Sona.kz

Метка: Басты жаңалықтар

  • Биыл Балқаш көліне 15,4 млрд текше метр су толтырылды

    Биыл Балқаш көліне 15,4 млрд текше метр су толтырылды

    Биыл Балқаш көліне өткен жылмен салыстырғанда 4 млрд текше метрге артық су жіберілген. 

    Жыл басынан бері Балқаш көліне 15,4 млрд текше метр су толтырылған. Оның ішінде тасқын кезінде 3,3 млрд текше метр су түскен. Жыл басынан бері Каспий теңізіне 17 млрд текше метр су келді. Алматы облысындағы Қапшағай су қоймасы соңғы 10 жылда алғаш рет 100%-ға толып, 18 млрд текше метрден астам су жинады.

    «Су тасқыны кезінде Батыс Қазақстан облысының Қамыс-Самар көлдеріне 80 млн текше метр су жіберілді. Ұлытау облысынан Қызылорда облысына 839 млн текше метр су келді. Осының арқасында, бақылау тарихында алғаш рет бұл су Сарысу өзені арқылы Қызылорда облысының көлдер жүйесіне жетті» делінген хабарламада.

    Министрлік су дипломатиясы, суды дәл бөлу және су үнемдеу технологияларын енгізу арқылы еліміздің оңтүстігінде су балансын жақсартуға қол жеткізді.

    «Біз әрқашан су ресурстарын бөлуде экономиканың қажеттіліктері мен су нысандарының экожүйесін қолдау арасындағы дұрыс тепе-теңдікті іздейміз. Биыл шаруалар мен басқа да су пайдаланушыларға кері әсерін тигізбестен үлкен және шағын су айдындарын сақтау және қалпына келтіру бойынша үлкен жұмыс атқарылды. Мысалы, өткен суару кезеңінде еліміздің шаруа қожалықтарына шамамен 11 млрд текше метр су берілді. Болашақта бұл бағыттағы жұмыс жақсарады. Оның ішінде суды сауатты басқару және тұтынуға басымдық беретін жаңа нормативтік-құқықтық база құру есебінен де нәтижеге жетуге ниеттіміз», — деді Су ресурстары және ирригация министрі Нұржан Нұржігітов.

  • Астанада өгей балаларын қорлаған әке 5 күнге қамалды

    Астанада өгей балаларын қорлаған әке 5 күнге қамалды

    Астанада өгей балаларымен жанжалдасқан әке 5 тәулікке қамалды. Сот өгей балаларына күн көрсетпеген әкеге отбасы қатынастарындағы ең қатал жазаны тағайындаған, ол 5 күнге қамалды.

    «Сот М-ның пәтерде бола отырып, отбасы мүшелерін қорлап, оларға құрметсіздік танытып,  бірге тұратын өгей балаларымен жанжалдасып, сол арқылы отбасы-тұрмыстық қатынастар аясында құқық бұзушылық жасағанын анықтады», — делінген хабарламада.

     

  • Семейде мұғалім шырша орнатуға көмектесіп, жансақтау бөліміне түсті

    Семейде мұғалім шырша орнатуға көмектесіп, жансақтау бөліміне түсті

    Дәрігерлердің айтуынша, науқастың жағдайы қазір тұрақты. Ол ауруханаға 21 желтоқсан сағат 10:30 шамасында жеткізілген.

    Науқасты ертең жалпы бейінді бөлімшеге ауыстыру жоспарлануда.

    – Ауруханаға түскенде есін біліп жатты. Оң жақтағы париетотемпоральды аймақтың субдуральды гематомасы диагнозы қойылды. Бүгінгі таңда науқастың жағдайы тұрақты ауыр, есін біледі. Неврологиялық тапшылық жоқ. Гемодинамика тұрақты, – дейді ведомство.

    Еске салайық, Семей қаласында орталық алаңда шырша тұрғызуға жәрдемдескен мұғалім Қуат Айтқалиев биіктен құлап, ауыр жарақат алды.

    Оқу-ағарту министрі Ғани Бейсембаев педагогты жұмысқа тартуды заң бұзушылық деп атады.

