Sona.kz

Рубрика: Қазақстан жаңалықтары

  • Астанада ЛГБТ насихатына қарсы петиция бойынша соңғы отырыс өтті

    Астанада ЛГБТ насихатына қарсы петиция бойынша соңғы отырыс өтті

    Бүгін «Қазақстан Республикасында ЛГБТ-ны ашық және жасырын түрде насихаттауға қарсымыз!» петициясы бойынша шешім жобасына жария талқылау өтті.

    Отырысқа Мәдениет және ақпарат министрлігі, Ішкі істер министрлігі, Оқу-ағарту министрлігі, Әділет министрлігі, Денсаулық сақтау министрлігінің өкілдері, Парламент депутаттары, сарапшылар, қоғам қайраткерлері мен БАҚ өкілдері қатысты.

    Кездесуде мемлекеттік органдардың, өтініш берушілердің, сарапшылардың және басқа да мүдделі тараптардың ұстанымдары айтылған жұмыс тобының алдыңғы екі отырыс нәтижесі талқыланды.

    Қатысушылар петицияны қарау барысында ұлттық және халықаралық нормативтік құқықтық актілерге талдау жүргізіп, жетекші сарапшылармен консультациялар өткізгенін, Қазақстан халқынан алынған әлеуметтік сауалнамалар нәтижелері сараланғанын атап өтті.

    Нәтижесінде уәкілетті орган «Жасөспірімдер мен балаларды жыныстық қатынастарды насихаттау мен культ қылудан қорғау, алшақтату» талаптарына қатысты петицияны ішінара мақұлдау туралы шешім қабылдады. Яғни, балалар аудиториясына сексуалды контент таратуға шектеулер енгізу қажеттілігі қарастырылуда.

    ҚР Мәдениет және ақпарат министрлігі бұл шешім алдын ала және елдегі негізгі заңының ережелеріне, халықаралық және ұлттық нормативтік құқықтық құжаттардың талаптарына, отбасылық және гендерлік саясат тұжырымдамасында көрсетілген мемлекеттік саясаттың негізгі басымдықтарына сәйкес келетінін атап өтті.

    Сонымен қатар, министрліктің шешімі «Бала құқықтары туралы» Қазақстан Республикасының заңына және Конвенцияға негізделеді. Заңға сәйкес мемлекеттік органдар, жеке және заңды тұлғалар баланы әлеуметтік ортаның, қандай да бір ақпараттың, оның денсаулығына, адамгершілігіне және рухани дамуына зиян келтіретін насихат пен үгіттің кері әсерінен қорғауға міндетті.

    Қазақстан Республикасының заңнамасына сәйкес, министрлік ресми шешімді осы жылдың 6 тамызына дейін петиция авторына жолдайды. Осы мәселе бойынша шешім сол шешім шығарылған күннен бастап келесі жұмыс күнінен кешіктірілмей интернет-ресурста жарияланатын болады.

  • Алматыдағы аттракциондардың бірінде қайғылы оқиға бола жаздады

    Алматыдағы аттракциондардың бірінде қайғылы оқиға бола жаздады

    29 маусым күні Алматыдағы Rope Jumping аттракционында ер адам төменге секіру кезінде ауыр жарақат ала жаздады. Әлеуметтік желіде куәгерлер түсіріп алған видео тарады.

    Тұрғындар азаматтың денсаулығына алаңдаушылық танытуда. Айтуларынша, азамат ауада матадай қалықтаған. Алайда, еркек медициналық көмектен бас тартып, өзі үйіне қайтқаны анықталды.

    Парк әкімшілігі зардап шеккен азаматқа сақтандыру бойынша өтемақы алуға кеңес берген. Ол болса, жарақат алғаны үшін 35 миллион теңге сұраған. Бұл — сақтандыру компаниясының өтейтін сомасынан әлдеқайда көп. Сондықтан парк басшылығы құқық қорғау органдарына азаматқа қатысты сұрақтарын жолдап, істің заңдылығын тексеру жайлы арыз түсірген. Нәтижесінде қылмыстық іс қозғалып, тергеп-тексеру жүріп жатыр.

    Сондай-ақ парк басшылығы алдағы уақытта мұндай жағдайлар қайталанбас үшін ресми тексеріс жасалғаны туралы ақпарат таратты. Содан соң арқан оратылып қалған темір алынып тасталған.

