Sona.kz

Рубрика: Билік

  • Қонаев қаласында алғашқы жартыжылдықтағы әлеуметтік-экономикалық даму көрсеткіштері

    Қонаев қаласында алғашқы жартыжылдықтағы әлеуметтік-экономикалық даму көрсеткіштері

    Өнеркәсіп пен инвестиция
    Есепті кезеңде Қонаевтағы өнеркәсіп кәсіпорындары 37,8 млрд теңге өнім өндіріп, нақты көлем индексі 96%-ды құрады. Негізгі капиталға тартылған инвестиция көлемі 37,8 млрд теңге, НҚИ – 167,1%.

    Кәсіпкерлік
    Қала мен ауылдық округтерде 6875 шағын және орта кәсіпкерлік субъекті жұмыс істейді, 16 мыңнан астам адамды жұмыспен қамтиды. Шағын кәсіпкерліктен 19,5 млрд теңге салық түсті.

    Сауда
    Бөлшек сауда айналымы 21,9 млрд теңге (НҚИ 140,3%), көтерме сауда – 17,1 млрд теңге (НҚИ 110,4%).

    Жұмыспен қамту
    2025 жылдың алты айында 1607 азамат жұмысқа орналаспақ болып өтініш білдірді, оның 526-сы жұмыспен қамтылды (32,7%).

    Ауыл шаруашылығы
    Ауыл шаруашылығы өнімдері 6,7 млрд теңге, НҚИ 102,1%. Жылқы басы 54,4%-ға, құстар саны екі есеге артты. Сүт өнімділігі 2,1%, жұмыртқа өндірісі 51,7%-ға өскен.

    Құрылыс
    14,2 мың шаршы метр тұрғын үй пайдалануға берілді (2024 жылмен салыстырғанда 65,2%). Құрылыс жұмыстары 8 млрд теңге, НҚИ 121%.

    Қоғамдық тәртіп
    Алты айда қала аумағында 297 қылмыс тіркелді, қылмысты ашу көрсеткіші 87%.

  • Қонаевта 20 тамыздан бастап автобуста қатынау бағасы қымбаттайды

    Қонаевта 20 тамыздан бастап автобуста қатынау бағасы қымбаттайды

    20 тамыздан бастап Қонаев қаласында автобустардағы жолақы өзгермек. Енді қала ішінде бір рет жол жүру құны электронды билет жүйесі немесе мобильді қосымша арқылы төлеу кезінде – 120 теңге, ал қолма-қол төлегенде 200 теңге болады.

    Тарифтің өсуі тасымалдаушылар шығындарының артуына, автобус паркін жаңартудың қажеттілігіне және қоғамдық көлік қызметінің тұрақты жұмысын қамтамасыз етуге байланысты.

    ?Жолақы неге қымбаттады?

    Жанар-жағармай бағасының өсуі

    Соңғы үш жылда бензин мен дизель отыны шамамен 40%-ға қымбаттады. 2023 жылы литрі 200–230 теңге болса, 2024 жылы – 240–270 теңге, ал 2025 жылы баға 290–310 теңгеге дейін жетті.

    Автобустарды күтіп ұстау құнының өсуі

    2023 жылдан бері қосалқы бөлшектер, майлау материалдары, сүзгілер мен жөндеу жұмыстары 30–40%-ға қымбаттады. Сондай-ақ шинаның бағасы да едәуір өсті: егер бұрын бір дөңгелек 106–118 мың теңге тұрса, биыл 136 мың теңгеден асып отыр.

    Бюджетке түсетін жүктемені азайту

    Қазіргі таңда әлеуметтік маңызы бар бағыттар республикалық бюджеттен субсидияланады. Жолақының өсуі бюджетке түсетін салмақты азайтып, қоғамдық көліктің тұрақты жұмысын қамтамасыз етуге мүмкіндік береді.

    ?Қала маңына қатынайтын бағыттардағы жаңа тарифтер

    • Қонаев – Заречный, Қонаев – Арна: электронды жүйе арқылы – 150 теңге, қолма-қол – 300 теңге.
    • Қонаев – Шеңгелді, Қонаев – Қоскұдық: электронды жүйе арқылы – 200 теңге, қолма-қол – 400 теңге.
    • Қонаев – Сарыбұлақ, Қонаев – Кербұлақ: электронды жүйе арқылы – 200 теңге, қолма-қол – 500 теңге.

