Sona.kz

Рубрика: Қаржы

  • «Наурыз жұмыскер»: жаңа ипотекалық бағдарлама іске қосылады

    «Наурыз жұмыскер»: жаңа ипотекалық бағдарлама іске қосылады

    Елімізде Жұмысшы мамандықтар жылы аясында «Наурыз жұмыскер» жаңа ипотекалық бағдарламасы іске қосылмақ. Бұл – техникалық мамандарға арналған ипотека. Оған өнеркәсіп, энергетика, көлік, ауыл шаруашылығы және су ресурстары салаларының қызметкерлері қатыса алады.

    2025 жылы «Наурыз жұмыскер» бағдарламасы аясында 72 млрд теңгеге 2 440 несие беру жоспарланған.

    Өтінім қабылдау 2025 жылдың 17 наурызында басталмақ. «Наурыз жұмыскер» қазірдің өзінде белгілі «Наурыз» тұрғын үй бағдарламасының бір бөлігі болады.

    Сондай-ақ «Наурыз жұмыскер» бағдарламасымен қатар «Отбасы банк» отандық кәсіпорындармен «корпоративтік» өнім шеңберінде жұмыс істейді. Оның шеңберінде кәсіпорындар өз қызметкерлеріне несие беру үшін қаражат бөледі.

    Пайыздық мөлшерлеме. «Наурыз жұмыскер» бағдарламасы бойынша ипотека 9%-бен (ЖТСМ 9,4%-дан 13%-ға дейін) беріледі. Ал әлеуметтік осал санатқа жататындарға 7%-бен ұсынылады.

    Бастапқы жарна. Таза әрлеудегі дайын пәтер сатып алғысы келетіндер 10% алғашқы жарна жинауы керек. Ал жөндеу жұмыстары жоқ, жаңа салынған үйлер мен қайталама нарықтан баспана алатындар кемі 20% бастапқы жарна құюы шарт.

    Бағдарлама аясында облыстардағы тұрғын үйлерден пәтер сатып алуға 30 млн теңге ипотекалық несие беріледі. Ал Астана мен Алматы қалалары үшін – 36 млн теңге.

    «Президентіміз 2025 жылды Жұмысшы мамандықтары жылы деп жариялады. Кеншілер, металлургтер, тас қалаушылар, электриктер, құюшылар ауыр жұмыстарды атқарады. Осы және басқа да көптеген мамандық иелері бізді негізгі қажеттілігімізді қамтамасыз етіп отыр. Мұндай мамандарға жасалған қамқорлық – бүкіл қоғамның игілігі үшін жасалған қамқорлықпен тең. Көпшілігі қиын жағдайда жұмыс істейді. Сондықтан олардың баспана мәселесін шешу – қиын еңбек жағдайларының орнын толтыруға септігін тигізеді», – деді «Отбасы банкі» АҚ басқарма төрағасы Ләззат Ибрагимова.

  • Биыл Қазақстанда 16,7 млн мұнай өңделді

    Биыл Қазақстанда 16,7 млн мұнай өңделді

    2024 жылдың 11 айының қорытындысы бойынша Қазақстанның мұнай өңдеу зауыттарында мұнай өңдеу көлемі 16,7 млн тоннаға жетті. Бұл 2023 жылдың сәйкес кезеңімен салыстырғанда 3,6%-ға артық.

    Биылғы есепті кезеңде мұнай өнімдерін өндіру көлемі:

    • автобензин – 4,88 млн тонна немесе 2023 жылға 101,1%;
    • дизель отыны – 4,91 млн тонна немесе 2023 жылға 103%;
    • авиакеросин – 0,68 млн тонна немесе 2023 жылға 118,6%.

    Бүгінде қазақстандық мұнай өңдеу зауыттары тұрақты жұмыс істейді, жанар-жағармай материалдарының (ЖЖМ) қорларын тиеу және толықтыру үздіксіз іске асырылады.

  • Елімізде бір шоттан екінші шотқа ақша аудару қымбаттауы мүмкін

    Елімізде бір шоттан екінші шотқа ақша аудару қымбаттауы мүмкін

    Қазақстанда бір шоттан екінші шотқа ақша аудару қызметі шамамен 12%-ға қымбаттауы мүмкін. Бұл туралы Мәжіліс депутаты Асхат Аймағамбетов айтты. Оның айтуынша, бүгінде картадан басқа картаға ақша аудару қызметі 150 теңге тұрады.

