Sona.kz

Рубрика: Жаңалықтар

  • Мейрамханалар ауызашар бағасын шарықтатып отыр – Мүфтият

    Мейрамханалар ауызашар бағасын шарықтатып отыр – Мүфтият

    Қазақстан мұсылмандары діни басқармасы (ҚМДБ) еліміздегі мейрамхана, кафе иелерін қасиетті Рамазан айында халыққа қолжетімді бағамен ауызашар ұйымдастыруға шақырды.

    Дінбасылардың айтуынша, соңғы жылдары ауызашар мәзірінің бағасы шарықтап, қарапайым халық үшін қолжетімсіз болып барады.

    «Асыл дініміз ауызашар дастарқанында ас та төк ысырапқа жол беруге, дастарқан жасауда бәсекелесуді құптамайды. Ондай әрекет сауапқа емес күнәға жетелейді», – делінген ҚМДБ мәлімдемесінде.

    Діни басқарма қасиетті айда дастарқан жайып, ауыз бекіткен жандарға ас беру – үлкен сауап екенін атап өтті. Алайда соңғы жылдары елімізде бірқатар мейрамханалар ауызашар мәзірінің бағасын тым жоғары қойып, халықтың наразылығын тудырып отыр.

    «Ауызашар дастарқаны қарапайымдылыққа негізделуі тиіс. Қасиетті Құранда: «… ішіңдер, жеңдер, алайда ысырапқа жол бермеңдер. Өйткені Алла ысырап етушілерді жақсы көрмейді» делінген («Ағраф» сүресі, 31-аят)», – деп еске салды ҚМДБ өкілдері.

    Дін мамандары ауызашар дастарқаны қарапайым болуы тиіс екенін айтып, кәсіпкерлерді көпшіліктің қалтасына сай қолжетімді мәзірлер ұсынуға шақырды. Сондай-ақ мұсылман жамағатын жетім-жесірлер мен мұқтаж жандарға ауызашар ұйымдастырып, қайырымдылық жасауға үндеді.

    ҚМДБ қасиетті Рамазан айының берекесі саудамен емес, шынайы сауаппен келетінін еске салып, халықты рухани тазаруға шақырды.

  • Талдықорған әкімдігі қаладағы газ жарылысына қатысты түсініктеме берді

    Талдықорған әкімдігі қаладағы газ жарылысына қатысты түсініктеме берді

    Соңғы үш айда Талдықорғанда газ-ауа қоспасының екі рет жарылысы болды. Sona.kz редакциясы тергеу барысы мен осындай төтенше жағдайдың алдын алу шаралары туралы білу үшін редакция әкімдікке сауал жолдаған болатын.

    Алайда, билік өз жауабында тергеудің егжей-тегжейі туралы ақпарат беруден гөрі алдын алу жұмыстарын тізіп берген.

    Әкімдіктің ресми жауабында 2025 жылы қалада газбен жабдықтау қауіпсіздігін қамтамасыз ету бойынша бес профилактикалық іс-шара жүргізілгені хабарланды. Тексерулерге тұрғын үйлер, сондай-ақ коммуналдық шаруашылық нысандары – дәмханалар, мейрамханалар мен жанармай құю станциялары қамтылды. 

    Осы іс-шаралардың нәтижесінде жанар-жағармай құю бекеттерінде тұрмыстық газ баллондарын толтыруға тыйым салатын 10 хабарлама беріліп, қауіпсіздік талаптарын бұзған үш дәмхана иесі әкімшілік жауапкершілікке тартылды.

    Сондай-ақ әкімдікте қала тұрғындарына газды қауіпсіз пайдалану туралы жаднамалар таратылып, кәсіпкерлермен түсіндіру жұмыстары жүргізіліп жатқанын хабарлады. Алайда бұл шаралардың қаншалықты тиімді екенін уақыт көрсетеді.

    Тергеу барысы туралы әкімдіктің ресми жауабы да қысқа болды: Қылмыстық іс Жетісу облыстық полиция департаментінің тергеу бөліміне берілді. Қазіргі уақытта іс  аяқталмаған.

