Sona.kz

Рубрика: Жаңалықтар

  • Экс-депутат Асқар Садықов Перуашевқа бірнеше айып тақты

    Экс-депутат Асқар Садықов Перуашевқа бірнеше айып тақты

    Мәжілістің бұрынғы депутаты Асқар Садықов «Ақ жол» партиясының жетекшісі Азат Перуашевқа арналған видеоүндеу жариялады.

    Ол үндеуде жыныстық бопсалау, этиканы бұзу туралы айыптаулар мен партиядан шығарылуы туралы айтқан.

    «Мені арзанқол манипуляциялар мен лас ойындарыңызға араластырмаңыздар. Бұдан былай үндемей қалмаймын. Мұндай іс-әрекеттер партия көшбасшысының деңгейіне сай емес, Перуашевтің бұған дейін халықты бірнеше рет жаңылдырмақ болғанын ешкім ұмытқан жоқ», — деді экс-депутат.

    Садықовтың сөзінше, партиядан шығарар кезде нақты деректер мен дәйектерге сүйену қажет еді. Халық қалаулысы болған азамат өзінің жұмысынан мін көрмегенін айтады.

    Экс-депутат Азат Перуашевтің өзінің орынбасарын пара алу туралы даудан алшақтату үшін қоғам назарын басқа арнаға бұрып отырғанын алға тартты. Белгілі болғандай, 4 қыркүйекте Қазақстан ІІМ Ұлттық ұлан Бас қолбасшысының орынбасары ұсталғанын растады. БАҚ-тың хабарлауынша, онымен бірге «Ақ жол« партиясы төрағасының орынбасары Дмитрий Васильев те ұсталған.

    Естеріңізге сала кетейік, «Ақ жол« партиясының төрағасы Азат Перуашев әнші Dequine-нің әкесі және депутат Асқар Садықовты жыныстық бопсалағаны үшін партиядан шығарды. 

  • АҚШ-та 14 жастағы оқушы 2 мұғалім мен 2 оқушыны атып өлтірді

    АҚШ-та 14 жастағы оқушы 2 мұғалім мен 2 оқушыны атып өлтірді

    АҚШ-тың Джорджия штатында қанды қырғын. Аппалачи орта мектебінің 9-шы сынып оқушысы 2 мұғалімді және 2 оқушыны атып өлтірді. Қаза тапқан оқушылардың жасы 14-те. Қаскөйдің қолынан тағы да тоғыз адам жараланып, түрлі жарақаттармен ауруханаға жеткізілді,— деп хабарлады жергілікті билік өкілдері. Күдікті 14 жастағы Колт Грей есімді оқушы қамауға алынды. Джорджия Тергеу Бюросының мәліметі бойынша оның бұл әрекетке не себепті барғаны белгісіз

    «Күдіктіге кісі өлтіру бойынша айып тағылып отыр. Ол ересек адам ретінде сотталады және ересек адам ретінде жауапкершілікке тартылады. Ол біздің мектептегі қауіпсіздік қызметкерімен бетпе-бет келіп, ізінше өз еркімен берілді. Оның қаруды мектеп ішіне  қалайша алып кіргені әлі де белгісіз», — деді БАРТОУ ОКРУГІНІҢ ШЕРИФІ ДЖАД СМИТ.

     

  • Ақтөбе облысында екі оқушы адам өліміне қатысты қамауға алынды

    Ақтөбе облысында екі оқушы адам өліміне қатысты қамауға алынды

    Ақтөбе облысында екі оқушы адам өліміне қатысы бар деген күдікпен қамауға алынды. Мектеп директоры қызметінен босатылды.

