Sona.kz

Метка: Басты жаңалықтар

  • Бекболат Тілеухан қарғаған ақын өмірден өтті

    Бекболат Тілеухан қарғаған ақын өмірден өтті

    Ақын Тоқтарәлі Таңжарық жазбасында: «Ақын досымыз Серік Боқан қаза болыпты. Мына өмірде ешбір ереже мен тыйымға бағынуға болмысы сай келмейтін жандар болады. Секең, Серік Боқан сондай жан еді. Ол бұл өмірдің қулық-сұмдығын үйрене алмай-ақ кетті. Басын тауға да, тасқа да ұрды. Ақыры, діннен марқадам тапты… бәлкім, таппады. Өзін көп іздеді. Өзін сыйлайтын ортаны көп іздеді. Жолы болмады. Үнемі тығырыққа тіреле берді. Өзі де менің алдымнан бір кетпелтек томар кетпейді деуші еді. Шынымен, тап-таза еді. Тез жараланғыш еді. Онысын білдірмейтін. Өзін дәлелдегісі келетін. Дәлелдей алмады. Мына қоғамда ондай бөлек мінез, өзге жаратылыс иесіне орын жоқ еді. Өзі де төгіліп: «Баяғы сол жылдар недеген ізгі едің?!» дегеніндей, ол тек Балалық Шағында ғана бақытты болған шығар. Жазда Алматыда әлдебір базардан кезігіп қап, телефон алмасып, хабарласып тұрып едік. Өлеңдерін сұрағам. Осы әлеуметтік желіде саған іздеу салайын дегем. Келіскен. Өлеңдерін жіберген. Әңгімелесейікші, тек әдебиет туралы деген. Менің бір өлеңімді қатты сүйіп оқығанын айтқан. Амал не, сол өлеңдері уатсаптың қуысында қалыпты. Көп өлеңі жоғалған шығар. Әй, сақтамады-ау… Қазірше бір өлеңін жариялап қояйын. Рухың шат болсын, досым!” , – деп жазды ол.

    Еске сала кетсек, оны кезінде экс-депутат Бекболат Тілеухан «қарғадым» деп, артынан «қарғысты қайтарып алдым» деген еді.

    Серік Боқан Facebook-тегі парақшасына Бекболат Тілеуханды пандемия кезінде халыққа көмектеспеді, оралмандарға қол ұшын созбады деген мағынада парақшасына сын жазба қалдырған. Артынан Бекболат Тілеуханның әлеуметтік желіде Серік Боқанға «Жаза бер!» деп қарғыс айтқан аудиосы тараған еді. Кейін Серік Боқан кешірім сұрап тағы пост жазды.

    Айта кетейік, ол «Жас қазақ үні» газетінде, «Үн» журналында қызмет атқарған. Біраз жыл бойы «Асыл арна» телеарнасында журналист болып еңбек еткен.

  • «Тұман, көктайғақ, жаңбыр»: Қазақстанның 14 өңірінде дауылды ескерту жарияланды

    «Тұман, көктайғақ, жаңбыр»: Қазақстанның 14 өңірінде дауылды ескерту жарияланды

    Синопиктер 18 қазанда Алматы мен Қазақстанның 14 облысында дауылды ескерту жариялады. Бұл туралы «Қазгидромет» РМК-нің баспасөз қызметі хабарлады.

    Түнде және таңертең Ұлытау облысының орталығында, шығысында тұман түседі деп күтіледі. Жезқазғанда да түнде және таңертең тұман болуы ықтимал.

    Түнде және таңертең Қарағанды облысының солтүстігінде, шығысында, оңтүстігінде тұман түседі деп күтіледі.

    Түнде Батыс Қазақстан облысының батысында, оңтүстігінде, күндіз басым бөлігінде найзағай ойнап, күн райы бұзылады деп болжанады. Түнде және таңертең облыстың батысында, солтүстігінде тұман түсуі ықтимал. Күндіз облыстың батысында, оңтүстігінде, солтүстігінде оңтүстік-шығыстан соққан желдің екпіні 15-20 м/с құрайды. Оралда күннің екінші жартысында найзағай ойнайды деп күтіледі. Түнде және таңертең тұман түседі. Жел оңтүстік-шығыстан соғады, күндізгі екпіні — 18 м/с.