    Осылайша, жергілікті билік алдын алуды басты назарда ұстайтынын айтса да, бірақ бұл шаралар нақты нәтиже бере ме немесе болашақта осындай қайғылы оқиғаларды болдырмау мүмкін бе?

  • Перизат Қайраттың «Biz birgemiz» қоры ресми түрде жабылды

    Перизат Қайраттың «Biz birgemiz» қоры ресми түрде жабылды

    Астана қаласының мамандандырылған ауданаралық экономикалық соты Әділет департаментінің «Biz birgemiz Qazaqstan 2030» қоғамдық бірлестігін тарату туралы талабын қарады.

     Іс материалдарына сәйкес, осы заңды тұлғаны бастапқы мемлекеттік тіркеу 2021 жылғы 11 қазанда өткізілді. Бірлестіктің құрылтайшылары – 10 адам, олардың есімдері Қайрат Перизатты қоса алғанда, құрылтай жиналыстарының хаттамаларында көрсетілген. Қылмыстық істі тергеу барысында қолжазба сараптамасы жүргізіліп, қорытындысына сәйкес, 10 құрылтайшының 9-ының атынан құрылтай құжаттарына Қайрат Перизат қол қойған.

    «Заңды тұлға Азаматтық кодекстің 49-бабына сәйкес, заңды тұлға оны құру кезінде жіберілген, жойылмайтын сипаттағы заң бұзушылықтарға байланысты жарамсыз деп танылған жағдайда, сот шешімі бойынша таратылуы мүмкін. ҚР Жоғарғы Сотының «Соттардың салық заңнамасын қолданудың кейбір мәселелері туралы» нормативтік қаулысының 12-тармағына сәйкес, заңды тұлғаны құруға (қайта тіркеуге) қатысы жоқ заңды тұлғаны басшысын және (немесе) құрылтайшысын (қатысушысын) көрсете отырып тіркеу (қайта тіркеу) заңды тұлғаны тарату (жарамсыз деп тану) үшін негіз болып табылады. Бірлестікті құру кезінде анықталған бұзушылықтарды ескере отырып, сот «Biz birgemiz Qazaqstan 2030» қоғамдық бірлестігін мәжбүрлі түрде тарату туралы шешім қабылдады», – делінген ауданаралық экономикалық сот үкімінде.

    Шешім заңды күшіне енген жоқ.

  • Шерзат Болаттың ісі осы аптада сотқа түседі

    Шерзат Болаттың ісі осы аптада сотқа түседі

    Ішкі істер министрінің орынбасары Санжар Әділов Талғарда 16 жастағы Шерзат Полатты өлтіру ісі бойынша материалдар алдағы күндері сотқа жіберілетінін хабарлады.

    Бұл туралы ол журналистердің сұрағына жауап берген кезінде айтты. Алайда негізгі сот процесінің қашан басталатынын нақтылай алмады.

    Шерзаттың ісі қазір прокуратурада қаралып жатыр. Алдағы күндері, осы аптада сотқа жіберіледі деп күтеміз. Бұл – соттың прерогативасы. Сот ісін қарайтын судья тағайындалады. Кейінірек бұл мәселеге қатысты соттың өзі түсініктеме бергені дұрыс деп есептеймін, – деді ол.

    Санжар Әділов сонымен қатар, Шерзат Полаттың ағасы Нұрқанат Ғайыпбаевтың ісі бойынша тергеу жүргізіліп жатқанын, ол істе ешкім күдікті ретінде танылмағанын айтады. Бұған дейін Шерзат ісі бойынша тергеудің аяқталғаны хабарланған болатын.

    Қылмыстық іс 62 томнан тұрады. Бұған дейін тергеу толық аяқталып, іс прокурорға жолданғанын хабарлаған едік. Тараптар қылмыстық іс материалдарымен толық танысты, іс сотқа жіберу үшін прокурорға жолданды.

