Sona.kz

Рубрика: Жаңалықтар

  • Жамбылда халықаралық іздеуде жүрген әйел ұсталды

    Жамбылда халықаралық іздеуде жүрген әйел ұсталды

    Жамбыл облысы полиция департаментінің қызметкерлері жедел-іздестіру іс-шараларын жүргізу кезінде Қырғызстан Республикасының 43 жастағы азаматшасын ұстады, деп хабарлайды Sona.kz.

    Әйел адам 2023 жылдың қараша айынан бастап Өзбекстан Республикасы қылмыстық кодексінің 169-бабы 2-бөлігінде (Ұрлық) көзделген қылмыс жасағаны үшін мемлекетаралық іздеуде болған.

    Ол Ресей, Қазақстан, Өзбекстан және Қырғызстан аумағында зергерлік дүкендерден алтын бұйымдар ұрлаған. Біздің елдің аумағында Жамбыл облысы Қордай ауданындағы зергерлік дүкеннен алтын бұйымдарды ұрлап кеткен. 

    Күдікті уақытша ұстау изоляторына қамаққа алынды және Өзбекстан Республикасы Самарқанд облысының ІІБ қызметкерлеріне берілетін болады.

  • Алматы облысында «Қажымұқан жолы» жарысы өтті

    Алматы облысында «Қажымұқан жолы» жарысы өтті

    Спорттық іс-шараны «Қазақстандық спортшылар одағы» ұйымдастырды.

    Жарысқа облыстағы аудандар мен Қонаев қаласының салмағы 90 келіден асатын жасөспірімдер мен ересектер санатынан тоғыз балуаны қатысты. Ең жасы үлкен қатысушы 65 жастағы Артықбай Қазақов өзінің төзімділігі мен шеберлігімен көрермендерді таң қалдырды.

    «Бұл турнирдің жаңғыруы өте маңызды. Ол Балуан Шолақ пен Қажымұқан сияқты ұлы ата-бабаларымыздың дәстүрлерін жалғастыруда. Мұндай жарыстар еліміздің жастарын спортпен шұғылдануға шабыттандыру, әр аймақтың спорттық мәдениетін көрсету және рухани күшке тәрбиелеу үшін қажет. Бұл турнирден қазақстандық спорттың болашақ аңыздары, тарихта өз ізін қалдыратын ұлы ата-бабаларымыздың лайықты ізбасарлары шығатынына сенімдімін», — деді Алматы облысы дене шынықтыру және спорт басқармасының басшысы Ерболат Сарабеков.

    Бұл ұлттық жоба Қазақстанда 2021 жылы іске қосылды. Турнирді ұйымдастырушы, күш жаттығулары бойынша әлемнің төрт дүркін рекордшысы Сергей Цырульниковтың айтуынша, жарыс физикалық денсаулықты нығайтып қана қоймай, мәдени-тарихи мұраны жалғастыруға арналған.

    Жарыс Қонаев қаласының орталық алаңында өтті. Қатысушылар бірнеше сайыстар бойынша бақ сынасты, соның ішінде ауыр сөмкелерді жылдамдыққа көтеру, үстел үстіне тасты орнату, темірді майыстыру, бөренелерді көтеріп, күресті.

    Жарыс қорытындысы бойынша чемпион атағын және бас жүлде – «Қажымұқан жолы» белдеуін спорт шебері, армрестлингтен Азия және Еуропа чемпионы Евгений Инкин жеңіп алды. Ол біздің облысты келесі жылы Астанада өтетін республикалық кезеңде таныстырады. Екінші орынды Еламан Жүніс, үшінші орынды Бауыржан Әбдірайым иеленді.

  • «Құнар» жобасының артықшылықтары қандай?

    «Құнар» жобасының артықшылықтары қандай?

    Алматы облысына жұмыс сапарымен барған ҚР Премьер-Министрінің орынбасары Тамара Дүйсенова «Ауыл аманаты» жобасының іске асырылу барысымен танысып, жергілікті тұрғындармен кездесу өткізді.

    Ауыл тұрғындарының табысын арттыруға бағытталған «Ауыл аманаты» жобасында тауарлық несие беру тетіктері де қарастырылған. Өз кәсібін ашуға ниет білдіргенге жер, мал немесе құс беріледі, тұрақты табыс көзін қамтамасыз ете отырып, дайын өнім кепілдендірілген бағамен сатып алынады.

    Сондай-ақ өңірде кәсіпкерлер қолдауымен «Құнар» жобасы қолға алынған. Жоба аясында бір отбасыға 30 қой беріледі, ал арнайы мамандар мал бағудың қыр-сырын үйретеді және жыл бойына қажетті кеңес беріледі. Жобаға алғашқы қатысушы ретінде Ақсеңгір ауылынан 3 отбасы таңдалды. Бастама авторы Жәнібек Кенжебаев жобаның басты мақсаты ауыл тұрғындарына тұрақты табыс көзін ұсыну екенін алға тартып отыр.

