Қасым, Жомарт, Кемел: Түркістан облысында үшем дүниеге келді
Келес ауданы Абай ауылының 33 жастағы тұрғыны 7 қыздан кейін үшем босанып, 10 баланың анасы атанды.
Үшемнің ата-анасы ұлдарына Қасым, Жомарт есімдерін берді, ал қызын Кемел деп атаған.
Балалардың салмағы 2000 грамм шамасында болған.
Астанада әйелді автобус қағып, мерт қылды
Астанада автобус жүргізушісі әйелді қағып кетті. Жәбірленуші оқиға орнында мерт болды.
Алдын-ала болжам бойынша, автобус жүргізушісі Сығанақ көшесімен келе жатып, Тұран даңғылына оңға бұрылған. Ол жерде жаяу жүргіншілер өткелінде өтіп бара жатқан әйелді қағып кеткен. Қатты соққы алған адам оқиға орнында көз жұмды.
Полиция қылмыстық іс қозғады. Қажетті сараптамалар тағайындалды.
Қасым-Жомарт Тоқаев спорт саласын сынға алды
Президент спорт саласында жемқорлық фактілері жиі кездесетінін айтты.
Мемлекет басшысының айтуынша, соңғы бес жылда жоғары жетістіктер спортына шығын екі есе өскен, бірақ соған лайық нәтиже жоқ.
«Салалық министрлік, Ұлттық олимпиада комитеті, өңірлердегі спорт басқармалары мен федерациялардың жұмысында олқылық көп әрі өзара үйлесімді жұмыс жоқ. Қазіргі жағдайға қарағанда, спорт функционерлері саланы дамытумен емес, миллиардтаған бюджет қаржысын игерумен әлек. Олар түпкі нәтижеге бас ауыртпайды. Спорт саласында жемқорлық фактілері жиі кездеседі. Бұл тек отандық спорттың дамуына ғана емес, елдің абырой-беделіне нұқсан келтіреді. Мұндайға жол беруге болмайды!» – деді Қасым-Жомарт Тоқаев.
Президент бүгінде әр өңір қандай спортты қолдайтыны туралы шешімді өз бетінше қабылдайтынын сынға алды. Үкіметке жағдайды бақылауға алып, спортқа қатысты мекемелердің барлық деңгейіндегі басқару вертикалін қалпына келтіру жөнінде тапсырма берді.
Мемлекет басшысы V Дүниежүзілік көшпенділер ойындарының мән-маңызына тоқталды.
«Олимпиада кезінде түбі бір түркі жұрты өзара тілектестік пен жанашырлықтың шынайы үлгісін көрсетті. Спортшылар да, жанкүйерлер де көрші елдердің әрбір жеңісіне шын жүректен қуанды. Бір-біріне қолдау білдіріп, қажет болса көмектерін де аяған жоқ. Тіпті, балуандарымыз жеңіс тұғырына туған бауырлар сияқты бірге көтерілді. Көшпенділер ойындары бауырлас елдердің осындай мызғымас бірлігін бекемдей түспек. Сондықтан оны жоғары деңгейде ұйымдастыруымыз керек», – деді Президент.
SCAT ұшағын найзағай соқты. Осыған байланысты 14 рейс кейінге шегеріледі
Компания қауіпсіздік талаптарына сай Boeing 737 ұшағына тексеріс жүргізілетінін хабарлады.
Қатты соққан найзағайдан әуе көлігіне зақым келгендіктен, кестеден алынып тасталған. Осыған байланысты авиакомпания осы аптада 14 рейстің уақытын өзгертуге мәжбүр. Жолаушыларға рейс уақытын алдын ала нақтылау керектігі туралы хабарланды.
Шымкент қаласы экс-әкімінің ағасын телефонмен ұрып, тістегені үшін бұрынғы әйелі айыппұл төлейді
Сот денсаулыққа қасақана жеңіл зиян келтіргені үшін айыппұл түріндегі жаза тағайындады. Даудың басында Шымкент қаласы экс-әкімінің ағасы Марат Әйтенов пен бұрынғы әйелі Дана Атешова.
«А. оны мәжбүрлеп шығару процесі барысында үй иесіне қарсылық көрсетіп, М.-ны үйге кіргізбей, жәбірленушіні қасақана ұялы телефонымен соғып, оны тістеп алған. Салдарынан М.-ге дене жарақаты келтірілген», — делінген Астана қаласының қылмыстық істер жөніндегі ауданаралық сотының хабарламасында.