    Тергеу барысында 40 сот сараптамасы жүргізілді, шамамен 200 куәгерден жауап алынды, барлық күдіктілердің оқиға орнында айтқан жауаптары тексерілді, процесс қатысушылары арасында беттестірулер өткізілді, сондай-ақ қылмыстың барлық мән-жайын анықтауға бағытталған өзге де тергеу әрекеттері жүзеге асырылды.

    Қылмысқа қатысушылардың барлығына құқықтық баға бере отырып, 8 бейнематериал зерттелді.

  • Грузияның экс-президенті Саакашвили 9 жылға сотталды

    Грузияның экс-президенті Саакашвили 9 жылға сотталды

    «Эхо Кавказа» мәліметінше, Грузияның экс-президенті мемлекет қаржысын жымқырғаны үшін сотталған.

    Сонымен қатар, сот арнайы күзет қызметінің бұрынғы басшысы Теймураз Джанашияны қызмет бабын асыра пайдаланды деп танып, 300 мың лари көлемінде айыппұл салды.

    Прокуратураның мәліметінше, 2009 жылдың 1 мамырынан 2013 жылдың 25 ақпанына дейін Саакашвилидің ұйымдастыруымен мемлекеттік бюджеттен 9 миллион лари жұмсалған. Бұл сол жылдардағы шамамен 5,4 миллион доллар. Ақша жеке мақсаттар үшін жұмсалған.

    Айыптау актіндегі мәлімет бойынша, Саакашвили мемлекет қаржысына пенжек (пиджак), пәлте сатып алып, ақшаны басқа да жеке мақсаттарына жұмсаған.

    Саакашвили 2021 жылдың 1 қазанында Грузияда ұсталды. Қазіргі уақытта ол жазасын өтеп жатыр. Ол екі іс бойынша сотталды: Сандро Гиргвлианиді өлтіргендерге рақымшылық жасағаны үшін және депутат Валерий Гелашвилиді соққыға жыққаны үшін. Екі жағдайда да ол сырттай сотталды.

  • Қонаев қаласы: Қоғамдық орындарды ластаған 39 азаматқа айыппұл салынды

    Қонаев қаласы: Қоғамдық орындарды ластаған 39 азаматқа айыппұл салынды

    Қонаев қаласында «Таза Қазақстан» бағдарламасы аясында шаһардағы тазалық мәселесіне аса көңіл бөлінуде. Заңсыз қоқыс үйінділерін жою, ҚР заңнамасы шеңберінде бекітілген ережелерді бұзған тұлғалармен түсіндірме жұмыстарын жүргізу, айыппұл салу шаралары қолға алынған.

    Мысалы, 1-8 наурыз аралығында ҚР ӘҚБтК-нің 434-2-бабына (Ортақ пайдаланылатын орындарды ластау) сәйкес, 39 хаттама толтырылып, 766 мың теңгеден астам сомаға айыппұл салынды. Одан бөлек, ҚР ӘҚБтК-нің 505-бабына (Қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) сай, 92 жеке және заңды тұлғаға 943 680 теңге айыппұл салынды.

    Қонаевта «Таза Қазақстан» бағдарламасы аясында кестеге сай, күнделікті сенбіліктер ұйымдастырылуда. Әкімшілік нысандардың, мектептердің, кәсіпкерлік нысандардың төңірегі тазартылуда. Одан бөлек, пәтер иелері кооперативтері аулаларды қоқыстан тазартуда. Жалпы Қонаевта 109 бірыңғай байланыс нөмірі іске қосылған. Тұрғындардан тазалық бойынша түскен өтінімдер коммуналды қызмет көрсетуші компаниялармен бірден орындалуда. Азаматтардан қоқысты арнайы орындарға тастауларын сұраймыз. Аталғандардан басқа, полиция басқармасы ҚР ӘҚБтК-нің 434-2 және 505-бабына сәйкес, хаттамалар толтырып, ережені бұзғандарға айыппұл салуда. Бұл шараның барлығы азаматтар арасында тазалық мәдениетін қалыптастыру үшін қолға алынған.