  • Қонаевтағы саяжайлар дамуына қолдау көрсетіледі — Мәжіліс депутаты

    Қонаевтағы саяжайлар дамуына қолдау көрсетіледі — Мәжіліс депутаты

    Бүгін Мәжіліс депутаты Наурыз Сайлаубаев Қонаев қаласындағы №7 саяжай аумағының тұрғындарымен кездесті.

    «Алтын Алма» тұтынушылар кооперативінің төрайымы Лина Черказьянова «Южная» және «Сиреневая» қарапайым серіктестіктерінің жұмысына шағымданып, ауыз су құбырларының ТҮКШ бөлімінің иелігіне берілуіне наразылық білдірді.

    Тұрғындар мына мәселелерді айтты:
    1. 2022 жылы «Алтын Алма» кооперативінің абоненттері толықтай ауыз судан ажыратылды. Осыдан кейін тұрғындар жиналыс өткізіп, қарапайым серіктестіктер құруға шешім қабылдаған.
    2. Кейін инженерлік желілер (су, электр) қала әкімдігінің балансына берілді. Соның нәтижесінде коммуналдық тарифтер арзандады: бұрын ауыз судың текше метрі 140 теңге болса, қазір — 70 теңге.
    3. Қарапайым серіктестіктер мен кооператив арасындағы сот процестері үш жыл бойы жалғасып, барлық істерде кооперативтің талаптары қанағаттандырылмады.

    Бүгінде екі серіктестікте шамамен 230 абонент бар. Әкімдіктің қолдауымен көше жарығы орнатылып, балалар алаңы салынды, орталық көшелер асфальтталды.

    Қонаев қаласының әкімі Асхат Бердіханов саяжайларды газбен қамту, сүзгі станциясын салу және су желілерін жаңғырту жобалары дайын екенін мәлімдеді. Мемлекеттік сараптамадан оң қорытынды алынған жағдайда бюджеттен қаржы бөлу қарастырылатынын айтты.

    Наурыз Сайлаубаев басты міндет — инфрақұрылымды дамыту, жарық пен суды үздіксіз жеткізу, жаңа жолдар салу екенін атап өтті:

    «Қаланың Бас жоспарына саяжайларды қала құрамына енгізу мәселесі қарастырылған. Дегенмен, әр кооператив немесе серіктестік қала құрамына ену немесе енбеу жөнінде өз бетінше шешім қабылдауға құқылы», — деді депутат.

    Сонымен қатар, ол Мәжілісте саяжайларды дамытуға қатысты жаңа заң жобасы қаралып жатқанын, оған түзетулер мен ұсыныстар қабылданып жатқанын айтты.

  • Мәжіліс депутаты күрделі жөндеуден өтіп жатқан мектепке барды

    Мәжіліс депутаты күрделі жөндеуден өтіп жатқан мектепке барды

    Қазақстан Республикасы Мәжілісінің депутаты Наурыз Сайлаубай Қонаев қаласындағы №4 мектепке барып, жөндеу жұмыстарының барысын тексерді.

    Нысанды тапсыру мерзімдері бұзылған, бұл жаңа оқу жылының басталуына тікелей қауіп төндіреді. Ол кездесуде мердігерді осы мәселеге қатысты сынға алды. Депутат құрылыстың тез арада аяқталуы қажет екенін атап өтті.

    «Білім беруде салғырттыққа жол жоқ. Әрбір кешіккен күн — балаларымыз үшін жіберілген мүмкіндік. Жөндеу жұмыстары сапалы әрі уақытында аяқталуы тиіс», – деді ол.

  • Тоқаев: Мұғалімдерді оқушылардың қателігі үшін жазалауға болмайды

    Тоқаев: Мұғалімдерді оқушылардың қателігі үшін жазалауға болмайды

    Мемлекет басшысы Қасым-Жомарт Тоқаев ұстаздарды өздеріне тән емес міндеттерден босатып, мектептен тыс немесе ата-аналардың жауапсыздығынан болған оқиғалар үшін жауапқа тартпау қажет екенін айтты.

    «Егер мұндай оқиға мектептен тыс немесе ата-аналардың жауапсыздығынан орын алса, педагог оған жауапты болмауы тиіс. Алматы облысында түлектердің қатысуымен болған қайғылы жағдайдан кейін мектеп директоры мен мұғалімдер жауапқа тартылып, жұмыстан босатылды. Білім министрлігінің мектеп басшылығы мен педагогтарды қорғап шыққаны – дұрыс шешім деп санаймын. Мұндай жағдайлардың қайталануына жол бермеу керек», – деді Президент.

