Sona.kz

Рубрика: Қазақстан жаңалықтары

  • Air Astana компаниясы Астана әуежайын сынға алды

    Air Astana компаниясы Астана әуежайын сынға алды

    Себебі, әуежай мамандарының кесірінен FlyArystan компаниясының ұшағы бірнеше күн рейске шықпай қалған.

    5 тамыз күні ұшақтың баспалдағын дұрыс пайдаланбаудың нәтижесінде артқы есікке зақым келген. Содан кейін әуе кемесі бірнеше күн тұрақта тұрып қалған, оны жөндеуге қыруар қаржы жұмсалған.

    Air Astana компаниясы баспасөз қызметінің мәліметінше, тіпті, жөндеу жасалып жатқанда FlyArystan-ның жұмыс істеу кестесі өзгертілген.

    «Әуе компаниясы аяқ асты болған жағдай үшін өкінішін білдіреді. Себебі, бұл жайт жолаушыларды уақытылы тасымалдаудың көрсеткіштерін төмендетіп, жұмыстың бірқалыпты жүруіне кері әсерін тигізді. Мұндай оқиғалар Астана әуежайында жаз басталғалы бірнеше мәрте орын алды», – деп жазды баспасөз қызметі.

    Ал Көлік министрлігі болса, Қазақстанның авиациялық әкімшілігі соңғы уақытта әуе кемелеріне келтірілген залал оқиғаларының жиі болуына байланысты елордалық әуежайда жоспардан тыс инспекциясы өткізетінін мәлімдеді.

  • Әкімдіктегі «Алтын белгі»: мемқызметкерлердің арасында озат оқушылар бар ма?

    Әкімдіктегі «Алтын белгі»: мемқызметкерлердің арасында озат оқушылар бар ма?

    Sona.kz редакциясы Қазақстандағы әкімдіктердің кадрлық құрамына ерекше зерттеу жасады. Нәтижесінде мемқызметкерлердің ішінде «Алтын белгі» иегерлері аз екені анықталды. Жоғары академиялық жетістік, мектепте озат болу секілді артықшылықтар мемлекеттік құрылымдарда сирек кездесетін болған.

    Маңызды қалалар

    Зерттеу нәтижесіне сүйенсек, Алматы мен Астана қалаларында мемлекеттік қызметкердің жеке ісін жасау үшін үздік орта білім туралы аттестат маңызды емес. Дегенмен, әрбір әкімдікте Президенттің жастар кадрлық резервінің төрт өкілі жұмыс істейтіні кадрлық іріктеу стандарттарының жоғары деңгейде екенін айшықтады.

    Оңтүстік

    Шымкенттегі әкімдікте үш «Алтын белгі» иегері қызмет етеді. Сондай-ақ мұнда Президенттің жастар кадрлық резервінің өкілі Мұхит Кемелов цифрландыру басқармасының басшысы лауазымында отыр. Бұл –  маңызды салаларда жоғары білікті мамандар болуының қажеттілігін көрсетті.

    Батыс

    Ал елдің батысында үздіктер жоқтың қасы. Маңғыстау және Ақтөбе облыстарында «Алтын белгі» иегерлері табылмады. Алайда, Ақтөбе облысы әкімдігінде алты резервист жұмыс істейді, олар жоғары лауазымдарда, мысалы, әкімнің орынбасары және басқарма басшысы сияқты қызметтерде отыр. Атырау облысы әкімдігінде үздік оқушы болған бес маман қызмет атқаруда, сондай-ақ бұл жерде Президенттің жастар кадрлық резервінің бір өкілі бар. 

    Солтүстік

    Солтүстік Қазақстан және Қызылорда облыстарында «Алтын белгі» иегерлері мен Президенттің кадрлық резервінің өкілдері жоқ. Шығыс Қазақстан, Қарағанды және Абай облыстарында да үздік түлектер жоқ. Дегенмен, Шығыс Қазақстан облысында екі резервист жұмыс істейді, Абай облысында – «Болашақ» бағдарламасының төрт түлегі мен Президент жанындағы Мемлекеттік басқару академиясының тоғыз түлегі, Қарағанды облысында бір резервист жұмыс атқарады.

