Sona.kz

Метка: жымқыру

  • Көкшетауда Қопа көлінің жағалауын салу кезінде 170 млн теңге жымқыру дерегі бойынша үкім шықты

    Көкшетауда Қопа көлінің жағалауын салу кезінде 170 млн теңге жымқыру дерегі бойынша үкім шықты

    Көкшетау қалалық соты Қопа көлінің жағалауын салу жобасын іске асыру кезінде бюджет қаражатын жымқыруға қатысы бар үш тұлғаға қатысты үкім кесті.

    Сотталғандардың қатарында қалалық әкімдіктің Тұрғын үй-коммуналдық шаруашылық (ТҮКШ) бөлімінің бұрынғы басшысы, техникалық қадағалау өкілі және мердігер ұйымның жетекшісі бар.

    Ақмола облысының арнайы прокурорлары жүргізген тергеу барысында 2020 жылы айыпталушылардың 170 млн теңгеден астам қаражатты жымқырып, кейіннен оны заңдастырғаны анықталды. Сот сотталушыларды аса ірі көлемдегі алаяқтық, лауазымдық өкілеттіктерді асыра пайдалану және қылмыстық жолмен алынған мүлікті заңдастыру баптары бойынша кінәлі деп таныды.

    Сот шешімімен оларға сәйкесінше 5 жыл 8 ай, 6 жыл 8 ай және 9 жыл мерзімге бас бостандығынан айыру жазасы тағайындалды.

    Үкім қазіргі уақытта заңды күшіне енген жоқ.

  • Көкшетаудағы инженерлік желілер жыры: Қаржылық мониторинг агенттігі 160 миллион теңге ұрланғанын анықтады

    Көкшетаудағы инженерлік желілер жыры: Қаржылық мониторинг агенттігі 160 миллион теңге ұрланғанын анықтады

    Ақмола облысы бойынша Қаржылық мониторинг агенттігінің департаменті Көкшетау қаласындағы инженерлік желілер мен абаттандыру нысандарының құрылысына бөлінген бюджет қаражатын жымқыру фактісі бойынша ауқымды тергеу жүргізуде. Мәселе 2020 жылы Көкшетау қалалық құрылыс бөлімі мен «TAU PROJEKT» және «СЭМ-СтройЭнергоМонтаж» ЖШС арасында жасалған келісімшарттарға қатысты болып отыр.

    Тергеу мәліметтері бойынша, мердігер ұйымдардың бенефициары орындалмаған немесе ішінара ғана атқарылған жұмыстар туралы жалған мәліметтерді қабылдау құжаттарына енгізу арқылы жұмыс көлемін асыра көрсетуді ұйымдастырған. Іс жүзінде су бұру жүйесінің негізін қалау, арық блоктарын орнату және кәріздік-сорғы станциясын жеткізу сияқты маңызды жұмыстар мүлдем атқарылмаған.

    Осы заңсыздықтарға қарамастан, Көкшетау қалалық құрылыс бөлімінің басшысы жұмыстардың жобалық шешімдерге сәйкес келмейтінін біле тұра, жалған актілерге қол қойып, қаржыландыруды тоқтатудың орнына бюджет ақшасын мердігерге аударып отырған. Кейіннен бұл қаражатты заңдастыру мақсатында «MAZHERUS» және «Tamila Invest» секілді бақылаудағы кәсіпорындар арқылы қайта бөлінген. Мемлекетке келтірілген шығын көлемі 160 миллион теңгеден асып жығылды. Қазіргі уақытта сот санкциясымен күдіктілердің 10 автокөлігі, 3 жер учаскесі мен пәтері қамауға алынды. Күдіктілерге қатысты күзетпен ұстау және үйқамақ түріндегі бұлтартпау шаралары таңдалды.

    Тергеу жалғасуда, ал өзге ақпарат жария етуге жатпайды.

