Sona.kz

Метка: Басты жаңалықтар

  • Берік Имашевтің күйеубаласы Қазақстан футбол федерациясын басқарады

    Берік Имашевтің күйеубаласы Қазақстан футбол федерациясын басқарады

    Үміткерлер қатарында Марат Омаровтан басқа Ербол Қайыров, Алтай Даумов болды. Соңғы сәтте Давид Лория үміткерліктен өз еркімен бас тартқан болатын. Айта кетейік, Марат Омаровтың кандидатурасын Астана футбол федерациясынан ұсынды. Ол 34 дауыс жинап алға шыққан, Омаров қарсыластары Алтай Даумовты 2 дауысқа және Ербол Қайыров 1 дауысқа артта қалдырды.

    Сонымен қатар, Марат Омаров орталық сайлау комиссиясының бұрынғы төрағасы Берік Имашевтің күйеу баласы. Ал Имашев Дариға Назарбаеваның құдасы, сондай-ақ Имашев бессайыс федерациясының президенті.

    Марат Талғатұлы Омаров 1988 жылы туған. 2010 жылы «Болашақ» бағдарламасы бойынша британдық Йорк университетін «философия, саясаттану, экономика» мамандығы бойынша, 2011 жылы әлеуметтік ғылымдар магистрі дәрежесі беріле отырып, Лондон экономика және саяси ғылымдар мектебін (LSE) бітірді.

    Мансабы:

    2012-2014 жылдары – Экономикалық даму және сауда, кейіннен- Экономика және бюджеттік жоспарлау, Ұлттық экономика министрінің кеңесшісі.

    2014-2016 жылдары – ҚР Ұлттық экономика министрлігінің тарифтік және институционалдық саясатты қалыптастыру департаменті директорының орынбасары.

    2016-2017 жылдары – «Қазақтелеком» АҚ-ның басқарушы директоры.

    2017-2019 жылдары – «Технологиялық даму жөніндегі ұлттық агенттік» АҚ Басқарма төрағасы, трансформациядан кейін – «QazTech Ventures» АҚ Басқарма төрағасы («Бәйтерек «ҰБХ» АҚ құрылымына кіреді).

    2019 жылдан бастап 2020 жылғы қазанға дейін – «Бәйтерек «ҰБХ» АҚ басқарушы директоры – Басқарма мүшесі. «Қазақстанның тұрғын үй құрылыс жинақ банкі» АҚ, «Қазына Капитал Менеджмент» АҚ, «Қазақстанның Даму Банкі» АҚ Директорлар кеңесінің мүшесі.

    2020 жылғы қазаннан 2022 жылғы тамызға дейін – ҚР Бәсекелестікті қорғау және дамыту агенттігі төрағасының орынбасары лауазымына тағайындалды.

    2022 жылғы 16 тамызда ҚР Бәсекелестікті қорғау және дамыту агенттігінің төрағасы лауазымына тағайындалды.

  • Перизат Қайраттың анасы ұсталды

    Перизат Қайраттың анасы ұсталды

    Перизат Қайраттың анасы уақытша ұстау изоляторына қамалды. «Kozachkov offside» телеграм каналының жазуынша, оның анасы қайырымдылық қордан қаражат шығаруға көмектескен болуы мүмкін деген күдікке іліккен. 

    «Biz Birgemiz Qazaqstan» қорының басшысының қамауға алынуы жаңа деректермен толығуда. Енді іс бойынша Перизат Қайраттың анасы Ғайни Алашбаева да күдікті ретінде қарастырылып отыр.

    Дереккөз мәліметінше, Ғайни Алашбаева кеше ұсталып, изоляторға қамалған, ол да 1,7 млрд теңгені жымқыру ісі бойынша күдікке ілінді. Тергеу мәліметтері бойынша, Перизат Қайраттың анасы қайырымдылық қордан қаражат шығаруға көмектескен болуы мүмкін. Алдағы күндері тергеу соты бұлтартпау шарасын таңдау мәселесін шешеді.

    Естеріңізге сала кетейік, Перизат Қайрат 1,7 млрд теңгені жымқырды деген күдікке ілінген. Бұл қаржы Қазақстандағы көктемгі су тасқынынан зардап шеккендерге жиналған болатын. Сонымен қатар, оған Палестина тұрғындарына арналған гуманитарлық көмекті иемденді деген айып тағылуда.