    Аталған бағыттағы жұмыстар ары қарай да жалғасады.

  • Жетісу облысының Ақсу ауданында көпірді су шайып кетті

    Жетісу облысының Ақсу ауданында көпірді су шайып кетті

    Ақсу ауданында «Жансүгіров-Матай» автожолының 34-шақырымында су өткелінің тозуына байланысты темірбетон құбыры мен жол төсемінің бір бөлігі қирады.

    Ақсу аудандық ТҮКШ, жолаушылар көлігі және автомобиль жолдары, ТҮИ бөлімінің басшысы Мадияр Нұрахметов бұл ақпаратты растады.

    «Облыстық маңызы бар Ақсу-Ойтоған ауылдарының арасындағы автомобиль жолында орналасқан көпір күннің күрт жылынуы себепті, қар суы көпірді шайып кетті. Қазіргі уақытты тиісті жол қозғалысы шектелді, қалпына келтіру шаралары бойынша мамандар жұмыс істеуде», – деді ол.

    Кейіннен аудандық бөлім басшысы жол қозғалысы қалпына келтірілгенін мәлім етті.

    –  Ақсу-Ойтоған ауылдарының арасындағы жол қалпына келтірілді. Қазіргі таңда арнайы белгілер қойылып, кезекшілік ұйымдастырылды. Жол ашық. Құрметті жолаушылар аталған жол учаскесінде жылдамдықтың қатаң сақтауды сұраймыз, – деп ескертті Нұрахметов.

  • Оңтүстікте жер сілкінді

    Оңтүстікте жер сілкінді

    ТЖМ хабарлауынша, жер сілкінісінің ошағы Түркістан облысы Келес ауданы Абай ауылынан 16 км қашықтықта орналасқан.

    ҚР ТЖМ «ННЦСНИ» ЖШС сейсмикалық станциялар желісімен 2025 жылғы 12 наурызда Астана уақытымен 6 сағат 15 минутта жер сілкінісі тіркелді. «Жер сілкінісінің ошағы Өзбекстан Республикасының аумағында Алматы қаласынан оңтүстік-батысқа қарай 684.00 км жерде орналасқан. (Түркістан облысы Келес ауданы Абай ауылынан 16 км қашықтықта). Келес ауданының Абай ауылында 3.0 б., Сарыағаш ауданының Сарыағаш қаласында 3.0 б. шамасында болған. Зардап шеккендер мен қираулар туралы мәлімет түскен жоқ», – делінген хабарламада.

    ТЖМ «Қазселденқорғау» ММ мамандары өзен арналарын, гидротехникалық құрылыстарды, көшкін қауіпті және сел қауіпті учаскелерді зерттеу бойынша мониторинг жүргізді. Сондай-ақ, тіршілікті қамтамасыз ету нысандарын аралап, тексерді.

    «Тексеру нәтижелері бойынша зақымдану табылған жоқ, қазіргі уақытта аталған объектілер штаттық режимде жұмыс істейді. Қираулар мен зардап шеккендер туралы мәлімет түскен жоқ. Жағдай тұрақты», – деп атап өтті ведомство өкілдері.

     

  • Нұрғиса Тілендиевтің жары Дариға Тілендиева дүниеден өтті

    Нұрғиса Тілендиевтің жары Дариға Тілендиева дүниеден өтті

    Суыт хабарды Құрманғазы атындағы Қазақ ұлттық халық аспаптар оркестрінің баспасөз қызметі хабарлады. 

    Дариға Тілендиева 1946 жылы Алматы облысына қарасты Көксу ауданы, бұрынғы Ақтекше ауданында дүниеге келген.

    Дариға Тілендиева ұлттық мәдениетіміздің дамуына сүбелі үлес қосқан көрнекті өнер иесі. Ол Халық қаһарманы, күйші-композитор Нұрғиса Тілендиевтің өмірлік жары ғана емес, сазгердің шығармашылық мұрасын сақтап, кейінгі ұрпаққа жеткізген тұлға болды.