    Тоқаев педагогтардың құқықтарын қорғау және олардың беделін арттыру мақсатында заңнамаға өзгерістер енгізуді ұсынды. Сонымен қатар, ол Маңғыстау облысында орын алған улану оқиғаларынан кейін мектеп асханаларындағы тамақ сапасын бақылау қажеттігін еске салды.

  • Тоқаев: мектептерде буллинг пен агрессияға жол берілмеуі тиіс

    Тоқаев: мектептерде буллинг пен агрессияға жол берілмеуі тиіс

    Қазақстан Президенті Қасым-Жомарт Тоқаев білім беру ұйымдарындағы балалардың қауіпсіздігін қамтамасыз етудің маңыздылығын атап өтті.

    Мемлекет басшысы соңғы екі жылда өскелең ұрпақтың құқықтарын қорғауға бағытталған кешенді шаралар қабылданғанын айтты. Атап айтқанда, кәмелетке толмағандарға қатысты кез келген зорлық-зомбылық түрі үшін жаза күшейтіліп, Бала құқықтары жөніндегі уәкіл институтының рөлі нығайтылды.

    «Ешбір жағдайда буллингке, қатыгездікке және агрессияға жол берілмеуі керек», — деді Тоқаев.

    Президенттің айтуынша, бүгінде елімізде балалар суицидінің алдын алу бойынша жүйелі жұмыс жүргізілуде. Бұл – өзекті әлеуметтік мәселелердің бірі. Барлық мектептерде «111» психологиялық қолдау қызметінің QR-коды орналастырылған.

    Жаңа оқу жылынан бастап мектептер мен колледждерде «ДосболLIKE» атты антибуллинг бағдарламасы енгізіледі. Оның мақсаты – балалар мен жасөспірімдер ұжымында қудалаудың алдын алу.

    «Мемлекет өскелең ұрпақтың құқықтары мен мүдделерін қорғау жүйесін жоспарлы түрде жетілдіре береді. “Не ексең, соны орасың” деген мақал бар. Бүгін балаларымызға не дарытсақ, соған болашақта бүкіл ұлттың келбеті байланысты болады. Дәл мектеп қабырғасында Әділетті, Озық, Таза, Қауіпсіз және Қуатты Қазақстанның іргетасы қаланады», — деп атап өтті Қасым-Жомарт Тоқаев.

  • Қорғаныс министрлігі басшылығында ауыс-түйіс болды

    Қорғаныс министрлігі басшылығында ауыс-түйіс болды

    Тоқаев Қорғаныс министрлігінде жаңа кадрлық тағайындаулар жасады

    Қазақстан Президенті Қасым-Жомарт Тоқаев Қорғаныс министрлігінің басшылық құрамында бірқатар кадрлық өзгерістер енгізді, Sona.kz. Tengrinews.kz.

    Мемлекет басшысының Жарлықтарымен:

    • Серік Жақсығалиевич Бурамбаев Қазақстан Республикасы Қорғаныс министрінің орынбасары болып тағайындалды. Ол бұған дейін атқарған қызметінен босатылды.
    • Қанат Серікқалиевич Ниязбеков Қазақстан Республикасы Қарулы күштерінің Әскери-теңіз күштерінің Бас қолбасшысы болып тағайындалды.

    Айта кетейік, биыл 8 маусымда Президент Қасым-Жомарт Тоқаев Руслан Жақсылықовты Қорғаныс министрі қызметінен босатқан еді. Бұл лауазымға генерал-лейтенант Даурен Қосанов тағайындалған болатын.

    Жаңа тағайындаулар Қорғаныс министрлігінің құрылымын нығайтып, әскери басқару жүйесін жетілдіруге бағытталған.

  • Қонаевта №6 жағажайдың болашағы талқыланды

    Қонаевта №6 жағажайдың болашағы талқыланды

    Қонаевта №6 жағажайды дамыту мәселесіне арналған кеңейтілген жиын өтті. Оған Мәжіліс депутаты Наурыз Сайлаубай, қала әкімі Асхат Бердіханов, тиісті бөлім өкілдері және жағажай аумағында жұмыс істейтін кәсіпкерлер қатысты.