  • Думан Мұхамедкәрімді Талдықорғаннан Қызылордаға әкетті

    Думан Мұхамедкәрімді Талдықорғаннан Қызылордаға әкетті

    Талдықорғандағы тергеу изоляторында жатқан журналист Думан Мұхамедкәрімді этаппен Қызылордаға әкетті. Ақпаратты оның адвокаты Ғалым Нұрпейісов айтты.

    – Иә, этаппен жіберді. Қай жаққа қазірге дейін жеткенін білмеймін. Ол бір аптадан кейін белгілі болады. Мен бұған дейін Думанды Заречныйға жіберу жөнінде өтініш білдірген едім. Бірақ біздің өтінішімізді орындаудан бас тартқан сыңайлы. Кеше кешке ол туралы хабарлама келді, – деді адвокат.

    Адвокаттың айтуынша, заң бойынша Думан Мұхамедкәрім өзі тіркелген өңірде жазасын өтеуі тиіс болған.

    Айта кету керек, Қонаев қалалық сотының үкімімен биыл тамызда журналист жеті жылға бас бостандығынан айырылды. Журналист үкім бойынша сонымен бірге, үш жыл қоғамдық-саяси жұмыспен айналыса алмайды. Оған “экстремизмді қаржыландырып, тыйым салынған ұйым жұмысына араласты» деп айып тағылған еді.

  • Ресейде ер адамдарға төрт әйел алуға дейін рұқсат берілді

    Ресейде ер адамдарға төрт әйел алуға дейін рұқсат берілді

    Ресей Мұсылмандары діни басқармасы (ДУМ) Ғұламалар кеңесі ер адам жұбайларына әділ және тең қарым-қатынас жасаған жағдайда төрт әйелге дейін діни неке қиюға рұқсат берді. Бұл туралы РИА басылымы хабарлайды.

    Мұндай шешім қабылданғаны туралы кеңес төрағасының орынбасары әрі мұсылмандар діни басқармасы төрағасының орынбасары, Мәскеу мүфтиі Ильдар Аляутдинов мәлімдеді.

    «Ер адамның бір уақытта екінші, үшінші, тіпті төртінші діни некеге тұру мүмкіндігі туралы шешім қабылданды. Әйелі денсаулығына байланысты бала көтере алмаса, бұл жағдайға рұқсат етіледі», — деді ол.

    Сонымен қатар, репродуктивті жастың аяқталуына байланысты бірнеше діни неке қиюға рұқсат етілген. Мұндайда әйелінің бала туғысы келмейтіні де ескеріледі, деп қосты Аляутдинов.

    Сол сияқты ол көп әйел алуға рұқсат етудің басты шарты күйеуінің әйелдеріне әділ және тең қарауы екенін баса айтты. Ал бұл әйелдеріне бірдей материалдық қолдау көрсету арқылы, яғни олардың әрқайсысына жеке баспана алып беруінен көрінетінін ерекше атап өтті. Егер бұл шарттар орындалмаса, ер адамның бірнеше әйел алуына рұқсат берілмейді.

    Сонымен қатар, ер адам басқа әйелге үйленетін ниеті туралы қазіргі жұбайына хабарлауы керек, деді ол. Бұған қоса, үйленген ер адам басқа діни некеге тұрғанда, ол әйелдің барлық баласын асырап алуға міндетті болады.

  • Соңғы бес жылда әйелдерге қатысты қылмыс саны екі есеге азайды – Үкімет

    Соңғы бес жылда әйелдерге қатысты қылмыс саны екі есеге азайды – Үкімет

    Елімізде тұрмыстық зорлық-зомбылықтың алдын алу және әйелдер құқығын қорғау шаралары күшейтілуде, деп хабарлайды Үкіметтің баспасөз қызметі.

    2024 жылы ішкі істер органдарына отбасындағы зорлық-зомбылық жағдайлары туралы 100 мыңға жуық хабарлама келіп түсті. ІІМ 72 мың шектейтін қорғаныс ұйғарымдарын берді.

    Елімізде зардап шеккен әйелдер мен балаларға көмек көрсететін 69 дағдарыс орталығы жұмыс істейді. Жыл басынан бері осындай орталықтарға 5,5 мың әйел жүгінді, оның 3,7 мыңы балалы әйел.