    Түнде және таңертең Алматы облысының оңтүстігінде, тау етегіндегі, таулы аудандарында тұман түседі деп күтіледі.

    Алматыда түнде және таңертең тұман болады.

    Ақтөбе облысында оңтүстік-шығыстан, шығыстан жел соғады, күндіз облыстың орталығында, оңтүстігінде соққан желдің екпіні 15-18 м/с құрайды.

    Қызылорда облысының орталығында шаңды дауыл тұрады деп күтіледі. Жел шығыстан, солтүстік-шығыстан соғады, облыстың орталығында, солтүстігінде соққан желдің екпіні 15-20 м/с құрайды. Облыстың орталығында, солтүстігінде, батысында жоғары өрт қаупі сақталады. Қызылордада кей уақытта шаңды дауыл тұрады деп күтіледі. Шығыстан соққан желдің екпіні — 15 м/с.

    Түнде және таңертең Қостанай облысының солтүстігінде тұман болады деп күтіледі.

    Түнде Жетісу облысының солтүстік-шығысында, таулы аудандарында тұман түсіп, күндіз көктайғақ болады деп болжанады. Солтүстік-шығыстан жел соғады, Алакөл ауданында соққан жел екпіні 15-20 м/с, кей уақыттарда 23-28 м/с дейін жетеді. Талдықорғанда сынап бағаны түнде 2 градус суықты көрсетіп, үсік жүреді деп күтіледі.

    Күндіз Атырау облысының оңтүстігінде, шығысында аздап қатты жаңбыр жауады деп күтіледі. Түнде және таңертең облыстың батысында, оңтүстігінде тұман болады. Түнде облыстың оңтүстігінде, шығысында оңтүстік-шығыстан соққан желдің екпіні 15-20 м/с құрайды. Атырауда оңтүстік-шығыстан жел соғады, күндізгі екпіні — 15-20 м/с

    Абай облысының оңтүстігінде көктайғақ болады деп күтіледі. Түнде және таңертең облыстың солтүстігінде, шығысында тұман болады.

    Шығыс Қазақстан облысының солтүстігінде, шығысында, оңтүстігінде көктайғақ болады деп күтіледі. Түнде және таңертең облыстың солтүстігінде, шығысында тұман болады. Облыстың оңтүстік-шығысында батыстан, солтүстік-батыстан соққан желдің екпіні 15-18 м/с дейін жетеді.

    Түнде және таңертең Түркістан облысының таулы аудандарында тұман түседі деп күтіледі. Шығыстан жел соғады, облыстың солтүстігінде, таулы аудандарында соққан желдің екпіні 15-20 м/с дейін жетеді. Түнде облыстың солтүстігінде, таулы аудандарында сынап бағаны 2 градус суықты көрсетіп, үсік жүреді деп болжанады.

    Жамбыл облысының таулы аудандарында тұман болады деп күтіледі. Облыстың оңтүстік-батысында, солтүстік-шығысында, таулы аудандарында оңтүстік-шығыстан соққан желдің екпіні 15-20 м/с құрайды. Таразда түнде және таңертең тұман түседі деп күтіледі. Түнде сынап бағаны 1-3 градус суықты көрсетіп, үсік жүреді деп күтіледі.

  • Көксу аудандық ауруханасының медбикесі зейнеткерлер атынан несие алып, бостандықта жүр

    Көксу аудандық ауруханасының медбикесі зейнеткерлер атынан несие алып, бостандықта жүр

    Көксу аудандық орталық ауруханасының медбикесі Баян Садықова Жұмақанқызы науқастардың атына несие рәсімдеген. Алайда, бұл әрекет әшкере болған соң, медбикені бірден жұмыстан шығарып жіберген. Бір айта кетерлігі, ол бұған дейін де дәл осындай әрекеті үшін істі болып, қылмыстық жауапкершілікке тартылған болып шықты.