  • Көкшетауда 152 млн теңге субсидия жымқыру ісі бойынша үкім шықты

    Көкшетауда 152 млн теңге субсидия жымқыру ісі бойынша үкім шықты

    Көкшетау қаласында агроөнеркәсіп кешеніне бөлінген мемлекеттік субсидияларды жымқыру ісі бойынша үкім шығарылды. Тергеуді Қаржылық мониторинг агенттігінің Ақмола облысы бойынша департаменті жүргізді, деп хабарлайды Sona.kz afm_rk-ға сілтеме жасап.

    Тергеу мәліметінше, екі жыл бойы «МолПродЖаркаин» СПК директоры Ефимкина А.С. және «Рассвет» шаруа қожалығының басшысы Маслов А.В. сүт және оны терең өңдеу өнімдерінің өндірісін арзандатуға арналған субсидияларды заңсыз алған.

    «Рассвет» шаруа қожалығында мәлімделген көлемде сүт өндіруге қажетті мал басы болмағаны анықталды. Соған қарамастан электрондық шот-фактуралар ақпараттық жүйесінде 3 млн килограмнан астам шикі сүтті жеткізу туралы жалған құжаттар рәсімделген.

    Осы құжаттардың негізінде сүтті сары май мен қатты ірімшікке өңдеу жөнінде есептілік жасалған. Уәкілетті орган өтінімдерді мақұлдағаннан кейін қаражат кәсіпорынның есепшотына аударылған.

    Мемлекетке келтірілген жалпы шығын 152 млн теңгені құрады. Сонымен қатар алынған субсидиялардың бір бөлігі Ефимкинаның туысының депозиттік шотына аударылған. Кейін бұл қаражатқа жалға берілген мобильді ғимарат сатып алынған.

    Тергеу барысында 6 жер учаскесіне, 4 пәтерге, 11 автокөлікке, мобильді ғимаратқа және өндірістік нысанға тыйым салынды. Сот үкімімен Маслов А.В. мен Ефимкина А.С. 6 жыл 4 айға бас бостандығынан айырылды. Мобильді ғимарат мемлекет кірісіне тәркіленді. Өзге мүлікке салынған тыйым азаматтық талап толық орындалғанға дейін сақталады. Үкім заңды күшіне енді.

  • Маңғыстауда денсаулық сақтау саласында 600 млн теңгеден астам қаржы жымқырылған

    Маңғыстауда денсаулық сақтау саласында 600 млн теңгеден астам қаржы жымқырылған

    Маңғыстау облысының прокуратурасы өңірдегі медициналық ұйымдардың қызметінде жүйелі заңбұзушылықтарды анықтады, деп хабарлайды Sona.kz ҚР Бас прокуратурасына сілтеме жасап.

    Тексеру барысында денсаулық сақтау субъектілерінің біліктілік талаптарына сәйкес келмеуі, жалған медициналық қызметтер көрсету, сондай-ақ сыбайлас жемқорлық сипатындағы құқықбұзушылықтар тіркелген.

    Атап айтқанда, бір медициналық ұйымды тексеру кезінде 600 млн теңгеден астам бюджет қаражатын жымқыру дерегі анықталды.

    Қаражат алушылардың банк реквизиттерін ауыстыру арқылы заңсыз шығарылып, аффилирленген шоттарға аударылғаны белгілі болды.

    Сонымен қатар көрсетілмеген қызметтерге ақы төлеу, жеткізілмеген дәрілік заттар мен медициналық бұйымдар үшін қаражат аудару фактілері тіркелген.

    Аталған заңбұзушылықтар бойынша облыс прокуратурасы досудебтік тергеп-тексерулерді бастады.

    Тергеу арнайы прокурорлармен жүргізіліп жатыр.

    Құзырлы органдар тергеу нәтижесі бойынша тиісті құқықтық баға беретін болады.

  • Шымкентте М.Әуезов атындағы университетте бюджет қаражатын жымқыру ісі сотқа жолданды

    Шымкентте М.Әуезов атындағы университетте бюджет қаражатын жымқыру ісі сотқа жолданды

    Шымкент қаласы бойынша Қаржылық мониторинг агенттігінің департаменті М.Әуезов атындағы Оңтүстік Қазақстан университетінде бюджет қаражатын жымқыру дерегі бойынша сотқа дейінгі тергеп-тексеруді аяқтады, деп хабарлайды Sona.kz.