  • Алматыдағы атысқа байланысты полиция түсініктеме берді

    Алматыдағы атысқа байланысты полиция түсініктеме берді

    Оқиға 22 желтоқсан таңғы сағат 04:34 шамасында 28 панфиловшы-гвардияшылар атындағы саябақ маңында болған.

      Алматы қалалық Полиция департаменті атыс болғанын растамады.

    – Медеу аудандық Полиция басқармасы бұзақылық дерегі бойынша қылмыстық іс қозғады. Күдіктілер ұсталып, уақытша ұстау изоляторына қамалды. Басқа мән-жайлар анықталып жатыр, – делінген хабарламада.

  • Шерзат ісі: қоғам белсенділері Тоқаевқа үндеу жолдады

    Шерзат ісі: қоғам белсенділері Тоқаевқа үндеу жолдады

    Мәлімдемеге Қазақстанның әр өңірінен 78 адам қол қойған. Олардың барлығы Тоқаевтан Талғардағы қайғылы оқиғаға қатысты Бас прокуратура мен Ұлттық қауіпсіздік комитетінен арнайы тергеу жүргізуді сұрайды.

    Сонымен қатар, арызданушылар Ішкі істер министрлігі, прокуратура, сот-медициналық сараптама және басқа да органдардың барлық өкілдерін олардың қылмыспен және кәсіпкерлікпен ықтимал байланыстары туралы тергеу аяқталғанға дейін осы істен шеттетуді талап етуде.

    «Жәбірленушілерге  қысым көрсетуді тоқтатыңыз және олардың қорғанысы мен қауіпсіздігін қамтамасыз етіңіз. Қазақстанның Бала құқықтары туралы конвенция бойынша міндеттемелерін, соның ішінде қорғау, өмір сүру және Шерзат ісінің әділ тергеу құқығын толықтай бақылауға алыңыз» делінген хатта.

    Қайғылы оқиға 2 айдан астам уақыт бойы жәбірленушінің отбасына жүйелі қысым көрсетумен қатар жалғасып жатқаны атап өтілді.

    Қоғам белсенділері бұл «биліктің қылмыс пен бизнесті ажырата алатынына үлкен күмән тудыратынын» атап өтті.

  • Қазақстан өңірлерінде ауа райына байланысты ескерту жарияланды

    Қазақстан өңірлерінде ауа райына байланысты ескерту жарияланды

    Астанада 23 желтоқсанда кей уақытта жаяу бұрқасын соғады.

    Ақмола облысының солтүстігінде, шығысында, оңтүстігінде жаяу бұрқасын болады. Түнде және таңертең облыстың шығысында тұман түседі.

    Маңғыстау облысында оңтүстік-шығыстан жел соғады, облыстың батысында, солтүстігінде, орталығында екпіні 15-20 м/с.

    Ақтауда 23 желтоқсанда оңтүстік-шығыстан жел соғады, түнде және таңертең екпіні 15-20 м/с.

    23 желтоқсанда түнде және таңертең Ұлытау облысының шығысында тұман түседі.

    23 желтоқсанда түнде Қарағанды облысының батысында, солтүстігінде, шығысында, күндіз облыстың солтүстігінде, шығысында жаяу бұрқасын соғады. Түнде және таңертең облыстың оңтүстігінде, шығысында тұман түседі.

    Қарағандыда 23 желтоқсанда жаяу бұрқасын соғады.

    23 желтоқсанда Алматы облысының оңтүстігінде, таулы аудандарында кей уақытта тұман түседі. Шығыстан жел соғады, облыстың батысында кей уақытта екпіні 15-20 м/с-ке жетеді.

    Алматыда 23 желтоқсанда кей уақытта тұман түседі.

    Қонаевта 23 желтоқсанда шығыстан жел соғады, кей уақытта екпіні 15-20 м/с.

    23 желтоқсанда күндіз Батыс Қазақстан облыстың батысында көктайғақ болып, тұман түседі. Жел оңтүстік-шығыстан соғады, күндіз облыстың батысында, солтүстігінде екпіні 15-20 м/с.

    23 желтоқсанда күндіз Атырау облысының оңтүстік-батысында көктайғақ болады. Оңтүстік-шығыстан жел соғады, күндіз облыстың солтүстік-шығысында екпіні 15-20 м/с.