    Ең қызығы, медбике Баян Садықова зейнет жасындағы қарттарды тақырға отырғызып кеткен. Зардап шегушінің бірі: «Өзім ауырып, химия алып жүргем. Ауруханада бізге қараған медбикеге сеніп, алданып қалдық. Home bank-тен атымыздан несие алып, тығырыққа тіреп кетті. Біздің ЖСН нөмір, аты-жөніміз туралы толық мәлімет қолында болған соң, осылай істеп отыр. Бізге екі айдан кейін төлем туралы түбіртек келіп тұр. Алатын зейнетақым – 40 мың теңге. Оның көбі дәрі-дәрмекке кетеді. Банктен қайта-қайта хабарласып, маза бермейді. Ол аздай, картаны бұғаттап тастады. Зейнетақы алмағанымызға үш ай болды. Бұл хабарды естіп, аурумызға ауру жамап алдық», – дейді.

    Ал тағы бір алданған кісі: «Балпық би ауылындағы зейнеткерлер мен балаларға осы медбикені бөліп қойған. Алданған, опық жеген адамның бәрі – қарт мүгедектер. Мен де. Әрқайсымыздың үйімізге келіп, дәрігер тіркелмегендерді тексеруге жіберді.

    Сондықтан тегін дәрі алу үшін сізді суретке түсіріп, құжаттарыңызды алуым керек. Ауырып қалған жағдайда сіздерге өзім қараймын деп, аты-жөнін айтты. 2023 жылы екі рет, 2024 жылы тағы келді. Біз оның бұл әрекетін екі айдан кейін ғана біліп отырмыз. Менің атымнан 500 мың теңге несие рәсімдеген. Үстіне қосылғанымен 678 мың қайтаруым керек екен.

    Ол бұрын екі рет сотталған екен, осымен үшінші рет қылмыстық іске тартылды. Алданған бәрімізден жауап алынды. 6 қазақ күні сот шешімі шықты. Оны үйқамақта ғана болуын талап етті. Ол неге бостандықта жүруі керек? Неге қамауға алынбайды? Бізге осы сұрақ маңызды», – дейді зейнеткер.

    «Менің атымнан несиені 16 сәуірде алыпты. Тамыз айында құқық қорғау мекемесінен өкіл келіп, «Несие алдыңыз ба?» деп сұрады. «Онда сіздің және жұбайыңыздың атынан Баян Садықова 1 млн теңге несие рәсімдеген» деп тұр. Дереу бірге еріп, Home bank-ке баруымызды сұрады» десе, тағы бір қарт: «Атымнан 1 млн теңге рәсімдепті. 70-ке келгенше несие дегенге жолаған жоқпын. Ешбір құжатқа қол қойған жоқпыз. Бірақ суретке түсіріп алатын», – дейді келесі бір алданған қария.

    Қысқасы, алданып, несие қарызына батқан он шақты зейнеткер сот үкімімен де, Home bank шешімімен де келіспейді. Себебі, банк: «Біздің қызметкерлер жауапкершілік алмайды. Өз еріктеріңізбен суретке түсіп, құжат беріп, қол қойғансыздар» деген уәжді алға тартқан. Ол ол ма, сот Баян Садықованы үйқамаққа жіберіп және несие берешегін зейнеткерлердің өздері төлейтін болған.

    Сот шешімінде: «Жәбірленушілер Б.К.Терликбаеваның, Ғ.Жолаушыбайдың, Т.Раушанның, К.Жұмажанның, К.Кыдырбекованың, М.Қаташтың, М.Конкышевтің. К.Бахияның азаматтық талаптары қанағаттандырылсын. Сотталған Баян Садықова жәбірленушілер пайдасына келтірілген материалдық шығын өндірілсін. Садықоваға азаматтық талап қою бойынша ерікті түрде орындау мерзімі үкім заңды күшіне енген соң бір ай деп белгіленсін. Үкімде көрсетілген мерзім өткен соң сот актісі азаматтық талабы бөлігінде мәжбүрлі түрде орындалсын. Жәбірленушілерге өтемақы қорына, бірінші үкім бойынша өндірілген төлем есепке алына отырып, 10 АЕК мөлшерінде, яғни 36 920 теңге мәжбүрлі төлем өндірілсін» делінген.

