісу облысының білім басқармасы жағдай ерекше бақылауға алынғанын және оқиға бойынша кешенді тексеру жүргізілетінін хабарлады.

    Талдықорған қаласы білім бөлімінің тәрбие жұмысы жөніндегі әдіскері Ұлжанат Жақұбаеваның айтуынша, оқушылар мен олардың ата-аналарына түсіндірме жұмысы жүргізілді. «Тараптардың бір-біріне ешқандай талабы жоқ. Ақпарат шешім қабылдау үшін Талдықорған қаласының полиция басқармасына берілді», – деп жауап берді.

    Ал бүгін оқушылардың ерсі ойынынан кейін бірнеше адамның жұмыстан кеткені белгілі болды. Оның айтуынша, балалардың ата-анасына айыппұл салынып, оқиғаға қатысы бар балалар есепке алынған.

    Талдықорған білім басқармасының басшысы Шынар Шәріпбаева: «9-сынып оқушылармен әңгіме жүргізілді, қазіргі таңда балалардың психологиялық жағдайы тұрақты. Дүйсенбіден бастап сынып жетекшісі, тәрбие ісі жөніндегі директордың орынбасары жұмыстан кетеді. Ал мектеп директорына қатаң сөгіс жарияланды», – деді.

    «Қаладағы №1 мектепте түсірілген әлеуметтік желіде таратылған жарияланымға байланысты мынаны хабарлаймын. Талдықорған қалалық ІІБ ата-анасына ҚПК-нің 127-бабына (ҚР ӘҚБтК) сәйкес айыппұл салды. Жетісу облысының білім басқармасы өкілдері мен Балалардың құқықтарын қорғау уәкілінің қатысуымен шұғыл жиын өтті», – деді Талдықорған білім басқармасының басшысы Шынар Шәріпбаева.

    Ал Талдықорған әкімдігінің баспасөз хатшысы Олжас Құрмашев: «Бұрын білім бөлімі қалаға қарайтын. 2022 жылдан бастап облыстық білім басқармасына бекітілді. Сол жақтан қаржыландырылады. Иә, аумағы қалада орналасқан. Өткізетін шараларына қатысамыз. Ал дәл осындай даулы мәселе болса, оған жауап бере алмаймыз. Бұл олардың ішкі мәселесі. Әкімдікке қараса, «Біз директорға осындай шара қолданатын едік» деп айтуға болады», – деп жауап берді.

    Алайда, бізді мазалаған жайт – осы оқиғадан кейін неге сынып жетекшісі, тәрбие ісі жөніндегі директордың орынбасары ғана жазаланып, директор ғана сөгіспен құтылуы тиіс?

    Бұл сауалды Жетісу облысы Білім басқармасы басшысының орынбасары Қайрат Саханұлы Қасымов мырзаға қойдық.

    «Сынып жетекшісінің негізгі жұмысы – мұғалім. Яғни, ол лауазымды міндеті – сынып жетекшілігінен босатылды. Ал екі тәрбие ісі жөніндегі орынбасары мен педагог-психолог өз еркімен жұмыстан кетті. Мектеп директоры Айгүл Қадырманқызына сөгіс берілді. Арнайы жұмыс тобы құрылды. Қазіргі кезде оның лауазымында, яғни орнында қалу-қалмауы туралы мәселе қарастырылып жатыр. Мектептегі тәрбие жұмысы, басқа да жайттар тексеріліп, соның қорытындысы бойынша шешім қабылданады», – деп жауап берді Жетісу облысы Білім басқармасы басшысының орынбасары Қайрат Саханұлы. 

  • Жасанды интеллект шенеуніктердің жұмысын жеңілдетуі мүмкін

    Жасанды интеллект шенеуніктердің жұмысын жеңілдетуі мүмкін

    Шенеуніктер атқаратын жұмыстың бір бөлігін болашақта жасанды интелект орындауы мүмкін. Бұл туралы Мәжіліс депутаты, AMANAT партиясы фракциясының мүшесі Екатерина Смышляева айтты.