    Алайда жаңа Салық кодексі жобасында ұсынылған норма қабылданса, мұндай аударымдар шамамен 12%-ға қымбаттауы мүмкін.  Бұл – Экономика министрлігінің төлем операциясын ҚҚС-қа (НДС) салуға қатысты жоспары. Пластикалық карталарды пайдалану, картадан картаға аударымдар, шоттан шотқа аударымдар, төлемдер мен банк қызметтері айтарлықтай қымбаттауы ықтимал, – деп жазды Асхат Аймағамбетов Telegram-дағы арнасында.

    Ол Экономика министрлігі бұл шығындарды банктер өздері жабады деп мәлімдегенін жеткізді.

    Бірақ ашығын айтсақ, бұл шындыққа жанаспайды. Банктер ешқашан шығындарды өз есебінен жауып қалмайды. Олар міндетті түрде бұл шығындарды клиенттердің мойнына артады. Өйткені банктер – қайырымдылық ұйымдары емес, — деді депутат.

    Бұл нормаға Ұлттық банк, Қаржыгерлер қауымдастығы, «Атамекен» ҰҚК мен сарапшылар қарсы шыққан. Осыған қарамастан министрлік бұл норманы жаңа Салық кодексі жобасына енгізген.

  • Доллардың құны 500 теңгеге жетті

    Доллардың құны 500 теңгеге жетті

    Kurs.kz мәліметінше, Қазақстанда доллар қымбаттап, 500 теңгеге жетті. Астанада 500 теңгеге сатылып, 495 теңгеге сатып алынып жатыр. Ал Алматыда АҚШ долларының құны мынандай: сату – 498,77 теңгені, сатып алу – 496,88 теңге.

    Айта кетейік, 15 қарашада Астана доллар 498,02 теңгеге сатылып, 493,02 теңгеге сатып алынған.

  • Қаржы министрлігі: Мемлекеттік қызметшілерге сыйақы беруге тыйым салынған жоқ

    Қаржы министрлігі: Мемлекеттік қызметшілерге сыйақы беруге тыйым салынған жоқ

    Қазақстан Республикасы үкіметінің 2001 жылдың 29 тамызындағы №1127 қаулысына сәйкес мемлекеттік қызметшілерге сыйақы төлеу, материалдық көмек көрсету, лауазымдық айлықақыларына үстемеақылар белгілеу бюджет қаражатын үнемдеу есебінен ғана жүзеге асырылады. Бұл туралы Қаржы министрлігі мәлімдеді.

    Министрліктің мәліметінше, аталған қаулы арқылы шығыс баптарының нақты тізбесі айқындалған. Олардың есебінен үнемдеу қалыптасқан жағдайда ғана сыйақы төленуі мүмкін (іссапарларға, коммуналды және көлік қызметтеріне, байланыс қызметтеріне, үй-жайларды жалға алуға және т.б. шығыстар бойынша үнемдеу).

    «Бүгінде аталған қаулыға, сондай-ақ басқа да заңнамалық актілерге сыйақыларды шектейтін өзгерістер енгізілмегендіктен мемлекеттік қызметшілерге сыйақыларды беруге тыйым салатындай негіз жоқ. Қаржы министрлігінің осыған дейінгі хабарламасында үкімет қаулысының нормаларын бұлжытпай ұстану қажеттігі және бағдарлама әкімшілерінің қызметкерлерді тізбеде көрсетілгендерден бөлек бюджеттік баптардан қаражатты сыйақыға пайдалануға жол бермеу туралы айтылған болатын. Инвестициялық жобаларды іске асырудан және мемлекеттік аппараттың жұмысына әсер етпейтін материалдық активтерді сатып алудан үнемделген қаражат бюджетке қайтарылуға тиіс», – делінген хабарламада.