    «ҚР Қылмыстық процестік кодекстің 128-бабының тәртібімен кәмелетке толмаған 2 күдікті ұсталды. Темір аудандық соты 2 ай мерзімге қамауға алу түріндегі бұлтартпау шарасын санкциялады. Оқиға бойынша тергеп-тексеруді Ақтөбе облыстық полиция департаментінің жедел-тергеу тобы жүргізіп жатыр. Қадағалауды жүзеге асыру тәжірибелі процессуалдық прокурорлар тобына жүктелді. Облыстық прокуратура жергілікті атқарушы органның атына Темір ауданы әкімінің, облыстық Білім басқармасы және аудандық білім бөлімінің лауазымды тұлғаларының жауапкершілігін шешу жөнінде ұсыныс енгізді. Бүгінгі күні қадағалау актісімен Қопа ауылындағы мектептің директоры Р.Е.Қаржауов қызметінен босатылды. Басқа мәліметтер тергеу мүддесіне қатысты жарияланбайды», — деп хабарлады Ақтөбе облыстық прокуратурасының баспасөз қызметі.

    Айта кетейік, оқушы өлімімен аяқталған қайғылы жағдай 2 қыркүйек күні Темір ауданы Кеңесту ауылында болған. Оқушылар төбелескен.  Қайтыс болған 9 сынып оқушысы Қопа орта мектебінде оқыған.

     

  • Интернет-дүкендердің тілі қазақшаға аударылады

    Интернет-дүкендердің тілі қазақшаға аударылады

    Сауда және интеграция министрі Арман Шаққалиев кәсіпкерлерге электронды сауда алаңдарын қазақшалау талабы қойылғанын хабарлады.

    Мәжілістің 3-ші сессиясының отырысында депутаттар «Тұтынушылардың құқықтарын қорғау туралы» заң жобасы қарады. Сауда министрінің сөзінше, электронды сауда алаңдары қазақшаланып, тұтынушыларға ана тілімізде қызмет көрсетуге міндеттеледі.

    «Депутаттардың көмегімен заңға жаңа новеллалар енгіздік. Ол электронды сауда алаңдарына қатысты. Біз бақылау шараларын өткізетін кезде платформаларды тексеретін боламыз. Тағы бір маңызды тұсы қазақ тілі мәселесі. Ақпарат ретінде айта кетейін, бізде 6 ірі электронды сауда алаңы бар. Kaspi, Ozon, Wildberries, Alibaba сияқты ірі маркетплейстер мен басқа да 41 электронды сауда алаңдарын жинап, оларға қазақ тілінде қызмет көрсету туралы талап қойдық. Қазір байқасаңыздар Kaspi, Wildberries, Колесо болсын қазақ тілді қызмет тетігін іске қосқан»,– деді министр. 

    Сондай-ақ ол кемшіліктер мен шағымдардың көп екеніне де тоқталды. 2023 жылы маркетплейстерге түскен шағымдар 15%-ға, ал биыл небәрі 6 ай ішінде 25%-ға күрт өскен.

    Министр төрт жыл бұрын енгізілген тұтынушылар құқығы туралы қолданыстағы заң қазіргі жағдайға сай емес екенін алға тартты. Ал бұл заң жобасын әзірлеу барысында ТМД елдерінің, Германия, Польша, Түркия және басқа да елдердің тәжірибесі зерттелген.

     Заңға мынадай негізгі өзгерістер ұсынылды:

     1. Дауларды шешу тәртібін жеңілдету. Азаматтық-құқұқтық тұтұнушылық дауларды шешу тәртібі көп сатыдан екі сатыға дейін жеңілдетіледі.

    2. Заңның қолданылу аясын кеңейту. «Тұтынушылардың құқықтарын қорғау» туралы заңның базалық қағидаттары салалық реттеу мен осы салалардағы тиісті мемлекеттік органдардың құзыретін сақтай отырып, қаржылық қызметтерден басқа, барлық қызмет көрсету салаларына қолданылатын болады.

    3. Тұтұнушылардың белгіленген және белгіленбеген тобы туралы ұғымдар. Омбудсмен мен тұтынушылардың құқықтарын қорғау жөніндегі қоғамдық бірлестіктер тұтынушылардың белгіленбеген тобына қатысты, сотқа талап қою құқығына ие болады.

