Қазақстан Парламенті Сенатының бұрынғы төрағасы Мәулен Әшімбаев 2027 жылғы Заид атындағы «Адамзат бауырластығы үшін» халықаралық сыйлықтың қазылар алқасына кірді.
Жюри құрамы 30 қыркүйекте Абу-Дабиде ресми түрде жарияланды. Қазақстан бұл комиссия құрамында алғаш рет өкілдік етіп отыр. Әшімбаевпен бірге Португалияның бұрынғы президенті Марселу Ребелу де Соуза, БҰҰ-ның босқындар жөніндегі жоғарғы комиссары әрі Ирактың бұрынғы президенті Бархам Салих, Ливанның бірінші ханымы Немат Аун және кардинал Джанфранко Равази жұмыс істейді.
Chinovnik.kz Telegram-арнасының мәліметінше, Мәулен Әшімбаевтың кандидатурасын Әл-Азһардың Жоғарғы имамы Ахмед ат-Тайеб ұсынған. Ал сыйлықтың ресми хабарламасында Әшімбаевтың жюри құрамына енгені расталғанымен, оның кандидатурасын нақты кім ұсынғаны көрсетілмеген. (Media Office)
Қазылар алқасы Заид атындағы «Адамзат бауырластығы үшін» сыйлығының сегізінші лауреатын немесе лауреаттарын анықтайды. Сыйлық бейбіт қатар өмір сүруді, ынтымақтастықты және қоғамдар арасындағы диалогты дамытуға үлес қосқан адамдар мен ұйымдарға беріледі.
Сыйлық 2019 жылы Абу-Дабиде Рим Папасы Франциск пен Әл-Азһардың Жоғарғы имамы Ахмед ат-Тайебтің тарихи кездесуінен кейін құрылды. Сол кездесуде «Адамзат бауырластығы туралы құжатқа» қол қойылған. Марапат БАӘ негізін қалаушы шейх Заид бин Сұлтан Әл Нахаянның құрметіне аталған. Жүлде қоры 1 миллион долларды құрайды.
Мәулен Әшімбаев Қазақстан Парламенті Сенатын 2020 жылғы мамырдан бастап 2026 жылғы конституциялық реформа аясында екі палаталы Парламенттің жұмысы аяқталғанға дейін басқарды. Сенаттың соңғы отырысы 29 маусымда өткен.
Сыйлық ұйымдастырушыларының мәліметінше, 2027 жылғы жюри құрамында Қазақстан, Италия, Ирак және Ливан алғаш рет өкілдік етіп отыр.