  • Компанияға 2 млрд теңге шығын келтірген «Кезби» директоры ұсталды

    Компанияға 2 млрд теңге шығын келтірген «Кезби» директоры ұсталды

    Қаржылық мониторинг агенттігі «Кезби» компаниясының қаражатты жымқыру және салық төлемеу фактісі бойынша сотқа дейінгі тергеп-тексеруді тіркеді.

    ҚМА Маңғыстау облысы бойынша департаменті «Кезби» ЖШС атқарушы директоры Ержан Кезбаевқа қатысты ҚК 190-бабының 4-бөлігі 2-тармағы (аса ірі мөлшердегі алаяқтық) бойынша қылмыстық іс қозғады, деп мәлімдеді агенттік.

    Ол компания қызметкерлеріне жалақы төлеу үшін «Өзенмұнайгаз» АҚ бөлген 321 млн теңгені жымқырып, сондай-ақ 1,5 млрд теңгеге жуық сомаға салық төлеуден жалтарды деген күдікке ілініп отыр, – деп қосты ведомство.

    2021 жылы «Кезби» ЖШС «Өзенмұнайгаз» АҚ-мен бригада үшін сағатына 65 мың теңге бағамен қызмет көрсету шарттарын жасасты. Кейіннен еңбекақы мен медициналық жәрдемақылардың өсуін қоса алғанда, жұмысшылар үшің әлеуметтік пакетті жақсарту мақсатында қызмет бағасы бригада үшін сағатына 87 мың теңгеге дейін ұлғайтылды. Алайда қаражаттың едәуір бөлігін, атап айтқанда 321 млн теңгені компания басшысы қызметкерлердің әлеуметтік жағдайларына жұмсамай жымқырған.

    2024 жылғы 3 қарашада күдікті Е.Кезбаев құрықталды. Қазір жасалған қылмыстың барлық мән-жайын анықтауға бағытталған тергеу әрекеттері жүріп жатыр.

  • Қайрат Боранбаевқа тиесілі компания «Самұрық-Қазынаға» өтті

    Қайрат Боранбаевқа тиесілі компания «Самұрық-Қазынаға» өтті

    Бұрын бизнесмен Қайрат Боранбаевқа тиесілі болған «АзияГаз Чунджа» ЖШС «Самұрық-Қазына» қорына өтті. «Самұрық-Қазына» АҚ «АзияГаз Чунджа» ЖШС жарғылық капиталындағы 100% қатысу үлесін сатып алған. «Самұрық-Қазына газ тарату компаниясына осы жылдың 30 қыркүйегінен иелік ете бастаған. Бұл туралы Қазақстанның қор биржасы мәлімдеді.

    Айта кетері, «АзияГаз Чунджа» тауарлық газды тасымалдау және сатумен айналысады. Былтыр күзде Қайрат Боранбаевтың осы компаниясы мемлекет меншігіне өткен еді. Бизнесмен тергеу барысында компанияны мемлекетке өз еркімен берген.

    Қайрат Боранбаев – қазақстандық кәсіпкер, Қазақстанның тұңғыш президенті Нұрсұлтан Назарбаевтың бұрынғы құдасы. Былтыр Боранбаев ресейлік газ импорты кезінде ақша жымқырғаны үшін кінәлі деп танылып, 6 жылға бас бостандығынан айырылған. Алайда кейін сот жазаның өтелмеген бөлігін бас бостандығын шектеу түріне ауыстырып, 2023 жылғы 6 қарашада Боранбаев түрмеден босап шықты.

  • Қашағанда мұнай мен газ өндіру қайта басталды

    Қашағанда мұнай мен газ өндіру қайта басталды

     Қашаған кен орнында мұнай мен газ өндіру қайта басталды. «Кеше Қашаған кен орнында күрделі жөндеу аяқталып, мұнай мен газ өндіру қайта басталды», – деп атап өтті Энергетика министрлігінен.

    Ведомство өкілдері өндірістің толық қуатта іске қосылмағанын, ал 1 қарашадан бастап толық қуатқа шығу жоспарланып отырғанын нақтылады. NCOC компаниясы 7 қазанда «Қашаған» кен орнының теңіздегі және құрлықтағы нысандарында жоспарланған техникалық қызмет көрсету жұмыстары басталғанын хабарлаған еді.