    Шығыс және басқа өңірлер

    Жамбыл облысы бір резервист пен бір «Алтын белгі» иегерінің болуымен ерекшеленді. Қостанай облысы үздіктер саны бойынша алда келеді, мұнда сегіз қызметкер «Алтын белгі» иегері және үш резервист бар. Жетісу облысында алты қызметкер мен бір Президенттің жастар кадрлық резервінің өкілі қызмет атқарады.

    Алматы облысы әкімдігінде үздік бес түлек пен бір Президенттің жастар кадрлық резервінің өкілі жұмыс істейді. Ақмола облысында бір «Алтын белгі» иегері мен бір резервист бар. Павлодар облысында бір озат оқушы болған маман мен төрт резервист түрлі лауазымдарда отыр. Ұлытау облысында бір, Түркістан облысында «Алтын белгінің» төрт иегері – мемлекеттік қызметкер.

    Айта кетерлігі, Мемлекеттік қызмет істері және сыбайлас жемқорлыққа қарсы іс-қимыл агенттіктерінің бұйрығына сәйкес, орта білім туралы аттестат мемлекеттік қызмет үшін міндетті емес. Бірақ, біздің зерттеу жоғары білім мен ауыз толтырып айтарлықтай жетістіктер мемлекеттік органдарда білікті маман қалыптастырудың маңызды тетігі екенін айқын дәлелдеп берді.

  • Ақмола облысындағы қайғылы жағдай 19 жастағы қыздарының көз алдында болған

    Ақмола облысындағы қайғылы жағдай 19 жастағы қыздарының көз алдында болған

    Ақмола облысындағы қайғылы жағдай 19 жастағы қыздарының көз алдында болған. Оқиғаның қалай болғанын біздің тілшімізге Арнасай ауылдық округінің әкімі Болатбек Байсағанов мәлім етті. Әкімнің сөзінше, бір отбасының 5 мүшесі суға шомылуға келген. Бірақ, 23 жастағы қыздары суға батып, оған 24 жастағы ағасы көмекке жүгірген. Артынша әкесі мен шешесі барған. Өкінішке орай бірін-бірі құтқармақ болған отбасы суға батып кетті.

    «Әкесі ғана малту біледі екен. Қалғандары білмеген. Бұл қайғылы жағдайдан 19 жастағы қыздары ғана аман қалды. Барлық оқиға оның көз алдында болды. Бір отбасының 4 бірдей мүшесі суға батқан жер Астана су қоймасы деп аталады. Бұл жерге суға түсуге болмайды. Жиі ескерту жасалып, рейд жүргізіледі. Бірақ, халық ескертуді елемейді», — деді Болатбек Байсағанов.

    Астана су қоймасы Астана қаласынан 70 шақырым жерде орналасқан.

    Естеріңізге сала кетейік, 5 тамыз күні отбасының 4 бірдей мүшесі суға батып, көз жұмды. Олардың мүрделері табылды. Төтенше жағдайлар министрлігі тұрғындарға шомылуға рұқсат етілмеген жерге түспеуді ескертеді. Бұл адам өмірі үшін қауіпті. Сондықтан, демалыс барысында барынша абай болып, сақтық шараларын сақтауға шақырады.

    Айта кетейік, биыл 1 маусымнан бастап 122 адам суға батып, көз жұмған. Оның 44-і бала.

  • Ақмола облысында бір отбасының 4 мүшесі суға батып кетті

    Ақмола облысында бір отбасының 4 мүшесі суға батып кетті

    Ақмола облысында бір отбасының 4 мүшесі суға батып кетті. Қазір екі адамның денесін іздеп жатыр. Қайғылы жағдай 5 тамыз күні Аршалы ауданындағы Арнасай су қоймасында болған.
    Белгілі болғандай, отбасы мүшелері Астанадан келген. Шомылуға болмайтын жерде суға түскен. Бірінші қызы суға бата бастаған. Оған әкесі мен ағасы көмекке барған. Соңында анасы отбасын құтқаруға ұмтылған.