    Агенттік мәліметінше, күдіктілер қатарында университеттің бұрынғы бірінші проректоры, қаржы және әкімшілік департаменттерінің директорлары, өндірістік-техникалық бөлім қоймасының меңгерушісі, сондай-ақ мердігер ұйымдардың басшылары бар.

    Тергеу барысында күдіктілер мемлекеттік сатып алу бойынша жалған келісімшарттар жасағаны анықталған. Бұл келісімдер аясында тауарлар іс жүзінде жеткізілмеген немесе нарықтық бағадан бірнеше есе қымбат бағада сатып алынған. Аударылған қаражат аффилирленген жеке кәсіпкерлер мен коммерциялық ұйымдардың шоттарына түсіп, кейін қолма-қол ақшаға айналдырылып, қатысушылар арасында бөлінген.

    АФМ келтірген дерекке сәйкес, осы схема арқылы университет басшылығы құны 20 млн теңге болатын бір кресло сатып алған, ал оның нарықтағы бағасы 200 мың теңгеден аспайды.

    Нақты жеткізілімдердің болмағанын жасыру мақсатында күдіктілер тозған тауарлы-материалдық құндылықтарды балансынан формалды түрде есептен шығарып, оларды ары қарай пайдалана берген. Ал олардың орнына келуі тиіс жаңа тауарлар іс жүзінде жеткізілмеген.

    Аталған заңсыз әрекеттер салдарынан мемлекетке 321 млн теңге көлемінде залал келтірілген. Тергеу барысында күдіктілер 264 млн теңгені ерікті түрде өтеген.

    Сот санкциясымен күдіктілердің мүлкіне  төрт тұрғын үйге, бір автокөлікке және банктік шоттардағы 40 млн теңге көлеміндегі қаражатқа тыйым салынды.

    Қылмыстық іс сотқа жолданды. ҚР ҚПК-нің 201-бабына сәйкес өзге ақпарат жария етуге жатпайды.

  • Өскеменде көшені жарықтандыру жобасы бойынша 320 млн теңге жымқыру ісіне үкім шықты

    Өскеменде көшені жарықтандыру жобасы бойынша 320 млн теңге жымқыру ісіне үкім шықты

    Өскемен қаласында Шығыс Қазақстан облысының «Мемлекеттік-жекешелік әріптестік өңірлік орталығы» АҚ-ның бұрынғы басшысы Батырбаев Д.Б. мен өзге де тұлғаларға қатысты қылмыстық іс бойынша айыптау үкімі шығарылды. Сот оларды бюджет қаражатын жымқыру, кәсіпкерлік қызметке заңсыз қатысу және қылмыстық жолмен алынған табысты заңдастыру фактілері бойынша кінәлі деп таныды, деп хабарлайды Sona.kz afm_rk-ға сілтеме жасап.

    Сот материалдарына сәйкес, 2019 жылы Өскемен және Семей қалаларында «Көше жарығы жүйелерін жаңғырту» жобасы іске асырылған. Аталған жоба ескі жарық шамдарын энергия үнемдейтін жарықдиодты шамдарға ауыстыруды көздеген және электр энергиясын үнемдеу мен жарық сапасын арттыру мақсатында жүзеге асырылған.

    Алайда тергеу барысында жоба аясында жабдықтар мен атқарылған жұмыстардың құны негізсіз түрде арттырылғаны анықталды. Мемлекетке келтірілген жалпы шығын көлемі 320 миллион теңгені құрады.

    Сонымен қатар, қылмыстық жолмен алынған кірістерді заңдастыру мақсатында акционерлік қоғамның бұрынғы басшысы сенімді тұлғаның атына жауапкершілігі шектеулі серіктестік тіркеген. Аталған компания жалған шарттар арқылы ақшаны қолма-қол айналдыру үшін қосалқы мердігер ретінде пайдаланылған.