    Алайда, Баян Садықоваға қатысты «ешқайда кетпеу және дұрыс мінез-құлық қолхаты» түріндегі бұлтартпау шарасы үкім заң күшіне енген кезінен жойылатыны айтылған. Демек, бұған дейін екі мәрте сотталып, бостандықта тайраңдап жүрген медбике үшінші рет те оңай құтылатын сияқты. Ал зейнетақысы дәрі-дәрмегінен аспайтын мүгедек қарттардың ендігі жағдайы не болмақ? Енді олар облыстық сотқа шағымдануға дайын.

  • Жылыту маусымы басталмай жатып бес адам көз жұмды

    Жылыту маусымы басталмай жатып бес адам көз жұмды

    Жылыту кезеңінде тұрғын үй секторында бес өрт болды. Облыстық төтенше жағдайлар департаменті бастығының орынбасары Қайрат Шаймарденовтің айтуынша, қайғылы оқиға Ақтоғай және Шарбақты аудандарында тіркелді. Көз жұмған азаматтар төсек орнында темекі тартып, салдарынан өмірмен қоштасты.

    Сонымен қатар, үш адам улы газдан уланып қайтыс болды. Өлімнің негізгі себебі – пешті пайдалану ережелерінің сақталмауы. Біз әр азаматқа өрт қауіпсіздігінің қарапайым ережелерін түсіндіруге тырысамыз. Олқылықтар анықталған жағдайда тек ескерту жасап, кеңес бере аламыз. Заңнама бойынша тұрғын үй секторында тексеріс жүргізу және жауапқа тарту шаралары қарастырылмаған. Сондықтан тұрғындардың жеке жауапкершілігіне ғана сүйенеміз. Рейдтік және түсіндіру жұмыстарын белсенді жүргіземіз, – дейді Қайрат Шаймарденов.

    Айта кетейік, жылыту маусымына дейін қауіпсіздік айлығы өткізілді. Профилактикалық шаралар нәтижесінде мамандар 16 мың жекеменшік баспана тұрғындарымен кездесу өткізіп, қауіпсіздік ережелерін түсіндірді. Сонымен қатар, мыңнан астам үйде 1 943 бұзушылық анықталды.

    Айлық қорытындысы бойынша департаменттің есебіне 1 200-ден астам тұрғын үй алынды. Нысандар әлеуметтік әлжуаз топтарға жататын азаматтарға тиесілі. Бұл үйлерде 3 600-ден астам азамат тұрады. Жалпы, қалалар мен аудардардағы жекеменшік үйлердің барлығын түсіндіру жұмыстарымен қамтуға тырысамыз. Дегенмен, олқылықтар қайталана береді. Мәселен, жылыту маусымы кезеңіне дейін пешті дайындау керек. Тазалап, қираған жері болған жағдайда жөндеу керек, – дейді өрт сөндірушілер.

  • Үкімет 12 жастан бастап қылмыстық жауапкершілікке тарту туралы ұсынысты қабылдамады

    Үкімет 12 жастан бастап қылмыстық жауапкершілікке тарту туралы ұсынысты қабылдамады

    Үкімет басшысы мәжіліс депутатының балаларды 12 жастан бастап қылмыстық жауапкершілікке тарту туралы ұсынысын қабылдамады. Олжас Бектеновтің пікірінше, бұл жаста балалар өз әрекетінің қоғамға қауіп төндіретінін толық түсінбейді. Бұл — балаларды қорғау мен тәрбиелеуге қатысты құқықтық және гуманистік көзқарастарға қайшы келеді, деді. Премьер-министрдің жауабында әлемдік тәжірибе бойынша Германия, Жапония, Ресей, Финляндия және Ұлыбританияда қылмыстық жауапкершілік 14-15 жастан басталады, деліген. Еске сала кетейік, Мәжіліс депутаты Магеррам Магеррамов кәмелет жасына толмағандар үшін қылмыстық жауапкершілікті 14-тен 12 жасқа дейін төмендетуді ұсынған еді. Бас прокуратураның мәліметінше, жыл басынан бері балалар қылмысы 4,1% өскен. Жыл басынан бері 1263 жағдай тіркелген. Бұл өткен жылдың осы кезеңімен салыстарғанда 50 фактіге көп.