    Қазіргі таңда 1980 жылғы анасы мен 2001 жылғы қыз баланың денесі судан шығарылды. 1977 жылғы әкесі мен 2000 жылғы ұлының денесін құтқарушылар іздестіріп жатыр. Төтенше жағдайлар министрлігі тұрғындарға шомылуға рұқсат етілмеген жерге түспеуді ескертеді. Бұл адам өмірі үшін қауіпті. Сондықтан, демалыс барысында барынша абай болып, сақтық шараларын сақтауға шақырады.

  • Ақмола облысында бүтін бір отбасы суға батып кетті

    Ақмола облысында бүтін бір отбасы суға батып кетті

    Бұл туралы Төтенше жағдайлар министрлігінің баспасөз қызметі хабарлайды.

    Министрліктің мәліметінше, 4 адамның өмірін қиған қайғылы оқиға Аршалы ауданы Арнасай ауылынан 2 шақырым жердегі Астана су қоймасында болған.

    «Төртеуі де бір отбасының мүшелері. 1980 жылы туған әйел мен 2001 жылы туған қыздың денелерін куәгерлер тапты. 1977 және 2000 жылы туған екі ер адамның денесін Ақмола облысы және Астана қаласының ТЖД құтқарушылары іздеп жатыр», — делінген хабарламада.

    Сондай-ақ ТЖМ отбасы мүшелері шомылуға тыйым салынған жерде суға кеткенін атап өтті.

  • Алматы облысының тауларында сел жүруі мүмкін

    Алматы облысының тауларында сел жүруі мүмкін

    Өңірдегі әкімдіктің мәліметінше, бүгінгі таңда Алматы облысының таулы аудандарында температураның жоғарылауы, мұздықтардың қарқынды еруі және мореналық-мұздық көлдердің толуы, өзен арналарындағы ағынның жоғарылауы байқалуда. Аймақта сел жүру қаупі сейілмей тұр.

    «Талғар өзенінің бассейніндегі №19 көл қазіргі көлдің солтүстік және солтүстік-шығыс бөлігінде жиналған су жағалауды жырып ағуы мүмкін. Осыған байланысты адамдарға Талғар қаласында орналасқан гиротехникалық қондырғыдан асып, тауға, демалыс орындарына шығуға тыйым салынды», — делінген хабарламада.

    Сонымен қатар әкімдік Талғар өзеніне жақын орналасқан үй иелеріне әлеуметтік желілерде, теледидар және радиода таратылатын ресми ақпаратқа үнемі мән беру керек екенін ескертті.

  • Жаңа оқу жылында 1,7 млн оқушыға тегін тамақ беріледі

    Жаңа оқу жылында 1,7 млн оқушыға тегін тамақ беріледі

    1 қыркүйекте Қазақстанның мектептеріне, колледждеріне және жоғары оқу орындарына 3,9 млн бала барады, оның 360 мыңы – бірінші сынып оқушылары. Жалпы оқу жылы 7,9 мың білім беру ұйымында басталады – мұндай мәліметті Үкімет отырысы барысында оқу-ағарту министрі Ғани Бейсембаев айтты, деп хабарлайды Sona.kz ҚазАқпаратқа сілтеме жасап.

    Бүгінгі таңда өңірлерде оқулықтармен қамтамасыз ету 90%-ға жетеді. 25 тамызға дейін барлық оқулықтар өңірлерге жеткізілетін болады.

    Әлеуметтік осал санаттағы отбасылардан шыққан балаларға тегін тамақ беруді ұйымдастыру және әлеуметтік көмек көрсету мәселелеріне ерекше назар аударылды.

    «1 қыркүйектен бастап 1,7 млн оқушы тегін тамақтанатын болады. Жыл сайын әлеуметтік осал санаттағы отбасыларға көмек көрсетіледі. Биыл 510 мың бала мектепке дайындалу үшін тиісті көмекпен қамтылды. Осы мақсатта бюджеттен 22,6 млрд теңге қарастырылған», — деді Оқу-ағарту министрі.