    Сот үкімімен Батырбаев Д.Б., Халитов Ю.Г. және Папышев Н.Т. 7 жыл мерзімге бас бостандығынан айырылды. Сондай-ақ келтірілген залалды өндіру туралы азаматтық талап қанағаттандырылды.

    Қылмыстық табысқа сатып алынған мүлік, оның ішінде тұрғын үйі бар жер учаскесі мен автокөтергіш техника мемлекет кірісіне тәркіленді.

    Үкім заңды күшіне енді.

  • 110 млн теңгелік жымқыру: Авиажөндеу зауытының бұрынғы басшысы сотқа беріледі

    110 млн теңгелік жымқыру: Авиажөндеу зауытының бұрынғы басшысы сотқа беріледі

    Қаржы мониторингі агенттігінің Ақтөбе облысы бойынша департаменті «Авиажөндеу зауыты №406 ГА» АҚ-ның бұрынғы басшысына қатысты қомақты қаржыны жымқыру дерегі бойынша тергеуді аяқтады. Тергеу деректеріне сәйкес, ол әуе кемелерін жөндеуге арналған тауарлық-материалдық қорларды заңсыз есептен шығару тетігін жүйелі түрде қолданған, деп хабарлайды Sona.kz afm_rk-ға сілтеме жасап.

    Күдікті қызметтік өкілеттігін пайдаланып, МИ-2 тікұшақтарына, АН-2 әуе кемелеріне және авиациялық қозғалтқыштарға арналған қосалқы бөлшектер мен агрегаттарды жалған сатып алу схемасын құрған. Бұл сатып алулар оның бақылауындағы компаниялар арқылы жүргізілгенімен, бөлшектер іс жүзінде зауытқа түспеген.

    Зауыттың ішкі құжаттарында бөлшектер қоймадан берілген және күрделі жөндеу кезінде авиациялық техникаға орнатылған деп көрсетілген. Алайда тексеріс барысында бұл ақпараттың шындыққа жанаспайтыны, бөлшектердің еш жерде қолданылмағаны белгілі болды.

    Осыдан кейін бөлшектердің «жұмсалғанын» формалды түрде растайтын есептен шығару актілері бекітіліп отырған. Тергеу мұндай әрекеттердің белгілі бір жүйемен орындалып келгенін және мемлекетке айтарлықтай залал келтірілгенін анықтады.

    Шығын көлемі 110 млн теңгені құрады. Бұл сома бюджет қаражаты есебінен техниканы жөндеу үшін бөлінген қаражаттың мақсатсыз жұмсалғанын айғақтайды.

    Сот санкциясымен күдіктіге тиесілі екі пәтер мен бір жер учаскесіне тыйым салынды. Бұл мүлік болашақта келтірілген залалды өтеу үшін пайдаланылуы мүмкін.

    Қылмыстық іс сотқа жолданды. ҚР ҚПК-нің 201-бабына сәйкес тергеудің өзге мәліметтері жарияланбайды.

  • Батыс Қазақстан облысында колледж директоры бюджет қаржысын жымқырған

    Батыс Қазақстан облысында колледж директоры бюджет қаржысын жымқырған

    Батыс Қазақстан облысында білім беру саласындағы бюджет қаражатын жымқыру фактісі бойынша тергеу жүргізіліп жатыр, деп хабарлайды Sona.kz өңірдің ҚМА — не сілтеме жасап.

    Тергеу мәліметінше, Батыс Қазақстан индустриалдық колледжінің директоры оқу процесіне қатыспаған елу төрт адамды жалған түрде студент ретінде тіркеген. Соған қарамастан олар ресми құжаттарда белсенді студент ретінде көрсетілген. Оларға жалған бағалар қойылып, сабаққа қатысу және үлгерім ведомостері рәсімделген, сондай ақ стипендия төленген. Кей жағдайларда жоғары мөлшердегі стипендия да есептелген.