    23 желтоқсанда Павлодар облысының шығысында тұман түседі.

    Павлодарда 23 желтоқсанда түнде және таңертең тұман түседі.

    23 желтоқсанда Түркістан облысының оңтүстігінде, батысында, таулы және тау бөктерлі аудандарында тұман түседі. Облыстың тау асуларында жаяу бұрқасын соғады. Шығыстан жел соғады, облыстың тау асуларында күші 15-20 м/с.

    Шымкентте 23 желтоқсанда түнде және таңертең тұман түседі.

    Түркістанда 23 желтоқсанда түнде және таңертең тұман түседі.

    23 желтоқсанда түнде және таңертең Шығыс Қазақстан облысының шығысында, оңтүстігінде тұман түседі.

    23 желтоқсанда түнде және таңертең Абай облысының шығысында, оңтүстігінде тұман түседі.

    23 желтоқсанда түнде және таңертең Жетісу облысының таулы аудандарында тұман түседі. Шығыстан жел соғады, Алакөл көлдері аудандарында екпіні 15-20 м/с.

    23 желтоқсанда Қостанай облысының солтүстігінде жаяу бұрқасын соғып, көктайғақ болады. Түнде және таңертең облыстың батысында, оңтүстігінде тұман күтіледі.

    23 желтоқсанда күндіз Солтүстік Қазақстан облысында қар жауады. Облыстың оңтүстігінде, батысында жаяу бұрқасын соғып, көктайғақ болады. Түнде және таңертең облыстың шығысында тұман түседі.

    Петропавлда 23 желтоқсанда күндіз жаяу бұрқасын соғады.

     

     

  • «Бір-екі жылқы болса мейлі, 30-40 жылқының иесін тез табуға болатын еді». Жәбірленуші ресми органдарға арыз түсірді

    «Бір-екі жылқы болса мейлі, 30-40 жылқының иесін тез табуға болатын еді». Жәбірленуші ресми органдарға арыз түсірді

    Республикалық маңызы бар тасжолдарда өз бетімен жайылып жүрген, қараусыз қалған малдың кесірінен жол-көлік оқиғалары жиі тіркелуде. Сондай оқиғаның бірі Жетісу облысы, Ескелді ауданында тіркелді.

    Осы жылдың 8 желтоқсаны күні Әділ Бейсенбаев жол-көлік апатына ұшыраған. Оның айтуынша, Ескелді ауданы, Биғаш ауылына жақындаған тұста тас жолға аяқ астынан 30 шақты жылқы шығып қалған.

    «Сол күні қар жауған еді. Ескелді ауданы, Биғаш деген ауылға таяп қалғанда алдымнан 30 шақты жылқы жүгіріп шығады.

    Қашайын десем, екі жақта да ор. Аударылып кететінімді білдім. Жер қар, мұз болған соң қайта ақырын келе жатқанмын. Содан бірінші, екінші жылқыны соқтым. Ал қалғандары үріккеннен үстімнен таптап өте шықты. Жануарларға ештеңе болған жоқ. Дереу жол полиция қызметкерлерін шақырдым. Олар келіп хаттама толтырып, сызып, есептеді. Ал артынан жеткен учаскелік полиция жылқыларға құр қарап тұрып, ешқандай әрекет жасамай кетіп қалды. Шын мәнінде, олар жылқылардың құлағындағы енін, қандай да бір белгісін фотоға түсіріп, бейнетаспаға жазып алуы керек екен.

     

    Оны енді біліп жатырмыз. Аудан тұрғындары учаскелік полиция ауылдың мыңғырған жылқысы бар бай тұрғындарын біледі, содан кейін де өтірік таппай жүр деуі бекер емес. Негізі сол күні қар жауды. «Ізінен адасып қалдық» дейтіндей бір-екі жылқы болса түсінікті, бұл жерде 30-40 жылқыны тез-ақ тауып алатын еді», – дейді жәбірленуші.