    «Қашаған» кен орны соңғы ондаған жыл ішінде ашылған ең ірі мұнай кен орындарының бірі болып саналады. Кен орнының өндірілетін қоры 9-13 млрд баррель мұнай аралығында деп бағаланып отыр. «Қашаған» кен орнынан коммерциялық мұнай өндіру 2016 жылдан бері жүргізіліп келеді.

  • Ұлттық банк: Биыл тоғыз айда жалпы ішкі өнім 4 пайызға артты

    Ұлттық банк: Биыл тоғыз айда жалпы ішкі өнім 4 пайызға артты

    Инфляция біртіндеп төмендеп келеді, ал елімізге келсек, қазір экономикалық жағдай – тұрақты, динамика – оң. Бұл туралы Ұлттық банктің төрағасы Тимур Сүлейменов мәлім етті.

    «Биыл жаһандық экономиканың дамуына геосаяси тұрақсыздық ықпал етіп жатыр. Бұл бірқатар әскери қақтығыстарға, әлемдегі сауда-саттық пен инвестициялардың төмендеуіне байланысты. Халықаралық валюта қорының жаңартылған болжамы бойынша, әлемдік экономиканың өсуі 2024 және 2025 жылдары 3,2% болады. Орталық банктер өзінің қатаң монетарлық саясатын сақтағандықтан, жаһандық инфляциялық процестер баяу қалыптасып отыр. Дегенмен, қазір дамыған елдерде инфляция орталық банктердің нысаналы көрсеткішіне жақын. Бұл жетекші елдердегі орталық банктердің ақша-кредит саясатын біртіндеп жеңілдетуге жағдай жасайды», — деді Тимур Сүлейменов Мәжілістің жалпы отырысында.

    Ұлттық банк төрағасының айтуынша, инфляция біртіндеп төмендеп келеді.

    «Қазақстанды алсақ, қазіргі экономикалық жағдай – тұрақты, динамика – оң. Биыл қаңтар-қыркүйек айларында жалпы ішкі өнім 4,0%-ке артты. Экономиканың барлық секторында өнім шығаруда өсім бар. Ең жоғары өсім ауыл шаруашылығында, құрылыс пен көлік саласында байқалып отыр. Инфляция біртіндеп төмендеп келеді. Қыркүйектің қорытындысы бойынша инфляция деңгейі 8,3% болды. Бұл 2023 жылғы ең жоғары көрсеткішпен салыстырғанда 2,5 есе төмен. Алайда, бұл көрсеткіш Ұлттық Банктің 5%-тік таргетінен әлі де алыс», — дейді ол.

  • Мемлекет қостанайлық шаруаларға 40 млрд теңге қарыз

    Мемлекет қостанайлық шаруаларға 40 млрд теңге қарыз

    Қостанай облысында ауыл шаруашылығы өнімін өндірушілерге мемлекет 40 млрд теңге қарыз. Бұл соманың көлемі күн сайын өсіп жатыр. Шаруарлар 24 пайызбен алған кредиттің үстемақысының 17 пайызын мемлекет субсидиялауы тиіс. Алайда, олар сол 24 пайызбен толық өтеп жатыр. Қиналған фермерлер «ҚазАгроҚаржы» корпорациясынан лизингке алған техникаларын қайтарып беруге мәжбүрміз дейді. Немесе мемлекет субсидияны толық өтеп болғанша банктерден алған кредиттерінің үстемақысын «қатырып» қоюды, яғни тоқтата тұруды сұрайды. Ал, ауыл шаруашылығы саласының шенеуніктері Премьер Министрдің тапсырмасы бойынша барлық қарыздар өтеледі деп уәде беруден жаңылар емес.

    «Уәде беріп жатыр. Алайда, әзірге не министрлік, не ауыл шаруашылығы басқармасы қашан төленетіні туралы нақты айта алмайды. Сондай-ақ шаруалар өтінімдерді қараудың мерзімін 10 күнге дейін ұзартуды сұрайды. Біз олардың өтініштерін ұлттық палатамен бірігіп хатқа түсіріп жоғары жаққа жолдадық», — деді Қостанай облыстық кәсіпкерлер палатасының бөлім бастығы Анастасия Кудрина.