Қазақстанда запастағы офицерлерді әскери қызметке жоспарлы түрде шақыру жүргізіледі. Бұл шара «Әскери қызмет және әскери қызметшілердің мәртебесі туралы» ҚР Заңына сәйкес жүзеге асырылады және Қарулы күштердің жауынгерлік қабілетін арттыруға, сондай-ақ әскери дайындықтан өткен резерв қалыптастыруға бағытталған.
ҚР Қорғаныс министрлігінің мәліметінше, тиісті қаулыны Үкімет қабылдаған. Құжатқа сәйкес, 700 запастағы офицер Қарулы күштерге, 80 Шекара қызметіне, 64 Ұлттық ұланға, ал 15 Төтенше жағдайлар министрлігіне жіберіледі.
Шақыру ең сұранысқа ие әскери-есептік мамандықтар бойынша жүзеге асырылады. Олардың қатарында авиациялық, инженерлік, артиллериялық, радиотехникалық, әскери-көліктік, медициналық, тылдық, ақпараттық және барлау бағыттары бар.
Әскери қызметке денсаулық жағдайы бойынша жарамды, 29 жасқа дейінгі запастағы офицерлер шақырылады. Медициналық мамандықтар бойынша жас шегі 32 жасқа дейін белгіленген. Міндетті талап — қажетті әскери-есептік мамандықтың болуы.
Шақырылған офицерлерге әлеуметтік қамтамасыз ету келісімшарт бойынша әскери қызметшілер деңгейінде жүзеге асырылады. Қызмет мерзімінде оларға ақшалай үлес, тұрғын үй немесе тұрғын үй төлемдері, тамақпен және медициналық қызметпен қамтамасыз ету қарастырылған.