     

     

    Посмотреть эту публикацию в Instagram

     

    Публикация от НЕЗАВИСИМОЕ СМИ (@ne_habar_news)

  • Нұртас Адамбайға қатысты сот отырысы кейінге қалды

    Нұртас Адамбайға қатысты сот отырысы кейінге қалды

    Нұртас Адамбайға қатысты «Діни қызмет туралы» заңын бұзғаны үшін өтуі тиіс сот отырысы кейінге қалдырылды. Мұны елорда сотының баспасөз қызметі хабарлады.

    Белгілі продюсерге қатысты қозғалған іс бүгін өтуі тиіс еді.

    Әйгілі актер өзінің әлеуметтік желісінде аталған іске байланысты пікір қалдырды.

    «Астана қаласының дін істері басқармасы мені Қасиетті Құранның аудармасын Инстаграм парақшамда жариялағаным үшін сотқа берді. Шынына келсек, мен біздің елімізде Құранның аудармасын жазба ретінде қалдыруға болмайтынын білмедім», — деп жазды ол.

     

  • Қонаев қаласы жылыту маусымына 85% дайын

    Қонаев қаласы жылыту маусымына 85% дайын

    Қонаев қаласының әкімі Асхат Бердіханов «Жылу орталығы» мекемесіне барып, жылыту маусымына дайындық барысымен танысты.

    Мекеме директоры Оңғарбек Махамбетовтің сөзінше, нысан жылыту маусымына 85 пайыз дайын. №2 және №4 қазандық ағымдағы жөндеуден өтті. Сондай-ақ су жылытқыш №9 қазандыққа ревизия жасалды.

    «Орталықта 10 қазандық бар. Оның төртеуі су жылытқыш, алтауы бу қазандықтары. Қазір су жылытқыш 1 қазандық қана жұмыс істеп тұр, 3-еуі резервте. Бу қазандығының біреуі қолданысқа берілмей, жөндеуден өтуде, 1-еуі жұмыс жасауда, 4-еуі резервте», – деді мекеме басшысы.

    Қалада орталықтандырған жылуға 31 мыңнан астам абонент қосылған. Үйдегі температураның төмендігіне байланысты өтініштердің 70 пайызы қаралып, пәтер иелері кооперативтерімен тығыз жұмыс атқарылуда. Қазір №1,2,3,4 ш/а-дағы көпқабатты үйлердің жертөлелеріндегі қондырғылар тазаланып жатыр.

    «12 тамыздан бастап жабдықтарды тексеру мақсатында шаһарға ыстық су беру тоқтатылады. Мұның барлығы қыстан аман-есен шығу үшін жасалып жатқанын тұрғындар түсінуі қажет», — деді Оңғарбек Махамбетов.

    Сонымен қатар ол №2,4,5 шағын аудандарының жылу желілерін ауыстырып жатқан мердігер компанияның ісі туралы айтты. Сөзінше, сот шешімі жақын арада шығады. Содан кейін конкурс қайта ойнатылады. Мердігер анықталған соң, аталған желіні қазан айының соңына дейін іске қосу жоспарлануда.

    Қала әкімі Асхат Бердіханов болса, нысанды жаңғырту жобасын тездетіп жасауды тапсырды.

    Мамандар халыққа пәтердегі терезелерді жылылап, құбырлар мен радиаторларды уақытылы тазалауға кеңес береді.

  • Алакөлдегі апат: жәбірленушілер дельтаплан иесінен ақша бопсалаған

    Алакөлдегі апат: жәбірленушілер дельтаплан иесінен ақша бопсалаған

    Көлге құлаған дельтапланның иесі Асқар Жолдығұтов осылай деп шағымдануда.

    Оның сөзінше, дельтапланды ол былтыр сатып алған. Кейіннен құжаттарын жасап, жөндеуден, тәжірибеден өткізіп, сатып жібермек болған.

    «Дельтапланның сыртында жазылып тұрған нөмір – менікі. Алайда, оған ақша аударымдары түскен жоқ. Ұшқыш күніне миллион табады деген пікір де жалған. Жағдайын барып көрсеңіздер болады. Ол дельтапланды жөндеп болған соң жақындарын ұшырып жүрген, кейіннен басқа азаматтарға қызмет көрсете бастаған. Мен бұл туралы білген жоқпын», — деді Асқар Жолдығұтов.

    Дельтапланның иесі әуе кемесінің құлауын қылмыстық іске теңемей отыр.

    «Иә, апат болғаны рас. Алайда, бұл – қылмыстық іс емес, айыппұл салынуы мүмкін», — деді ол.

