2026 жылғы 1 қазаннан бастап Қазақстанның медициналық ұйымдарында медицина қызметкерлері үшін маска режимі енгізіледі.
Бұл талап Қазақстанның Бас мемлекеттік санитариялық дәрігерінің 2026 жылғы 28 тамыздағы №11-ПГСВ қаулысында көзделген. Құжат 2026-2027 жылдардағы эпидемиологиялық маусымға арналған профилактикалық шараларды белгілейді.
Шешім тұмау, жіті респираторлық вирустық инфекциялар және COVID-19 ауруларының маусымдық өсуінің алдын алуға бағытталған.
Алайда бұл елде жаппай маска режимі қайта енгізіледі дегенді білдірмейді.
Қаулыда барлық азаматқа қоғамдық көлікте, сауда орталықтарында, мектептерде, басқа қоғамдық орындарда немесе көшеде міндетті түрде маска тағу талабы жоқ.
Сондай-ақ медициналық ұйымдарға келген барлық пациент пен келушіге міндетті түрде маска тағу жөнінде жеке талап белгіленбеген.
1 қазаннан бастап маска режимі нақты медициналық ұйымдардың қызметкерлеріне қатысты енгізіледі.
Сонымен бірге медициналық мекемелер тұмау, ЖРВИ және коронавирус жұқтырған пациенттер санының ықтимал өсуіне дайындалуы тиіс.
Медициналық ұйымдарға респираторлық инфекция белгілері бар пациенттерге арналған сүзгі кабинеттерінің жұмысын қамтамасыз ету, дезинфекциялық шараларды күшейту, инфекциялық және жансақтау төсектерінің жүктемесін бақылау, қажетті дәрі-дәрмек пен жеке қорғаныс құралдарының қорын дайындау тапсырылған.
Науқастар саны көбейген жағдайда қосымша инфекциялық төсектер ашу қарастырылған.
Эпидемиологиялық маусымға дайындықтың тағы бір бөлігі тұмауға қарсы вакцинацияға қатысты. Профилактикалық екпе алуға жататын топтарды вакцинациялау 15 қыркүйектен басталуы тиіс.
Осылайша, 1 қазаннан бастап енгізілетін негізгі өзгеріс медицина ұйымдарының қызметкерлеріне қатысты. Ал Қазақстан халқы үшін жаппай міндетті маска режимі енгізілмейді.