    «Біздің бастамамызды «Kusto group» компаниясы мен «Qunar creative» қоғамдық қоры қолдап отыр. Біз қойларды құр беріп қана қоймаймыз. Сонымен қатар ветеринарлық қолдау көрсетіліп, жайылым мен мал күтімі үйретіледі. Тұрақты түрде шаруаның барысын қадағаланып отырады. Жобаға қатысушылар кәсіби мамандардың көмегімен мал басын көбейтіп, өз кәсібін дөңгелетеріне сенеміз», — деп атап өтті кәсіпкер.

    Жобаға қатысушылардың бірі – Дәуіт Әбдірахымов. Жұбайымен 6 бала тәрбиелеп отырған азаматтың сөзінше, ата кәсіппен айналысуға ниетті жандар көп, алайда бәрі бірдей малдың бабын біле бермейді. Сондықтан қой өсіруде мамандардың көмек беруі тиімді екенін атап өтті.

    «Үкімет түрлі қолдау бағдарламаларын жүзеге асыра отырып, ауыл шаруашылығын дамытуға көп көңіл бөліп келеді. Бұл ретте жеке кәсіпкерлердің бастамалары да маңызды рөл атқарады. Азаматтарға өз кәсібін бастауда алғашқы қадам жасауға көмек беру маңызды. Жобаға қатысып жатқандарға сәттілік тілеймін», — деп түйіндеді сөзін Тамара Дүйсенова.

  • Қазақстанда алғаш өткен IBO олимпиадасының жеңімпаздары марапатталды

    Қазақстанда алғаш өткен IBO олимпиадасының жеңімпаздары марапатталды

    Бүгін марапаттауға IBO халықаралық комитетінің төрағасы Ленка Либусова келіп қатысты. 

    Олимпиадаға 81 елден 305 оқушы мен 275 ғалым келген. Олар 150-ге жуық марапатқа ие болды. 

    Оқу-ағарту министрі Ғани Бейсембаев Олимпиаданың маңыздылығын атап өтті. 

    «Бұл – дүниежүзіндегі беделді 7 Олимпиаданың бірі. 35 жылдың ішінде алғаш рет Қазақстан жерінде өтіп жатыр. Біздің ел үшін үлкен жаңалық деуге болады. Өткен Олимпиадаларға 60 елден үміткер келсе, бұл жолы елімізге 80-нен астам елден үміткерлер жиналды», – деді министр. 

    Биыл үздіктердің қатарынан отандастарымыз да көрініп, қола медальді иеленді. Олар — Ғалымжан Бақтыбай, Амина Тынарбай, Нұртөре Төреханұлы, Диас Сүлейменов.

    Жарысқа қатыстушылар бір апта бойы биохимия, молекулалық биология, биоинформатика және жануарлар анатомиясы, физиологиядан екі теория және 4 практикалық турда бәсекеге түсті. 

    Келесі IBO халықаралық олимпиадасы Филиппинде өтеді.

  • Түркияда студенттер мінген автобус апатқа ұшырады

    Түркияда студенттер мінген автобус апатқа ұшырады

    Түркияның оңтүстік-батысындағы Мугла провинциясында туристер мінген автобус жолаушылар көлігіне соқтығысып, 1 адам қаза тапты, деп хабарлайды Sona.kz тілшісі 24kz-ке сілтеме жасап.

    Тағы 30-дан астам адам жарақат алды. Зардап шеккендер жақын маңдағы ауруханаға жеткізілді. Жергілікті БАҚ-тың хабарлауынша, жол-көлік оқиғасына тежегіштің істен шығуы себеп болған.

    Ақау кесірінен автобус жол жиегінде тұрған бірнеше жолаушылар көлігіне, артынша үйге соғылып барып тоқтаған. Көлік ішінде экскурсияға шыққан жергілікті студенттер болған. Оқиғаға қатысты тергеу басталды. 

  • Әділет министрлігі алаяқтыққа қарсы пилоттық жобаны іске қосты 

    Әділет министрлігі алаяқтыққа қарсы пилоттық жобаны іске қосты 

    Алаяқтық әрекеттермен күресу мақсатында ҚР Әділет министрлігі 1414-тен СМС және EGov-mobile push-хабарламалар арқылы азаматтарды хабардар ету бойынша пилоттық жобаны іске қосты. 