  • 400 мыңға жуық азамат атаулы әлеуметтік көмек алды

    400 мыңға жуық азамат атаулы әлеуметтік көмек алды

    Елімізде 400 мыңға жуық адам атаулы әлеуметтік көмек алды. Биыл осы мақсатқа бюджеттен 56 миллиАрд теңгеге жуық қаржы қарастырылған. Бұл көмек түрі табысы ең төмен күнкөріс деңгейінің 70%-нан асПайтын отбасыларға беріледі. Атаулы әлеуметтік көмек алу үшін өтінішті тұрғылықты жері бойынша Мансап орталығына, әкімдікке барып немесе egov порталы арқылы беруге болады. Бүгінде атаулы әлеуметтік көмекПен бірге жұмыс та ұсынылады. Өз ісін ашуға ниеті бар отбасыларға грант беріліп, біліктілікті арттыру курстарына да жіберіледі. Мақсат — халықты кедейлік шегінен құтқарып, табысын арттыруға жәрдемдесу. Еске салайық, былтыр атаулы әлеуметтік көмек алушылардың ең көбі Түркістан облысында тіркелді. Екінші — Шымкентте, үшінші орында — Қызылорда облысы болды.
  • Қазақстанда 86 жаңа мектеп ашылды

    Қазақстанда 86 жаңа мектеп ашылды

    Оқу жылының басынан бері өңірлерде 130 мың оқушыға арналған 86 мектеп ашылды.

    Оқу-ағарту министрлігінің мәліметінше, мемлекет басшысының бастамасымен іске асырылып жатқан «Жайлы мектеп» ұлттық жобасы аясында 74,8 мың оқушыға арналған 27 мектеп, оның ішінде Астанада тоғыз мектеп ашылды.

    Жобада білім беру ортасының функционалдығы мен қауіпсіздігіне ерекше назар аударылған. Бастауыш және жоғары сынып оқушылары үшін бөлек блоктар қарастырылған. Талаптардың қатарында қазіргі заманғы техникалық құралдарды енгізу арқылы қауіпсіздік шараларын арттыру, ерекше білім беру қажеттіліктері бар балалар үшін кедергісіз орта құру және мектептерді заманауи пәндік кабинеттермен қамтамасыз ету бар, – делінген министрлік хабарламасында.

    Айта кетсек, «Жайлы мектеп» ұлттық жобасы аясында 2025 жылдың соңына дейін заманауи форматтағы 217 мектепті пайдалануға беру жоспарланып отыр.

    Білім беру инфрақұрылымын қолдау қоры арқылы 18 мектеп ашылды, тағы 41 мектеп республикалық және жергілікті бюджет қаражаты, сондай-ақ инвестициялар есебінен қолданысқа берілді.

  • Жетісуда әжетхана салуға бөлінген 75 млн теңге жымқырылды

    Жетісуда әжетхана салуға бөлінген 75 млн теңге жымқырылды

    Жетісу облысында Сарқан аудандық тұрғын үй коммуналдық шаруашылығы бөлімінің басшысы мен мердігер ұйымның директоры аса ірі көлемдегі бюджет қаражатын жымқырғаны үшін сотталды.

    Өңір прокуратурасының ақпаратынша, сотталғандар туристтік объектілердегі санитарлық-гигиеналық тораптарды орнатуға арналған 74,7 млн теңге бюджет қаражатын талан-таражға салған.

    «Прокурорлық тексеріс, объект іске қосылмағанын, ал бөлінген қаражат шығындалып кеткенін көрсетті. Сарқан ауданының прокуратурасымен сотқа дейінгі тергеп-тексеру басталып, іс сотқа дейін жеткізілді», — деді.

