Қазақстанда барлық деңгейдегі мәслихат депутаттарының кезектен тыс сайлауын өткізу жоспарланып отыр.
Бұл туралы Президент Қасым-Жомарт Тоқаев 24 қыркүйекте Қазақстан Халық Кеңесінің алғашқы сессиясында мәлімдеді.
Мемлекет басшысы жақын арада Премьер-министр және Құрылтай төрағасымен мәслихаттардың өкілеттігін мерзімінен бұрын тоқтату мәселесі бойынша консультация өткізетінін айтты.
Одан кейін Президент тиісті жарлыққа қол қоюды жоспарлап отыр. Сайлау күнін Орталық сайлау комиссиясы белгілейді.
Оған дейін қазіргі мәслихат депутаттары өз өкілеттігін атқара береді.
Тоқаев мәслихаттарды жаңартуға партиялық жүйедегі өзгерістер де әсер еткенін айтты.
Президенттің сөзінше, қазіргі мәслихат депутаттарының басым бөлігі Amanat партиясынан сайланған. Қазір бұл партия «Әділет» партиясына қосылып, дербес қызметін тоқтатты.
Мемлекет басшысы тиісті заңдық рәсімдер аяқталғаннан кейін мәслихат депутаттарының басым бөлігінің легитимдігіне қатысты мәселе туындайтынын атап өтті.
Сонымен бірге Президент мәслихаттар азаматтардың мүддесін толыққанды қорғауға, жергілікті бюджетті бекітуге және өңірлердің дамуын бақылауға тиіс екенін айтты.
Тоқаев алдағы сайлауды мемлекеттік басқару жүйесін жаңғыртудың қорытынды кезеңі деп атады.
Оның айтуынша, бұл қадам мәслихаттардың білікті әрі кәсіби жаңа құрамын қалыптастыруға және жергілікті өкілді органдардың жұмысына жаңа серпін беруге мүмкіндік береді.
Конституцияға сәйкес Президент Премьер-министр және Құрылтай төрағасымен консультациядан кейін мәслихаттың өкілеттігін мерзімінен бұрын тоқтата алады.
Алдағы сайлаудың нақты күні әзірге жарияланған жоқ.