    Асқар Жолдығұтов жәбірленушілердің туысқандары медициналық көмектен бас тартып, ақша сұрағанын атап өтті.

    «Олар мені халықтың жауы қылды. Ұшқыштың атынан кешірім сұрадым. Медициналық көмек көрсетуді ұсындым. Бас тартты, ақша сұрады», — деді Асқар.

    Ал жәбірленуші Баянның жақындарының мәліметінше, оның миы шайқалып, тізесі мен табан сүйектері бірнеше жерден сынған, оң жақ бетіне зақым келген.

    Естеріңізге сала кетейік, 25 шілде күні 2 адам мінген дельтаплан Алакөл көліне құлады. Қазір сотқа дейінгі тергеу жүріп жатыр. Көлік министрі Марат Қарабаев барлық әуе кемелерінің тексерістен өтетінін мәлімдеді. Асқар Жолдығұтов болса, «Жерді зерттеу жөніндегі жұмыстарды жүргізудің мемлекеттік институты» РМК-ның Жетісу облысындағы қосынының басшысы қызметін атқарады.

     

  • Қонаевта заңсыз саудамен күресудің жаңа тетігі пайдаланылмақ

    Қонаевта заңсыз саудамен күресудің жаңа тетігі пайдаланылмақ

    Саудагерлер әкімнен күнкөріс көзінен айырмауды сұрады. Шаһар басшысы болса, әкімдіктің ұстанымын түсіндіріп, оларға бірнеше талап қойды.

    «Бұған дейін сіздерге «Айша сити» базарында 6 ай, «Жетісу» базарында 3 ай тегін орындарды дайындап бердік. Тұтынушы аз болатынын алға тартып, бармадыңыздар. Қазір қала үлкейіп, күннен-күнге дамып келеді. Мәселені бір жағына шығаруымыз керек. Абаттандырылып, әдемі болып тұрған көшенің келбетін заңсыз сауда орындары бұзып тұрғанын бәріміз түсінуіміз қажет», — деді Асхат Бердіханов.

    Сонымен қатар ол тұрғындардан жиі шағым түсетінін атап өтті.

    «Тұрғындар аулада сауда жасайтындар қоқыстарын тастап кететінін, аяқ алып жүре алмайтындай жағдай туғанын айтып, жиі шағымданады. Сіздердің қамдарыңызды ойлап, проблемаға біржақты қарауға болмайды», — деді шаһар басшысы.

    Әкім түйткілді тарқату үшін «Айша сити» базарының алдына дүңгіршектер қойылатынын айтты.

    «Әкімдік барлық тұрғынның қамын ойлайды. Сол үшін сіздерді тыңдай келе, базардың алдынан дүңгіршектер орнатуды жөн көріп отырмын. Бірақ, бизнес орындары қойылғанда сіздер жеке кәсіпкер ретінде тіркеліп, салық төлеп, жұмыс жасауларыңыз қажет», — деді әкім.

    Содан кейін ол «Айша сити» базарын аралап шықты. Базар басшылығына жаңадан салынып жатқан нысанды бірыңғай дизайн-кодқа сәйкес етіп жасауды тапсырды. Ал сәулет және қала құрылысы, кәсіпкерлік бөлімдерінің басшыларына сауда орындарын қою үшін тез арада құжаттарды рәсімдеуді жүктеді.

  • Алматы – Қонаев: жол жиегіндегі «жабайы сауда» жүргізушілерге қауіп төндіруде

    Алматы – Қонаев: жол жиегіндегі «жабайы сауда» жүргізушілерге қауіп төндіруде

    Алматы-Қонаев күре жолында көлік ағыны көп. Дәл сол жол жиегінде рұқсатсыз сауда жасап жатқандар адам өміріне қауіп төндіруде. Мұнда шатырлар да, дүңгіршектер де қойылған.

    Әсіресе, жаз мезгілінде жағдай ушығады — дейді автокөлік жүргізушілері. Көрсе көз тартар жеміс-жидек үшін көліктер жолға тоқтайды. Бұдан кептеліс, апаттық жағдайлар туындайды.

    Түйткілдің түйреп тұрғанымен, әзірше, Алматы облыстық ПД мәселені шешу үшін ешқандай шара қолданар емес.

    Sona.kz редакциясы ПД бастығы Бауыржан Әленовке жалынды сәлем жолдайды. Күні-түні көліктен босамайтын трассада қауіпсіздікті қамтамасыз ету керек-ақ.