    «Жүйелі жұмыс қазірдің өзінде нәтиже беруде. Соңғы бес жылда әйелдерге қатысты қылмыстар саны екі есеге қысқарды, оның ішінде зорлық-зомбылық қылмыстары 37,9%-ға, кісі өлтіру – 49,3%-ға, ауыр дене жарақатын келтіру – 8,7%-ға азайған. Бұл зардап шеккендерді қорғауға және қолдауға бағытталған кешенді шаралардың тиімділігін айғақтайды», – делінген хабарламада.

  • Енді eGov mobile арқылы газға қосылуға өтініш беруге болады

    Енді eGov mobile арқылы газға қосылуға өтініш беруге болады

    Енді қазақстандықтар eGov mobile қосымшасы арқылы газға қосылуға онлайн өтініш бере алады.

    Қызмет QazaqGaz Aimaq АҚ-ның абоненттері үшін қолжетімді және жеке тұлғалар үшін тегін ұсынылады. Газға қосылуға арналған техникалық шарттар – бұл объектіні газ тарату жүйесіне қосу мүмкіндігін растайтын құжат. Қызметті объектінің иесі пайдалана алады. Ол үшін пайдаланушы қосымшада көрсетілген барлық міндетті толтырып, объектіге тіркелген құқығы туралы  мәліметтерді растау қажет, — деп жазылған компания таратқан хабарламада.

    Қызметті алу үшін пайдаланушы:

    • eGov mobile қосымшасында авторизациядан өтуі қажет және  «Қызметтер» бөліміне өтіп, «Жылжымайтын мүлік және ТКШ» – «Газ тарату желілеріне қосылуға техникалық шарттар беру» батырмасын басу керек;
    • Объектінің түрін көрсету және оны қосу үшін таңдау қажет;
    • Объектінің техникалық паспортын тіркеу керек;
    • Техникалық шарттың түрін, газбен жабдықтау жүйелеріне қосылу себебін және газдың талап етілетін шығынын көрсетуі шарт;
    • Газ жабдығының түрін таңдап, қосу, санын көрсетіп және «Жалғастыру» батырмасын басу керек;
    • Өтінімге Face ID/Touch ID арқылы қол қою керек.

    Өтінім дұрыс толтырылған жағдайда, қызмет көрсету нәтижесінде техникалық шарттар беріледі, оларды газ тарату ұйымы – QazaqGaz Aimaq АҚ ұсынады немесе негізделген бас тарту шешімі шығарылады.

    Қызмет көрсету мерзімі объектінің күрделілігіне байланысты: техникалық жағынан күрделі емес объектілер үшін 5 жұмыс күні, күрделі объектілер үшін 10 жұмыс күні.

    Жаңа функция Цифрлық даму, инновациялар және аэроғарыш өнеркәсібі министрлігінің Мемлекеттік көрсетілетін қызметтер комитеті, «Ұлттық ақпараттық технологиялар» АҚ, Энергетика министрлігі және QazaqGaz Aimaq АҚ-мен бірлесіп іске асырылды.

  • «Qirsabyn» авторлары ақша бопсалаған

    «Qirsabyn» авторлары ақша бопсалаған

    Ұлттық қауіпсіздік комитеті белгілі адамдардан ақша бопсалады деген күдікпен Qirsabyn жасырын телеграм-арнасының авторларын ұстады. 

    «Әр «таза» адамның кір сабыны бар, ал кір ешқашан таза болмайды»,– деп ұрандатқан Qirsabyn жасырын телеграм-арнасы белгілі адамдардан жағымсыз ақпаратты жарияламау үшін ақша бопсалады деген күдікке ілінген.

    Қылмыстық іс танымал тележүргізуші және инстаграм инфлюенсері құқық қорғау органдарына шағым түсіргеннен кейін қозғалды. Арна авторлары оның жеке өміріне қатысты мәліметті жарияламау үшін ақша талап еткен. Біздің деректер бойынша, ол қысым мен қорқытудан кейін 3 мың доллар төлеген, бірақ бұл әрекеттер тоқтамаған екен.

    Осыдан кейін жәбірленуші шағым жазған. Мессенджерлердегі хат алмасулар мен ақша аударымдары оның сөздерін растады. Анонимдерді табу қиын болмаған, олардың өзара хат алмасуларынан басқа да құрбандарға қатысты бопсалау фактілері анықталды. Құқық қорғау органдарының мәліметінше, анонимдер өздерін тым аңғал ұстап, ақша талаптарын ашық айтып, жазасыз қаламыз деп сенген сияқты.