Ведомствоның ақпаратына сәйкес, сотталушының кінәсі жәбірленушінің, куәгерлердің айғақтарымен, сот-медициналық сараптама қорытындысымен және іс материалдарымен дәлелденді. Прокурор 30 АЕК мөлшерінде айыппұл түрінде жаза тағайындауды сұраған. Ал, қорғаушы тарап оқиға мен қылмыстық құқық бұзушылық құрамының болмауына байланысты іс бойынша іс жүргізуді тоқтатуды сұрады.
«Жасалған теріс қылықтың мән-жайларын және оның ауырлығын ескере отырып, сондай-ақ сотталушының жеке кәсіпкер болып табылатынын, оның асырауында 3 жас баласының бар екенін және жазаның өзге түрін тағайындау оның балаларының өмірі мен тәрбиесі жағдайларына әсер етуі мүмкін екенін ескере отырып, сот сотталушы А.-ға 20 АЕК мөлшерінде айыппұл түріндегі жаза тағайындады», — деп толықтырды аталған ведомствоныың баспасөз қызметінен.
Яғни, сотталушы 73 840 теңге айыппл төлеуге міндеттелді.
Үкім заңды күшіне енген жоқ.
Естеріңізге салсақ, елорда тұрғыны Дана Атешова бұрынғы күйеуі Марат Әйтеновтің полицейлермен және жеке сот орындаушылармен бірге үйіне келіп, балаларды бір-бірлеп үйден мәжбүрлеп шығарғанын, өзін соққыға жыққанын әлеуметтік желіде жариялаған болатын.
Кейінірек Марат Әйтенов ӘҚБтК 73-бабының 1-бөлігімен кінәлі деп танылып, 5 тәулікке қамауға алынды.
Содан кейін Марат Әйтеновтың бұрынғы әйеліне сот шешімі шықты.
Айта кетейік, Марат Әйтенов — Шымкенттің бұрынғы әкімі Мұрат Әйтеновтың туған бауыры. Мұрат Әйтенов 2020-2023 жылдары Шымкентті басқарған.
Былтыр қыркүйекте Президент Жарлығымен қызметінен босатылды.
WhatsApp және кей ақпарат көздерінде оқушылардың онлайн оқитындығына қатысты жалған ақпарат тарауда. Бұл мәліметтің шындыққа жанаспайтынын санитарлық-эпидемиологиялық бақылау комитеті растады. Яғни, хабарламада 15 қыркүйектен бастап оқушылардың онлайн форматта оқитындығы жазылған. Сондай-ақ, WhatsApp желісі арқылы тараған аудио хабарламада белгісіз вирустың тарап жатқандығы айтылған. Мамандардың айтуынша, қыркүйектің 15-нен бастап тұмауға қарсы екпе егу жоспарланып отыр. Бұл – бас мемлекеттік санитарлық дәрігердің жыл сайынғы қаулысына сай жүзеге асырылатын шара. Бетперде тағу режимі тек медициналық қызметкерлерге қатысты енгізіледі. Сондықтан, сала мамандары нақты дерек көздеріне сенуге шақырады. Ол үшін жауапты мекемелердің әлеуметтік желілерде ресми парақшалары бар. Бұл жерде нақты, ресми ақпараттар жарияланып тұрады.
Оңтүстік Кореяда қонақ үй өртеніп, 7 адам қаза тапты. Тағы 12 адам жараланған. Бұл жайында елдің денсаулық сақтау министрілігі мәлім етті. Қызыл жалынның шығуына электр жүйесіндегі ақау себеп болуы мүмкін. Ал, тілсіз жауды сөндіруге 150 маман тартылған. 46 техника жұмылдырылған. Әзірге 7 адамның өмірін қиған өрттің нақты себебі анықталмады. Тергеу жүріп жатыр.
Пара спортшылар Парижге аттанды
XVII жазғы Паралимпиадаға қатысатын спортшыларымыздың алғашқы легі Парижге аттанды. Бүгін волейболды отырып ойнау, пара үстел теннисі және пара жүзу құрамаларының спортшылары Францияға жол тартты.
Париж Паралимпиадасына волейболды отырып ойнаудан ұлттық құрама 28 жылдан кейін алғаш рет қатыспақ. Ал пара үстел теннисінен Қазақстан құрамасы биыл алғаш рет Паралимпиада жолдамасын жеңіп алды.
Пара жүзу спортшылары арасында Лондон-2012 Паралимпиада чемпионы Зүлфия Ғабидуллина, Токио Паралимпиадасының қола жүлдегері Нұрдәулет Жұмағали және халықаралық жарыстардың жүлдегерлері Сиязбек Дәлиев пен Амир Мұратбеков бар.
Қазақстан құрамасының спортшылары Париж Паралимпиадасына спорттың 9 түрінен 33 лицензия жеңіп алды. Жарыс 28 тамыз бен 8 қыркүйек аралығында өтеді.