    Дариға Тілендиева «Қазақфильм» киностудиясында түсірілген «Алты жасар Алпамыс», «Құлагер», «Ақ машина», «Жамбылдың жастық шағы», «Қоштасқым келмейді» сынды көркем фильмдері арқылы, ұлттық кино өнерінде өшпес із қалдырды.

  • Айыппұл төлегенде 50% жеңілдік кімдерден алынып тасталады – Бектенов жауабы

    Айыппұл төлегенде 50% жеңілдік кімдерден алынып тасталады – Бектенов жауабы

    Үкімет басшысы Олжас Бектенов жол ережесін бұзатын азаматтарға жаза қалай күшейтіліні жөнінде депутаттардың сұрағына жауап берді. Оның айтуынша, мәжіліс депутаттары қазір екі үлкен заңға өзгеріс енгізгелі жатыр. Ол заңдар қолдау тауып күшіне енсе, жүргізушілерге жауапкершілік күшейтіледі.

    Бектеновтің жауабында жазылғандай, мәжіліс депутаттары «жаңа көлік түрлерінің қозғалысын реттеу және жол қозғалысы қауіпсіздігін қамтамасыз ету мәселелері бойынша Қазақстанның кейбір заңнамалық актілеріне өзгерістер мен толықтырулар енгізу туралы» және «Жаңа көлік түрлерінің қозғалысын реттеу және жол қозғалысы қауіпсіздігін қамтамасыз ету мәселелері бойынша әкімшілік кодекске өзгерістер мен толықтырулар енгізгелі жатыр. Заң жобалары аясында келесі түзетулер қарастырылған.

    Жыл ішінде көлік және жол шаруашылығы саласында он және одан да көп құқықбұзушылық жасаған тұлғаларды жол қозғалысы ережелері (ЖҚЕ) бойынша білімін тексеруге жіберу және емтихан тапсырғанға дейін көлік құралын басқару құқығын уақытша тоқтата тұру жөнінде ұсыныс бар. Сонымен қатар, жүргізушіні емтиханға жіберуге негіз болатын әкімшілік кодекстің баптар тізімі кеңейтіліп, жол қозғалысы қауіпсіздігіне тікелей әсер ететін құқық бұзушылықтар енгізілмек.

    Көлік және жол шаруашылығы саласында жыл ішінде он және одан да көп құқықбұзушылық жасаған тұлғаларға әкімшілік өндірістің қысқартылған тәртібін (50% айыппұл) қолдануды алып тастау жөнінде де ұсыныс қаралуда. Бұл шара жүргізушілердің жол қозғалысы ережелерін жүйелі түрде бұзуының алдын алып, олардың жеке жауапкершілігін арттыруға бағытталған.

    Көлік құралын басқару құқығын тоқтата тұруға негіз болатын жағдайларды нақтылау және кеңейту. Қазіргі уақытта бұл механизм тек жүргізушіні мерзімінен бұрын медициналық тексеруге жіберу кезінде қолданылады. Ұсынылып отырған өзгерістерге сәйкес, жүргізушіні ЖҚЕ білімін тексеру үшін емтиханға жіберу және денсаулық сақтау органдарының ақпараттық жүйелеріндегі медициналық қарсы көрсетілімдер туралы деректер (диспансерлік есеп, медициналық тексеру қорытындысы және т.б.) негізінде де тоқтата тұру мүмкіндігі қарастырылған.

    Көлік құралын басқару құқығын тоқтату және қалпына келтіру құзыретін сот органдарынан ішкі істер органдарына беру. Бұл өзгеріс келесі жағдайларға қатысты:

    • жүргізуші куәлігінің қолданылу мерзімі аяқталуы;
    • медициналық қарсы көрсетілімдердің анықталуы;
    • ЖҚЕ білімін тексеру емтиханын тапсырмау;
    • жүргізушілерді даярлау қағидаларын бұза отырып, жүргізуші куәлігін беру.

    Қазіргі уақытта бұл түзетулер үкіметтің қорытындысы аясында келісу рәсімінен өтіп жатыр.