    Сот үкімімен аудандық тұрғын үй коммуналдық шаруашылығы бөлімінің басшысы мен мердігер ұйымның директоры түрлі мерзімдегі бас бостандығынан айыру жазаларына сотталды.

    Сот үкімі заңды күшіне енген жоқ.

  • Бишімбаевтың жазасын жеңілдетуге уәде берген әйел сотқа тартылды

    Бишімбаевтың жазасын жеңілдетуге уәде берген әйел сотқа тартылды

    Астанада Салтанат Нүкенованы өлтіргені үшін сотталған Қуандық Бишімбаевтың жазасын жеңілдету үшін 100 млн теңге сұраған әйелге қатысты сот процесі өтіп жатыр.

    Бұған дейін Антикор Бишімбаевтың «үкімін жеңілдету» сылтауымен 100 млн теңге жымқырды деген күдік бойынша астаналық әйелге қатысты сотқа дейінгі тергеу басталғанын хабарлады.

    Тергеу Қуандық Бишімбаевтың туыстарының өтініші бойынша жүргізілген.

    Іс сотқа қылмыстық кодекстің 190-бабы 4-бөлігі 2-тармағы – 24-бабы 3-бөлігі және 367-бабы 4-бөлігі – 28-бабы 4-бөлігі бойынша түскен.

    17 қазанда Людмила Грачеваның ісі бойынша жарыссөз басталды. Мемлекеттік айыптаушы оны 11 жылға бас бостандығынан айыруды сұрады.

    Бұған дейін Қуандық Бишібаевтың адвокаты Ерлан Ғазымжанов экс-министрдің отбасынан 100 млн теңге сұраған әйел туралы айтты. Адвокаттың айтуынша, әйелге 100 млн теңге жалған ақша берілген. Ол сол сәтте ұсталған.

  • Энергетика министрлігі: Саран қаласына жылу берілді

    Энергетика министрлігі: Саран қаласына жылу берілді

    Жылу көздері қажетті отынмен қамтамасыз етілген. Қаланың өндірістік нысандары өндірістік бағдарламаларға сәйкес жұмыс істейді. Бұл туралы Энергетика министрлігі хабарлады.

    Энергетика министрлігінің басшысы Алмасадам Сәтқалиев жергілікті қазандықтардың, орталық жылу көзі, жылу желілері мен әлеуметтік нысандардың жай-күйін аралап көрді, сондай-ақ жергілікті жедел штабтың отырысын өткізді.

    Кезектегі барлық жергілікті қазандықтар дайындалып, іске қосылды. Жылу толық көлемде беріледі. Біз барлық қазандықтардағы жылу беру температурасын қадағалап отырамыз. Қосымша қазандықтармен кеңейту қажет болған жерде жақын арада кеңейтілетін болады. Тұрғындар бұрын болған екі қазандық туралы сұрақ қойды, бұл үйлер басқа қазандықтарға қайта қосылды», — деді Қарағанды ​​облысының әкімі Ермағанбет Бөлекпаев.

    Арнайы комиссия жұмыс істейді, оның құрамына энергетикалық қадағалау өкілдері, облыс және басқа да басқарма басшылары, Төтенше жағдайлар департаменті кіреді. Орталық жылу көзіне құрал-жабдық беретін зауыттардан мамандар шақырылды.

    «Біз барлық жылу көздерін аралап шықтық және жылумен жабдықтау схемасын қалпына келтіру жұмыстарының барысына жеткілікті түрде егжей-тегжейлі талдау жасадық.Келесі шешім қабылданды: орталық жылу көзі іске қосылғанға дейін қаланы жылумен қамтуды жергілікті қазандықтар қамтамасыз етеді.Барлық әлеуметтік нысандар жылумен қамтамасыз етілген, барлық өндірістік нысандар өндірістік бағдарламаларға сәйкес жұмыс істейді», — деді Алмасадам Сәтқалиев.