Қазақстанда 20 жасқа толған және сайлау құқығына ие азамат мәслихат депутаты бола алады. Алайда заңда кандидаттарға қатысты бірқатар шектеу қарастырылған.
Бұл туралы Орталық сайлау комиссиясының мүшесі Әсел Жанәбілова мәлімдеді.
Оның айтуынша, мәслихат депутаттығына Қазақстан Республикасының 20 жасқа толған азаматтары үміткер бола алады.
Сонымен қатар бір адамның екі немесе одан да көп мәслихаттың депутаты болуына жол берілмейді.
Заң бойынша сот әрекетке қабілетсіз деп таныған азаматтар депутат болып сайлана алмайды.
Сондай-ақ соттылығы заңда белгіленген тәртіппен өтелмеген немесе алынбаған адамдарға да шектеу қойылған.
Бұдан бөлек, сыбайлас жемқорлық қылмысын немесе сыбайлас жемқорлық құқық бұзушылығын жасағаны үшін кінәсі сот арқылы анықталған азаматтар мәслихат депутаты бола алмайды.
Бұл талаптар 2026 жылғы 29 қарашаға белгіленген барлық деңгейдегі мәслихат депутаттарының кезектен тыс сайлауы қарсаңында түсіндірілді.
