21-25 қыркүйек аралығында Қазақстанда АҚШ Федералдық авиация басқармасының — FAA сарапшылары тексеру жүргізеді. Бұл Қазақстан мен АҚШ арасында тікелей әуе қатынасын ашуға дайындықтың маңызды кезеңдерінің бірі болады.
Ulysmedia мәліметінше, америкалық мамандар бес күн ішінде Қазақстандағы азаматтық авиация қауіпсіздігін мемлекеттік бақылау жүйесінің халықаралық стандарттарға сәйкестігін бағалайды.
Тексеру International Aviation Safety Assessment — IASA бағдарламасы аясында өтеді. FAA мұндай бағалау кезінде жеке әуе компаниясын емес, елдің авиациялық билігінің жұмысын қарайды. Оның ішінде заңнама, сертификаттау және бақылау жүйесі, мамандардың біліктілігі, персоналды даярлау, әуе кемелерін пайдалану мен техникалық жағдайын бақылау мәселелері зерделенеді.
Қазақстан бұл бағалауға бірнеше жыл бойы дайындалды. 2024 жылғы тамызда FAA сарапшылары елде алдын ала техникалық бағалау жүргізген. 2026 жылы азаматтық авиация саласындағы мемлекеттік бақылауды күшейту және заңнаманы халықаралық талаптарға сәйкестендіру үшін бірқатар өзгерістер енгізілді.
Қазақстанның негізгі мақсаты — FAA-дан Category 1 мәртебесін алу. Бұл елдің азаматтық авиацияны қадағалау жүйесі Халықаралық азаматтық авиация ұйымының — ICAO стандарттарына сәйкес екенін білдіреді.
Алайда Category 1 мәртебесін алу АҚШ-қа рейстердің бірден ашылатынын білдірмейді.
Одан кейін АҚШ-қа ұшуды жоспарлаған қазақстандық әуе компаниялары америкалық органдардың тиісті рұқсаттарын бөлек алып, шетелдік тасымалдаушыларға қойылатын талаптардан өтуі қажет.
Сондықтан қыркүйектегі FAA тексеруі Қазақстан мен АҚШ арасындағы тікелей әуе қатынасына апаратын маңызды, бірақ соңғы емес кезең болады.
