Нью-Йоркте 11 қыркүйектегі терактілердің 25 жылдығына орай 2 977 дронның қатысуымен ауқымды еске алу шарасы өтті.
9 қыркүйек кешінде мыңдаған жарық дрон Нью-Йорк айлағының үстіне көтеріліп, Дүниежүзілік сауда орталығының Егіз мұнарасының сұлбасын бейнеледі.
Инсталляция «Нью-Йорк айлағындағы 2 977 жарық» деп аталды.
Дрондардың саны кездейсоқ таңдалмаған. 2 977 жарықтың әрқайсысы 2001 жылғы 11 қыркүйектегі терактілер кезінде қаза тапқан бір адамды символдық түрде білдірді.
Шоу барысында дрондар бір сәтте Дүниежүзілік сауда орталығы мұнараларының сұлбасын бастапқы көлеміне барынша жақын масштабта аспанда қайта жасады.
Жоба қаза тапқандардың туыстары, терактіден аман қалғандар және сол күні құтқару жұмыстарына қатысқан төтенше қызмет өкілдерінің қатысуымен дайындалған.
Еске алу шарасы қайғылы оқиғаның 25 жылдығына екі күн қалғанда өткізілді.
2001 жылғы 11 қыркүйекте «Әл-Каида» террористік ұйымының 19 мүшесі төрт жолаушылар ұшағын басып алған.
Олардың екеуі Нью-Йорктегі Дүниежүзілік сауда орталығының Егіз мұнарасына бағытталды. Үшінші ұшақ Вашингтон маңындағы Пентагон ғимаратына соғылды.
United Airlines компаниясының 93-рейсі болған төртінші ұшақта жолаушылар мен экипаж мүшелері лаңкестерге қарсы әрекет еткеннен кейін әуе кемесі Пенсильвания штатында құлады.
Шабуылдар салдарынан террористерді есептемегенде 2 977 адам қаза тапты.
Ұшақтар соғылып, алапат өрт шыққаннан кейін Дүниежүзілік сауда орталығының екі мұнарасы да толықтай құлады.
Арада 25 жыл өткенде 2 977 дроннан жасалған инсталляция Нью-Йорктегі еске алу шараларының ең әсерлі символдарының біріне айналды.