    Жалған студенттердің атына банк шоттары ашылып, стипендия сол шоттарға аударылған. Банк карталары директорға немесе оның тапсырмасымен басқа адамдарға беріліп отырған.

    ҚМА мәліметінше, осылайша бюджеттен 49 миллион теңгеден астам сома жымқырылған.

    Директорға қатысты бұлтартпау шарасы ретінде үй қамауы таңдалды.
    Сот санкциясымен оның пәтеріне тыйым салынды.
    Қылмыстық процессуалдық кодекстің 201 бабына сәйкес өзге мәліметтер жарияланбайды.

  • «Самрук-Энерго» ісі: Ресейден 8,5 млрд теңге жымқырды деп айыпталған күдікті Қазақстанға экстрадицияланды

    «Самрук-Энерго» ісі: Ресейден 8,5 млрд теңге жымқырды деп айыпталған күдікті Қазақстанға экстрадицияланды

    Ресей Қазақстанға аса ірі көлемдегі алаяқтық жасады деп айыпталған азаматты берді, деп хабарлайды Sona.kz Бас прокуратураға сілтеме жасап.

    Тергеу деректеріне сәйкес, күдікті 2020–2022 жылдары құрылыс компаниясын басқара жүріп, сыбайластарымен бірге жалған келісімшарттар жасап, бюджет қаржысын байланысты фирмалар арқылы аударған. Нәтижесінде «Самрук-Энерго» АҚ-ның еншілес ұйымынан 8,5 млрд теңгеден астам қаражат жымқырылған. Бұл қаражат Ақмола облысында жел электр станциясын салуға бағытталған еді.

    Қылмыстан кейін күдікті шетелге қашып, халықаралық іздеуге жарияланды. 2025 жылдың ақпанында ол Ресей аумағында ұсталып, сот шешімімен Қазақстанға экстрадицияланды. Қазіргі уақытта тергеу изоляторына қамалды.

    Сыбайластарына қатысты сот үкімі биыл мамырда шыққан. Бұрмасыз маслихат депутаты Елена Беленцева 8 жыл 6 айға, ал оның әріптесі Мергенбаев 6 жыл 8 айға бас бостандығынан айырылды. Сот жәбірленуші тараптың 8,5 млрд теңге көлеміндегі азаматтық талабын қанағаттандырып, жалпы құны 13 млрд теңгені құрайтын мүлікке тыйым салды.

    Экстрадицияланған күдіктіге Қылмыстық кодекске сәйкес 5 жылдан 10 жылға дейін бас бостандығынан айыру және мүлкін тәркілеу жазасы қарастырылған. Бас прокуратура халықаралық деңгейде іздеуде жүрген адамдарды елге қайтару бағытындағы жүйелі жұмыстың жалғасып жатқанын мәлімдеді.

  • БҚО-да бухгалтерлер «өлі жандарға» жалақы аударып, 46 млн теңге жымқырған

    БҚО-да бухгалтерлер «өлі жандарға» жалақы аударып, 46 млн теңге жымқырған

    Батыс Қазақстан облысында мәдениет саласында ірі көлемдегі қаржы ұрлығы әшкереленді, деп хабарлайды Sona.kz өңірлік ЭҚІД-ге сілтеме жасап.

    Тергеу дерегінше, Теректі ауданының Орталық кітапхана жүйесінің бухгалтері мен бас бухгалтері екі жылдан астам уақыт бойы жұмыс істемейтін адамдарға жалақы аударып отырған. Ақша түптеп келгенде олардың жеке шотына түсіп отырған.

    Экономикалық тергеу департаменті «өлі жандардың» нақты саны мен атқарды делінген лауазымдарын тергеу құпиясына байланысты жария етпеді. Белгілісі — келтірілген шығын көлемі 45 миллион 990 мың теңгені құраған.

    Ашық деректерге сүйенсек, Теректі ауданындағы Орталық кітапхана жүйесіне 34 кітапхана қарайды. Кітапханашылардың орташа айлық жалақысы шамамен 164 мың теңге.