Реттеуші компанияларды борышкерлермен жұмыс кезіндегі жүйелі бұзушылықтар үшін тізілімнен шығарды.
Қаржы нарығын реттеу және дамыту агенттігі Seven, iCollect, «Каз Инвест Коллекшн» және «Табыс» коллекторлық агенттіктерін тізілімнен шығарды. Бұл туралы SONA.KZ реттеушінің мәліметін жариялаған BES.media басылымына сілтеме жасап хабарлайды.
Шешімге борышкерлермен және үшінші тұлғалармен қарым-қатынас кезінде жасалған жүйелі жосықсыз әрекеттер негіз болған. Мұндай бұзушылықтар бір жыл ішінде үш және одан көп рет тіркелген. Компаниялардың нақты қандай әрекеттерге барғаны хабарламада көрсетілмеген.
Тізілімнен шығару туралы шешімдер 2026 жылғы 16 қарашада қабылданған. Соның нәтижесінде аталған ұйымдар коллекторлық қызметпен айналысу құқығынан айырылды.
Компаниялар хабарламаны алғаннан кейін бес күнтізбелік күн ішінде кредиторларға, борышкерлерге және сенімгерлік басқару шарттары жасалған тұлғаларға бұл туралы хабарлауға міндетті.
Сондай-ақ хабарламаны алған күннен кейінгі 30 күнтізбелік күн ішінде қайта тіркеуден өтуі керек. Атауларынан «коллекторлық агенттік» сөздерін және осы қызметті білдіретін туынды атауларды алып тастауы тиіс.
Бұл ретте қарыз алушылардың берешегі сақталады. Агенттіктің тізілімнен шығарылуы банктік қарыз және микрокредит шарттары бойынша міндеттемелерді орындаудан босатпайды.