    Қазір бұл аумақты 42 кәсіпкер жыл сайын үш ай мерзімге жалға алады. Соңғы үш жылда полиция 34 ұрлық, 18 бұзақылық, 3 орташа ауырлықтағы денсаулыққа қасақана зиян келтіру және 200-ден астам әкімшілік құқықбұзушылық тіркеген. Сондай-ақ, өрт қауіпсіздігі, су айдындарын пайдалану ережелері және салық тәртібі бойынша көптеген заңбұзушылық анықталған.

    Аким Асхат Бердіхановтың айтуынша, №6 жағажай бюджет есебінен абаттандырылады. Жоба дайын және қазір мемлекеттік сараптамадан өтуде. «Біз №5 жағажайды жаңартып, демалушылардың ағыны артқанын көрдік. Сол тәжірибені қалған 7 коммуналдық жағажайға енгіземіз», – деді әкім.

    Депутат Наурыз Сайлаубай бұл бастаманы қолдап, қала көркейсе, елдің де көркейетінін атап өтті. Жиын соңында қатысушылар жағажай аумағын аралады.

  • Қонаевта заңсыз сауда орнының орнына жаңа сквер салынады

    Қонаевта заңсыз сауда орнының орнына жаңа сквер салынады

    Қонаев қаласында бірнеше жыл бойы Абай көшесін бойлай орналасқан заңсыз сауда орындарының орнына қоғамдық демалыс аймағы салынып жатыр.

    Тұрғындар ұзақ уақыт бойы антисанитария, жаяу жүргіншілер мен көлік қозғалысына кедергі және саудагерлер тарапынан заңбұзушылықтар жайында шағымданып келген. Полиция айыппұлдар салғанымен, мәселе шешілмеген.

    Қала әкімі Асхат Бердіхановтың айтуынша, инвестордың қаражатына сквердің құрылысы басталған. Онда спорт және балалар алаңдары, шағын сәулеттік нысандар орнатылады. Сонымен қатар, инвестор Комсомольская көшесі мен теміржол вокзалы маңында да сквер салуы мүмкін.

    Кездесуде тұрғындар көше жарығы, кәріз жүйесі және балалар алаңдарының сапасына қатысты да сұрақтар көтерді. Әкім бұл мәселелер кезең-кезеңімен шешілетінін айтты.

  • Қонаевта тұрғын үй құрылысы қарқын алды

    Қонаевта тұрғын үй құрылысы қарқын алды

    Қонаев қаласында құрылыс қарқыны артып, жаңа тұрғын үй кешендері мен инфрақұрылымдық нысандар бой көтеріп жатыр.

    Д. Қонаев көшесінде «MDI Construction» компаниясы жеті төрт қабатты блоктан тұратын «Маяк» тұрғын үй кешенін салып жатыр. Кешенде 216 пәтер, сондай-ақ тұрғындарға арналған кафе, дүкен және спорт залы болады.

    19-шағынауданда «Хаммер Бау Девелопмент» компаниясы үш тоғыз қабатты үйден тұратын «Атамекен» кешенін тұрғызуда. Жоба 2025 жылдың соңына дейін толық аяқталмақ.

    «Али-Нұр транс» компаниясы жүзеге асырып жатқан «NNS City» – ең ірі жобалардың бірі. Мұнда 21 бес қабатты үй салынып, 600-ге жуық пәтер пайдалануға беріледі. Алғашқы үйлер 2025 жылдың қарашасында тапсырылмақ.

    Қала орталығында «Retail Construction» компаниясы 50 пәтерлік бес қабатты үй тұрғызуда. Нысан 2025 жылдың желтоқсанында аяқталады.

    «R&M Construction» компаниясының «Аристократ» жобасы – 25 тұрғын үйден тұрады. Бірнеше үйі қазірдің өзінде қолданысқа берілген, толық аяқталуы 2027 жылға жоспарланған.

    «GS QURYLYS» компаниясының «Comfort» кешені төрт үйден тұрады. Сауда орындары мен автотұрағы бар жоба 2026 жылдың алғашқы тоқсанында қолданысқа беріледі.

    10-шағынауданда «Chinese Foreign Construction Company» «Феникс» кешенінің құрылысын бастады. Алғашқы кезек 2026 жылы аяқталады.

    Әкімдік мәліметінше, биылғы алғашқы жартыжылдықта қалада 14,2 мың шаршы метр тұрғын үй пайдалануға берілген. Бұл өткен жылдың сәйкес кезеңімен салыстырғанда 65,2%-ға көп. Құрылыс көлемі – 8 млрд теңге.