    «Қараңыздар, қазір әлемде әртүрлі тәсіл бар. ЖИ-агенттері, олар белгілі бір деңгейде өз бетінше шешім қабылдай алады, сосын ассистенттер бар. Аталған жағдайда мемлекеттік аппарат жұмысының бір бөлігін, яғни күнделікті қайталанатын жұмысты жасанды интелект алмастыра алады. Осылайша бұдан да маңызды міндеттерге уақыт қалдырады», – деді Смышляева Мәжіліс кулуарында журналистер сұрағына жауап беріп.

    Алайда депутат ЖИ мемлекеттік аппарат штатына қалай әсер ететінін айта алмады.

    «Жұмыс орындары күрт қысқарады немесе ұлғаяды деп айта алмаймын. Күнде қайталанатын жұмыстан босататыны рас, өнімділік пен жылдамдықты арттырады, аналитика Big Data негізінде жасанды интеллект жүйесінде қалады», – деді депутат.

    Айта кетері, бүгін  Мәжілісте «Жасанды интеллект туралы» заң жобасы таныстырылды.

  • Маңғыстауда ер адамды пойыз қағып кетті

    Маңғыстауда ер адамды пойыз қағып кетті

    «2025 жылғы 28 ақпанда сағат 21:46-да Боранқұл станциясында пойыз бөгде адамды қағып кетті. Алдын ала мәлімет бойынша, ол қауіпсіздік ережелерін бұзып, теміржолды белгіленбеген жерден өтіп бара жатқан. Зардап шегуші Бейнеу станциясының аудандық ауруханасына жеткізілді. Оқиға туралы ақпарат Маңғыстау станциясының желілік полиция бөліміне берілді», – деп хабарлады «Қазақстан темір жолы» АҚ баспасөз қызметі (ҚТЖ).

    Бейнеу орталық аудандық ауруханасының мәліметінше, жедел жәрдем станциясына хабарлама 2025 жылғы 28 ақпанда сағат 21:30-да түскен. Келіп жеткен дәрігерлер зардап шегушіні емдеу мекемесіне жеткізді.

    1989 жылы туған ер адам 2-дәрежелі зақымданудан есеңгіреу және алкогольдік масаң күйде болған.

    Дәрігерлер екі аяғын кесіп, ота жасады. Жалпы жағдайы ауыр, гемодинамикасы тұрақты. Есін біледі. Жүрек-қантамыр жүйесі тұрақты. Реанимация бөлімінен травматология бөліміне ауыстырылды.

    Пойыздың қозғалыс басталған сәтінде адамды басып кету фактісі бойынша «Теміржол көлігіндегі қозғалыс қауіпсіздігі немесе пайдалану ережелерін бұзу, абайсызда адам денсаулығына ауыр немесе орташа ауыр зиян келтіру» бабы бойынша қылмыстық іс қозғалды, — деп хабарлады көлік департаментінің баспасөз қызметі.

    ҚТЖ темір жолдың қауіпті аймақ екенін еске салды.

  • Түркістан облысында терроризмді насихаттаған азаматтар сотталды

    Түркістан облысында терроризмді насихаттаған азаматтар сотталды

    Түркістан облысында терроризмді насихаттағаны және экстремистік ұйымның қызметіне қатысу арқылы басқару тәртібіне қарсы қылмыстық құқық бұзушылық жасаған  азаматтар сотталды. 

    Жамбыл облысының тұрғыны өткен жылдың қазан айында Telegram әлеуметтік желісінде «Ислам үшін» атты парақша ашып, онда заңсыз террористік құрылым ретінде танылған «Мұсылман бауырлар» және «Өзбекстан-исламдық қозғалысы» халықаралық террористік ұйымдарының бейне жазбаларын таратқан.

    Сол сияқты, Түркістан облысының тұрғыны желтоқсан айында «WhatsApp» және «Facebook» әлеуметтік желілері арқылы бірнеше рет «Хизб-ут-Тахрир» діни экстремистік ұйымының бейнежазбаларын таратқан. Мемлекеттік айыптаушылар сот барысында сотталушылардың кінәсін толық дәлелдеп, бас бостандығынан айыру жазасын тағайындауды сұраған. Терроризмді насихаттаған кінәлі тұлғаларға 7 жыл мерзімге бас бостандығынан айыру жазасы тағайындалып, жазаны қылмыстық-атқару жүйесінің қауіпсіздігі барынша жоғары мекемесінде өтеу тағайындалды.