Өнеркәсіп және құрылыс министрлігі азаматтардың несие, бөліп төлеу және лизинг арасында таңдау мүмкіндігі бар екенін мәлімдеді.
Қазақстан азаматтары көлік алу үшін автолизингті пайдалана алады. Бұл туралы 17 қарашада Үкіметте өткен брифингте Өнеркәсіп және құрылыс вице-министрі Олжас Сапарбеков мәлімдеді, деп хабарлайды SONA.KZ Informburo.kz басылымына сілтеме жасап.
Вице-министрдің айтуынша, мемлекет сатып алушыларға көлік құнын бірден толық төлемей, шығынды белгілі бір мерзімге бөлуге мүмкіндік беретін түрлі тетіктерді пысықтап жатыр. Қай тәсілдің қолайлы екенін әр азамат өз мүмкіндігіне қарай шешеді.
Сапарбеков ведомство қатысушылар саны бойынша белгілі бір көрсеткішке жетуді мақсат етпейтінін де айтты. Негізгі міндет адамдарға қаржыландырудың қолжетімді нұсқалары арасында таңдау беру.
2026 жылғы 9 қазаннан бастап лизинг шарттары бойынша жылдық тиімді сыйақы мөлшерлемесінің шегін белгілейтін бұйрық қолданылады. Құны 20 млн теңгеден аспайтын мүлік үшін шекті мөлшерлеме жылына 36%, ал 20 млн теңгеден қымбат мүлік үшін 46% болады. Лизинг беруші банк болса, мөлшерлеме 35%-дан аспауға тиіс.
Бұлар — рұқсат етілген ең жоғары көрсеткіштер. Нақты мөлшерлеме шарт талаптарына байланысты белгіленеді.
Автолизинг кезінде клиент көлікті пайдаланып, шартта көзделген төлемдерді төлейді. Сатып алғанға дейін машина лизинг компаниясының меншігінде қалады. Көлікті клиенттің меншігіне өткізу мүмкіндігі мен сатып алу төлемінің көлемі таңдалған ұсынысқа байланысты болады.




