Бұл туралы Қонаев қаласы әкімдігі ТҮКШ бөлімінің басшысы Тимур Ақмырзаев хабарлады.
Айтуынша, №6 және №7 жағажайлардағы құрылыс жұмыстарын шомылу маусымына дейін аяқтау жоспарлануда.
«Мұнда визит-орталық, 50-ден астам бизнес орыны, 53 киім ауыстыратын орын, 21 әжетхана орнату көзделіп отыр. Тапшандар мен шатырлар қойылады. Барлығының келбеті бірыңғай дизайнға сәйкес болмақ. Сондай-ақ жағажайда балалар ойын алаңдары, воркаут алаңдар мен жағажай спортына арналған алаң бой көтереді. Қауіпсіздік шаралары мен көгалдандыру да назардан тыс қалмайды. Мердігер компания тозығы жеткен инженерлік желілерді де жаңартады. Нысандар жеңіл конструкция есебінде салынады. Сондықтан құрылыс ұзақ уақытқа созылмайды», − деді бөлім басшысы.
Жаяу жүргіншілерге жағажайға кіру – тегін, тек автотұрақ үшін ақы алынады. Бизнес орындары сенімгерлік басқарудағы компания арқылы кәсіпкерлерге жалға беріледі.
«Бұл жерде бірнеше жылдан бері қызмет етіп келе жатқан 40 кәсіпкер бар. Оларға бизнес орындарын сүріп, алып тастау қажеттілігі жайында айтылды. Қазір демонтаж жұмыстары жүріп жатыр. 40 кәсіпкердің ішінде заң аясында қызметін мүлтіксіз атқарған 25-мен 5 жылға келісімшарт жасалды. Қалғаны заң талаптарын орындауы қажет, сол кезде келісімшартқа қайта отыру сұрағы қарастырылады», − деді Тимур Ақмырзаев.
Сонымен қатар ол солтүстік бағыттағы жағажай да абаттандырылатынын атап өтті.
«Тұрғындар мен демалушылар тарапынан бұл жағажайлардың антисанитарлық жағдайына шағымдар өте көп болды. Соны ескере отырып, осы жұмыстарды қолға алдық. Халықтың көңілінен шығады деген ойдамыз. Біздің мақсат – таза, жайлы, қолайлы орта қалыптастыру», — деді бөлім басшысы сөзін түйіндеп.
Айта кетейік, былтыр Қонаевта инвестициялық қаражат есебінен №5 жағажай абаттандырылып, қолданысқа берілген болатын. Алдағы уақытта барлық коммуналдық жағалауларды кезең-кезеңімен жаңарту көзделіп отыр.