    4.  Кәсіпкерлердің азаматтық-құқықтық жауапкершілігі. Егер тұтынушының бұзылған құқықтары қалпына келтірілмесе, тұтынушының пайдасына азаматтық процесте сот өндіріп алатын айыппұл түрінде кәсіпкердің азаматтық құқықтық жауапкершілігі енгізіледі.

    5. Онлайн саудада тұтынушылардың құқықтарын қорғауды күшейту бойынша түзетулер ұсынылады.

    6. Институционалды нығайту. Тұтынушылардың құқықтарын қорғау жөніндегі омбудсмен институты енгізілуде. Ол мемлекеттік органдардың стратегиялық серіктесіне айналады және тұтынушылардың құқықтарын қорғау саласындағы жүйелі проблемаларды анықтауға көмектеседі.

    Мәжіліс «Тұтынушылардың құқықтарын қорғау» туралы заң жобасының жаңа редакциясын және оған ілеспе заң жобасын мақұлдады.

     

  • Президент Давид Дегтяревті құттықтады

    Президент Давид Дегтяревті құттықтады

    Президент Қасым-Жомарт Тоқаев Паралимпиада ойындарының екі дүркін чемпионы Давид Дегтяревті құттықтады

    – Давид Дегтяревті Паралимпиада ойындарының екі дүркін чемпионы атануымен шын жүректен құттықтаймын! Ол ерекше ерік-жігер танытып, жеңіс тұғырынан көрінді, – деп жазды Мемлекет басшысы өзінің Х әлеуметтік желідегі парақшасында.

    Давид Дегтярев 188 кг салмақты еңсеріп, екі дүркін Паралимпиада чемпионы атанды.

    Паралимпиаданың жетінші жарыс күнінен кейін Қазақстан құрамасының қоржынында 1 алтын, 1 күміс, 1 қола жүлде бар.

  • Арабтар Қазақстанның су шаруашылығын қалпына келтіреді

    Арабтар Қазақстанның су шаруашылығын қалпына келтіреді

    Арабтар Қазақстанның су шаруашылығын қалпына келтіреді. Бүгін Астанада алғашқы келісім-шартқа қол қойылды. Еліміздің драйвері саналатын ауылшаруашылық саласында жаңадан су қоймалары саналады. Тоз-тозы шыққан суару жүйелері жөнделеді. Бастапқы жұмыс, тасқыннан зардап шеккен өңірлер мен қуаңшылық көрген оңтүстік жақтан басталады.

    «Еліміздің бүкіл су жүйесі қалпына келтіріледі. Су тасқындарымен күресуге, суармалы жерлердің көлемін ұлғайтуға, елімізде жаңа су резерваттары пайда болады. Каналдар қазылады, су қоймалары салынады. Бұл жұмыс биыл басталады. Қазан айының басында тиісті несиелік жобаға қол қоямыз», — деді ҚР Премьер-Министрінің орынбасары – Ұлттық экономика министрі  Нұрлан Байбазаров.

    Жалпы Араб үйлестіру тобына Қазақстан тарапы 250 жоба ұсынып отыр. Бұл жобалар түрлі саланы қамтиды. Оның  жалпы құны 10 млрд доллар.

     «Ислам даму банкі Қазақстанның су шаруашылығындағы инфрақұрылымды жаңғыртып ғана қоймайды. Сонымен қатар, Қазақстанның жолдарын да қалпына келтіреді. Бұл да өте үлкен жобаның бірі. 9 өңірдің жолдарын жөндейтін боламыз», — деді «ИСЛАМ ДАМУ БАНКІ» ЕЛ БАҒДАРЛАМАЛАРЫНЫҢ БАС ДИРЕКТОРЫ АНАССИ АЙССАМИ.