    Бұрын нотариустар мен сот орындаушылары азаматтарды тапсырыс хат арқылы хабардар етсе, енді олар электрондық хабарламаларды сенімді байланыс арналары арқылы жібереді.

    Өткен жылы әділет органдарына нотариустар мен сот орындаушыларының әрекеттеріне қатысты 40 мыңнан астам шағым келіп түсті. Көптеген шағымданушылар нотариустардың атқарушылық жазбаларды шығарғаны туралы білмегенін, тек қандай да бір тыйымдар мен шектеулер салынғаннан  кейін ғана білгенін хабарлады. 

    Енді азаматтарға атқарушылық іс туралы және нотариус немесе сот орындаушысы туралы егжей-тегжейлі ақпараттар 1414-тен СМС-хабарламалар және EGov-mobile-дан push-хабарламалар арқылы уақытылы келіп отырады.

  • Эрик Робертс Астанада: Голливуд актері Көшпенділер ойындарымен танысты

    Эрик Робертс Астанада: Голливуд актері Көшпенділер ойындарымен танысты

    Танымал Голливуд актері Эрик Робертс 5-ші Дүниежүзілік көшпенділер ойындарымен танысу мақсатында Қазақстан Ұлттық спорт түрлері қауымдастығының арнайы шақыртуымен Астанаға келді.

    5-ші Дүниежүзілік көшпенділер ойындарын дайындау жəне өткізу дирекциясы танымал актерге елордадағы «Qazaqstan» жеңіл атлетика спорт кешенінде Ойындардың таныстырылымын өткізді.

    Эрик Энтони Робертс — америкалық кино жəне телевизия актері. Ол 700-ден астам фильмдер мен телехикаяларға түскен жəне кино əлеміндегі атақты «Оскар» мен «Алтын глобусқа» үміткер болған.

  • Елімізде жүк көліктерінің жүруіне уақытша шектеу енгізілді

    Елімізде жүк көліктерінің жүруіне уақытша шектеу енгізілді

    «ҚазАвтоЖол» компаниясы бұл шаралар жол жабынын сақтауға, аптап ыстықта жол қауіпсіздігін қамтамасыз етуге бағытталғанын алға тартты.

    Жыл сайын 1 маусым мен 31 тамыз аралығында, ауа температурасы 25°С жоғары болған кезде сағат 10:00-ден 22:00-ге дейін келесі аймақтарда жүк көліктерінің қозғалысына шектеулер енгізіледі:

    • Алматы облысы;
    • Атырау облысы;
    • Жамбыл облысы;
    • Жетісу облысы;
    • Ұлытау облысы;
    • Қызылорда облысы;
    • Түркістан облысы;
    • Маңғыстау облысы.

    Ал 1 маусым мен 15 тамыз аралығында, сағат 11:00-ден 21:00-ге дейін келесі аймақтарда ауыр көліктердің қозғалысы шектелмек:

    • Абай облысы;
    • Ақмола облысы;
    • Ақтөбе облысы;
    • Шығыс Қазақстан облысы;
    • Батыс Қазақстан облысы;
    • Қарағанды облысы;
    • Қостанай облысы;
    • Павлодар облысы;
    • Солтүстік Қазақстан облысы.
  • Шымкенттің бұрынғы әкімінің ағасы ұсталды

    Шымкенттің бұрынғы әкімінің ағасы ұсталды

    Астана полициясы отбасын үйінен қуып шыққан шулы бейнеден кейін тергеу жүргізілгені туралы хабарлады. 

    Ресми мәліметке сүйенсек, отбасы-тұрмыстық қатынастар саласындағы құқыққа қайшы әрекеттер фактісі бойынша азаматтың бұрынғы жұбайы А. — ға қатысты әкімшілік іс қозғалды.

    «Ол уақытша ұстау бөлмесіне орналастырылды. Материал сотқа жіберілді. Дене күшін қолдану фактісі бойынша сотқа дейінгі тергеу басталды», — делінген ПД хабарламасында.

    Сондай-ақ полицейлердің іс-әрекеттеріне қатысты қызметтік тексеру басталды.

  • Жамбыл облысында жол апатынан бес адам қаза тапты

    Жамбыл облысында жол апатынан бес адам қаза тапты

    Жамбыл облысының Жуалы ауданындағы «Батыс Еуропа – Батыс Қытай» тасжолында бірнеше көліктің қатысуымен жол апаты болды.

    Жол-көлік оқиғасының салдарынан 5 адам қаза тауып, тағы бесеуі ауруханаға жатқызылды.

    Осы дерек бойынша қылмыстық іс қозғалды.

    Жамбыл облысы полиция департаменті тиісті жедел-тергеу шаралары жүріп жатқанын хабарлады. 

    Тергеу барысы облыс прокуратурасының бақылауында.