    Бүгін көпбалалы әке Әділ Серікұлы істің алға жылжымай жатқанын айтып, бейнежолдау жасады. «Оқиғаның болғанына 12 күн өтсе де, ешқандай нәтиже жоқ. Жетісу облыстық полициясы хабарласқан сайын «Ертең табамыз» деумен келеді. Іс жүзінде аттың иесі кім екенін іздеп те жатқан жоқ.

    Ал егер жол апаты кезінде өзім өліп кетсем, не болар еді? Жағдай қазіргідей сол күйі қалар ма еді? Сондықтан Бас прокуратураға, ҚР Мемлекеттік қызмет істері агенттігі, Антикорға, жергілікті Ішкі істер департаментіне, облыстық прокуратураға арыз түсірдім. Егер олар көмектеспесе, менде полицияға деген сенім мүлдем қалмайды.

    Ал аудандағы тұрғындардың қандай малы бар екенін білмесе, учаскелік полцияның не керегі бар? Немесе білсе де, сол адамды жауып тұр. Сондықтан көлік жүргізушілері, жолда абай болыңыздар. Егер осындай жағдайға тап болсаңыз, жануардың белгісі мен енін қарап, түсіріп алу керек. Әйтпесе, бірдеңе дәлелдеу қиын болады», – деді жәбірленуші.

  • ҰҚК Кәрім Мәсімовтің қайда екенін айтты

    ҰҚК Кәрім Мәсімовтің қайда екенін айтты

    Мемлекетке опасыздық жасағаны үшін сотталған ҰҚК-нің бұрынғы басшысы Кәрім Мәсімов әлі де тергеу изоляторында отыр.

    Ұлттық қауіпсіздік комитеті CentralMediaNews редакциясының ресми сұрауына берген жауабында Кәрім Мәсімовтың Астанадағы ҰҚК тергеу изоляторында отырғанын хабарлаған.

    Оған қатысты екі сотқа дейінгі тергеу жүргізіліп жатыр. ҚР ҚК:

    ҰБТ 218-баптың 3-тармағы, 3-бөлігі бойынша: «Қылмыстық жолмен алынған ақша мен өзге де мүлікті заңдастыру»;

    4-бөлім, 366-бап: «аса ірі мөлшерде пара алу».

    Еске сала кетейік, 2023 жылдың сәуір айында Астанадағы сот Кәрім Мәсімовті мемлекетке опасыздық жасағаны, Қаңтар оқиғалары кезінде билікті күшпен басып алуға тырысқаны және өкілеттігін асыра пайдаланғаны үшін 18 жылға бас бостандығынан айырған еді.

  • Алматыда ер адам тұрғын үй кешеніне басып кіріп, екі адамға оқ атқан

    Алматыда ер адам тұрғын үй кешеніне басып кіріп, екі адамға оқ атқан

    Алматының Наурызбай ауданындағы тұрғын үй кешеніне қарулы адам басып кіріп, екі адамды атып кеткен. 

    Ол Наурызбай ауданындағы тұрғын үй кешенін тонамақ болған. Күдікті қылмыс орнынан қашып кеткен. Қазіргі таңда күдіктіні іздестіру үстінде.

    «Аталған факті бойынша Наурызбай аудандық ішкі істер бөлімі қылмыстық іс қозғады. Осы қылмысты ашуға бағытталған жедел-іздестіру шаралары кешені жүргізілуде», – деді Алматы қалалық ІІД баспасөз қызметі.

  • ШҚО-да жалған айғақ берген куәгер сотталып кетті

    ШҚО-да жалған айғақ берген куәгер сотталып кетті

    ШҚО-да жалған ақпарат берген куәгер 5 жылға сотталды. Бас көлік прокуратурасы сот процесі барысында куәлардың бірінің жалған айғақтар беру фактісін анықтады. Көлік прокурорлары Шығыс Қазақстан облысы бойынша Көліктік бақылау инспекциясының басшылығына қатысты сыбайлас жемқорлық туралы істі қараған.

    «Арнайы прокурорлар жүргізген тергеп-тексеру сот төрелігіне қарсы әрекет ету дерегін растады. Сот сотталушының кінәсін мойындау мен өкінуін ескеріп, 5 жылға шартты түрде бас бостандығынан айыру жазасын тағайындады», – делінген хабарламада.