Жетісу облысында жүк пойызының машинисі теміржол маңындағы далада жалғыз жүрген төрт жасар баланы байқап, құрамды тоқтатты, деп хабарлайды Sona.kz «Қазақстан темір жолы» ҰК» АҚ-на сілтеме жасап.
Оқиға 20 қыркүйекте Сарыөзек — Үштөбе учаскесінде болған. ҚТЖ мәліметінше, шамамен сағат 12:30-да Тауарасы — Айнабұлақ аралығында машинист Айнабұлақ станциясына қарай жалғыз кетіп бара жатқан баланы көрген.
Бұл кезде жүк пойызы сағатына 38 шақырым жылдамдықпен келе жатқан. Машинист қызметтік тежеуді қолданып, пойызды тоқтатқаннан кейін баланы локомотив кабинасына отырғызған. Оқиға туралы пойыз диспетчеріне хабарланған.
Айнабұлақ станциясына жеткен соң бала станция кезекшісіне тапсырылды. Кезекші оның ата-анасымен байланысқан.
Төрт жасар баланың теміржол маңындағы далада қалай жалғыз қалғаны туралы ақпарат берілген жоқ.
Дереккөз: «Қазақстан темір жолы» ҰК» АҚ.