  • Бағдат Қарасаев 10 жылға дейін сотталуы мүмкін

    Бағдат Қарасаев 10 жылға дейін сотталуы мүмкін

    Алматы облысындағы Іле ауданының әкімі  Бағдат Қарасаевтың не себепті ұсталғанына облыстың прокуратурасы түсінік берді.  Қадағалау органының мәліметінше, аудан әкіміне кәсіпкерлік қызметке заңсыз қатысты, лауазымдық өкілеттіктерін асыра пайдаланып мемлекеттік мүдделерге нұқсан келтірді деген айып тағылды.

    «Алматы облысының прокуратурасы мен Сыбайлас жемқорлыққа қарсы қызметі Іле ауданында орналасқан қоқыс полигонының қызметін бірлесіп тексеруді аяқтады.2024 жылғы 3 қыркүйектегі жедел-іздестіру іс-шараларының нәтижесінде әкім Б.А. Қарасаев сыбайлас жемқорлық қызметіне күдік бойынша Қазақстан Республикасы Қылмыстық-процестік кодексінің 128-131-баптарының тәртібінде ұсталды. Аталған қылмыстар үшін мүлкі тәркіленіп, 10 жылға дейінгі мерзімге бас бостандығынан айыру түріндегі жаза көзделген», — деп хабарлады Алматы облысының прокуратурасы.

    2024 жылдың 4 қыркүйегінде прокуратура бұлтартпау шарасын санкциялау үшін қылмыстық іс материалдарын сотқа жолдады.

     Естеріңізге сала кетейік, бұған дейін Б.Қарасаевтың ұсталғаны жөнінде хабарлаған болатынбыз.

  • Алматы облысында сәбиін сатпақ болған әйел ұсталды

    Алматы облысында сәбиін сатпақ болған әйел ұсталды

    Алматы облысында әйел 8 айлық сәбиін 1 миллион теңгеге сатпақ болған. Ол сатып алушыларды ғаламтордан іздеген, деп хабарлайды Sona.kz тілшісі Newtimes.kz сайтына сілтеме жасап.

    Арнайы операция кезінде 38 жасар қызылордалық әйел ұсталған. Ол ақшадан қатты қысылғандықтан, сәбиін пұлдамақ болған.

    «Кәмелет жасқа толмаған жасөспірімді сату бойынша қылмыстық іс қозғалды. Ұсталған әйел қамауда отыр. Қазір тергеп-тексеру жүріп жатыр», — деді Алматы облыстық ПД ресми өкілі Меруерт Маякова.

    Полицейлер алғашында ұйымдасқан қылмыстық топ әрекет етуде деп күдіктенген. Әлеуметтік желіде таралған хабардан соң қылмысты жалғыз әйелдің өзі жасағаны анықталған.

  • Алматы облысындағы Іле ауданының әкімі ұсталды 

    Алматы облысындағы Іле ауданының әкімі ұсталды 

    Алматы облысындағы Іле ауданының әкімі ұсталды

    Бағдат Қарасаевтың ұсталғанын Антикордың баспасөз қызметі растады.

    Тергеу билікті  және қызметтік өкілеттігін асыра пайдалану фактілері бойынша жүргізілуде.

  • Президент жаңадан тағайындалған спорт министріне нақты міндет жүктеді

    Президент жаңадан тағайындалған спорт министріне нақты міндет жүктеді

    Мемлекет басшысы Туризм және спорт министрі Ербол Мырзабосыновты қабылдады.

    Қасым-Жомарт Тоқаев жаңадан тағайындалған министрге бұқаралық және балалар мен жасөспірімдер спортын дамыту, спорт саласының барлық деңгейінде бірыңғай басқару вертикалін қалыптастыру, бапкерлер құрамын күшейту, саланы ғылыммен ұштастыру бағытында міндет жүктеді.

    Президент министрден биыл маусым айында өткен Туризмді дамыту жөніндегі кеңесте берілген тапсырмалары бойынша нәтижелі жұмыс күтетінін айтты.