  • Ғали Ормановтың еш жерде кездеспеген кітабы табылды

    Ғали Ормановтың еш жерде кездеспеген кітабы табылды

    Керекуден Ғали Орманұлының «Өмір дастаны» кітабы табылды. Ол Ахмет Байтұрсынұлының қарпінде жазылған.

    Кітапты Павлодар облыстық Бұқар жырау атындағы әдебиет және өнер музейіне қаламгердің жиені Айдар Қырықбайұлы тарту етті.

    Жәдігердің ерекшелігі – кітаптың түпнұсқасы еліміздің өзге кітапханалары мен музейлерінде сақталмаған.

    Кітап араб графикасында 1948 жылы жарық көрген. Басылып шыққан орны – Қазақтың мемлекеттік баспаханасы, «Қазақ елі» журналының баспасы деп көрсетілген. Жинақта ақынның өлеңдері берілген. Атап айтқанда, «Ана сабағы» дастаны, «Алғашқы адым», «Жолда», «Қуаныш», «Біздің ауыл», «Темір ат», «Шеңбер», «Ана толғауы»,«Қырманда», «Ұстаз», «Біздің заман» және тағы басқа өлеңдері басылған.

    «Ақынның аударма саласына сіңірген еңбегі зор. Ол қырғыздың «Манас» эпосының бірінші кітабын, А.Пушкиннің «Мыс салт атты» туындысын қазақ тіліне аударған. Жамбыл Жабаевтың қасында жүріп жазған күнделігі бізге осы кітаппен бірге келді. Күнделіктерді оқып зерттеп жатырмыз. Ол латын әрпімен жазылған, оны Жамбыл атамыздың мерейтойына шығарамыз деп отырмыз», – деді музей басшысы Ербол Қайыров.

    Анықтама үшін:

    Ғали Орманов (1907-1978 жж.) – бүкіл саналы ғұмырын ұлттық әдебиетіміздің өсіп-өркендеуіне, қазақ поэзиясының дамуына арнаған азамат. Оның қаламынан руханиятқа нәр беретін өлең жинақтары, поэмалар, жыр кітаптары, прозалық жинақтар жарық көрген.

  • Пәтерлерде ауыз су тапшы: Қонаев әкімдігі мәлімдеме жасады

    Пәтерлерде ауыз су тапшы: Қонаев әкімдігі мәлімдеме жасады

    Соңғы он күннен бері Қонаев қаласында 40-45 градус Цельсий шамасында аптап ыстық тіркелді. Осы дерекке және ауыз сумен ағаштар, газондарды суаруға байланысты көппәтерлі үйлердің жоғары қабатына су көтерілмей, қысым төмендеуі байқалды.

    Сондықтан «Қонаев Су Арнасы» мекемесі 1 тамыздан бастап барлық демалыс орындарында бассейндерді толтыру және газондарды суаруды күндіз жасауға тыйым салды. Бұдан бөлек, мекеме мамандары шағын аудандар ішіндегі құдықтардың құрылғыларын тексеріп, ретке келтірді. Нәтижесінде су қысымы бір қалыпқа түсті.

    Айта кетерлік жайт, Қонаевта ауыз су желілерінің 80 пайызы тозығы жеткен. Мәселені шешу мақсатында Кешенді даму жоспарына сәйкес, 6 жобаның құжаттары дайындалуда.

  • «Семей орманында» тағы өрт шықты

    «Семей орманында» тағы өрт шықты

    1 тамыз күні «Семей орманы» мемлекеттік орман өрті қызметінің пультына қызыл жалын шыққаны туралы ақпарат түскен. ТЖМ-нің мәліметінше, өрт Бесқарағай ауданындағы Дөңгелек орманшылығында пайда болған.

    7 гектар аумақтағы отпен күреске 60 адам, орманшылық пен ТЖД-ның 15 техникасы, тікұшақ жұмылдырылды. Өрт тез арада ауыздықталып, сөндірілді.