    Анонимді Qirsabyn арнасының 110 мыңға жуық жазылушысы бар және ол тек жеке өмірге қатысты ақпараттар жариялайды. Басқаша айтқанда, арна жұлдыздар, инфлюенсерлер, тіпті қоғам қайраткерлері туралы жиі ойдан құрастырылған немесе анайы өсектерді жариялап келген. Соңғы үш жазба алматылық қоғам қайраткері Санжар Бокаевқа арналған.

  • Шерзаттың ағасы Тоқаевқа үндеу жолдады

    Шерзаттың ағасы Тоқаевқа үндеу жолдады

    Сот Талғарда кісі қолынан қаза болған Шерзат Полаттың әпкесін 15 күнге қамаған еді. Қаржаубай Нұрымовтың туысы Бақыт Реймова «жұртты митингіге шақырды» деп айыпталды. Бұған қоса, басқа елдің азаматы болғаны үшін Қазақстаннан депортацияланбақ. Осы жағдайдан кейін, Бақыт Реймовтың ұлы Мейірбек Бақытұлы Тоқаевқа үндеу жолдады. Жасөспірім анасының жалғыз асыраушысы екенін мәлімдеді.

    «Менің анамды сот 15 тәулікке қамады. Және Қазақстан аумағынан шығармақшы. Менің анам Реймова Бақыт менің жалғыз асыраушым. Мен кәмелет жасына толмаған баламын. 11-сынып оқимын», – деді Мейірбек Реймов.

    Бақыт Реймованың перзенті анасының Қазақстаннан басқа баратын жері жоқ екенін айтты.

    «Менің анамнан басқа ешкімім жоқ. Мені анамнан айырмауларыңызды сұраймын. Менің анамның Қазақстаннан басқа баратын жері жоқ. Біз қазақпыз. Егер сот анамды Қазақстан аумағынан шығаратын болса, мен анамды 5 жыл көре алмаймын», – деді ол.

    Жасөспірім Тоқаевқа үндеу жолдай отырып, бұл мәселеге өзі араласуын сұрады.

  • Астана тұрғыны баспаналы боламын деп алаяққа алданды

    Астана тұрғыны баспаналы боламын деп алаяққа алданды

    Polisia.kz мәліметінше, алаяқ мемлекеттік бағдарламамен тұрғын үй алуға жәрдем берем деп уәде беріп, кейін ақшаны алып ізін суытқан. Жәбірленуші алаяқтың сөзіне сеніп, көптен күткен баспанасына ие бола алмады. 2 миллион теңгеден астам соммаға алданып қалды.

    Кейін алданғанын түсінген елорда тұрғыны полиция қызметкерлерінің көмегіне жүгінді.  Жедел-іздестіру іс-шараларының барысында Байқоңыр ауданының криминалдық полиция бөлімінің қызметкерлері күдіктіні анықтады. Қаражатты алаяқтық жолмен иемденіп, материалдық шығын келтірген 35 жастағы әйел адам екені мәлім болды.

  • 3 облыста жол жабылды

    3 облыста жол жабылды

    Қазақстанда ауа райының бұзылуына байланысты 3 облыстағы жолдарда көлік қозғалысына шектеу қойылды.

    Алматы облысы: 

    • Биыл 20 желтоқсан сағат 07:00-де республикалық маңызы бар «Алма-Тау туристік орталығына кіру», (Тұздыбастау ауылы – Бесқайнар ауылы) жүк және қоғамдық көліктердің қозғалысына шектеу енгізілді;

    Жамбыл облысы:

    • Биыл 20 желтоқсан сағат 09:00-да республикалық маңызы бар «Алматы-Ташкент-Термез» автожолының 534-593 шақырым аралығында (Айша бибі ауылынан Түркістан облысының шекарасына дейін) көліктің барлық түрінің қозғалысына шектеу қойылды;

    Түркістан облысы:

    • Биыл 20 желтоқсанда сағат 09:00-да республикалық маңызы бар «Алматы-Ташкент-Термез» автожолының 593-663 шақырым аралығында (Жамбыл облысының шекарасынан – Қарабұлақ ауылына дейін) көліктің барлық түрінің қоғалысына шектеу қойылды.