  • Су тасқынынан зардап шеккендерге күзге дейін баспана берілуі керек — вице-премьер

    Су тасқынынан зардап шеккендерге күзге дейін баспана берілуі керек — вице-премьер

    Кеңес барысында үш негізгі мәселе талқыланды: ТЖ жағдайында жедел ден қою үшін республикалық және өңірлік штабтардың өкілеттіктерін кеңейту, техника мен жабдықтарды тасымалдау тетігі, сондай-ақ табиғи апаттар кезінде мүлікті сақтандыру.

    Ұлттық экономика министрлігінің деректері бойынша шағын және орта бизнес (ШОБ) субъектілерінен жалпы сомасы 3,4 млрд теңгеге 291 өтінім келіп түсті. Қаражат қазірдің өзінде өңірлерге Үкіметтің резервінен бөлінді, бірақ өтініш берушілердің үштен біріне ғана жетті. Осыған байланысты вице-премьер «Атамекен» Ұлттық кәсіпкерлер палатасының ескертулерін назарға ала отырып, бизнеске төлем жасаудың әдістемесін пысықтауды, оның ішінде АӨК кәсіпкерлеріне келтірілген залалды өтеуді тапсырды.

    Су тасқыны кезінде техниканың жетіспеушілігі мәселесі туындады. Оны басқа облыстардан көшіру бойынша жедел шаралар қабылданды. Бірқатар өңірде әкімдер қолда бар автопарк саны туралы ақпаратты білмеді, сондықтан арнайы есепке алуды жолға қою қажет.

    «Біз бүгін биылғы су тасқыны бойынша қорытынды жасап, келесі жылдың су тасқыны кезеңіне дайындықты бастау үшін арнайы жиналдық. Қазір біз тұрғын үйді қалпына келтіру және залалды өтеу бойынша барлық жұмыстарды уақтылы аяқтауымыз керек. Ең бастысы, зардап шеккендер күзге дейін баспанамен қамтамасыз етілуі керек. Көктемге дейін әлі алыс. Бірақ су тасқыны кезеңіне дайындық шаралары күзде аяқталуы керек. Су тасқыны қателікті, орындалмаған жұмыстарды және жеткіліксіз қаржыландыруды кешірмейді», — деп атап өтті вице-премьер.

    Қанат Бозымбаев ТЖ мен су ресурстары және ирригация Министрліктеріне су тасқынына дайындық және халықты апаттардан қорғау алгоритмін әзірлеуді тапсырды. Облыс әкімдіктері — су тасқынының алдын алу шараларын қамтамасыз етеді, барлық гидротехникалық және қорғаныс құрылыстарын тексеріп, айналма арналарды дайындайды. Қаржы министрлігі — әр өңірде төтенше резерв құру жөнінде ұсыныстар енгізуі тиіс. Ол тұрақты, төмендетілмейтін, келесі жылға ауысатын және тек төтенше жағдайларда қолданылуы керек.

  • UFC-да қазақстандық жаңа файтер өнер көрсетеді

    UFC-да қазақстандық жаңа файтер өнер көрсетеді

    Қазақстандық файтер Николай Веретенников (12-4) UFC-да тартысты ойын көрсетпек.

    Шетелдік дереккөздерге сүйенсек, спортшы қысқа хабарламада бірде-бір рет жеңілмеген американдық Дэнни Барлоумен (8-0) жекпе-жекті қабылдаған. Дода 10 тамыз күні өтіп, UFC Vegas 35 турнирінің бір бөлігі болмақ.

    Айта кетейік, Николай Веретенников АҚШ-та тұрады. UFL лигасында соңғы үш жекпе-жегін өткізіп, бәрінде жеңімпаз атанған. Ол 2021 жылы UFC-да Майкл Моралеске есе жіберген.

  • Қостанай облысының бас имамы мас күйде көлік жүргізіп, УҰИ-ға қамалды

    Қостанай облысының бас имамы мас күйде көлік жүргізіп, УҰИ-ға қамалды

    Мәлім болғандай, полицейлер бас имамды көлікті мас күйде жүргізгені үшін ұстаған. Ол Toyota Highlander көлігін басқарып келе жатқан. Автокөлікті тоқтатқан соң жол сақшылары оның ішімдікке сылқия мас болғанын анықтаған. Кейіннен мұны медицина қызметкерлері де растаған.

    Аталған жайт қоғамда қызу талқыланып жатыр.