Алматыда ІІМ академиясының курсантына қатысты дау қоғам назарын аударды. Әлеуметтік желілерде таралған жазбада автор оның бұрынғы сүйген қызын ұрды деп мәлімдеді. Айтуынша, оқиға 29 қарашада болып, жәбірленуші – 17 жастағы алматылық қыз, деп хабарлайды Sona.kz Tengrinews.kz-ке сілтеме жасап.
Пост авторының айтуынша, қыз бұрынғы жігітімен кездесуге келісіп, оның көлігіне отырған. Осы кезде ол қыздың телефонын сұраған, ал қыз жеке заттарын беруден тартқан. Осыдан кейін, жазбаға сәйкес, курсант агрессия көрсетіп, ременьмен және қолымен қысып, басынан ұрып, көліктен шыққан қызды қайта күштеп отырғызған. Жәбірленушінің отбасы қыздың басынан соққы алғанын, денесінде іздер мен жарақаттар анықталғанын мәлімдеді.
Әлеуметтік желілерде жарияланған бұл оқиға қызу талқыға түсті. Бұған дейін де күштік құрылымдарға оқуға түскен жастардың қатысуымен болған жанжалдар талқыланған еді. Қолданушылар болашақ полиция қызметкерлерін іріктеу мен тәрбиелеу тетіктерін қайта қарау қажеттігін атап өтті.
Алматы қалалық Полиция департаменті оқиға бойынша қылмыстық іс қозғалғанын растады. Полиция өкілдері жәбірленушіні, оның ата-анасын және өзге де қатысушыларды сұрап, қажетті материалдарды жинаған. Алайда, ведомствоның хабарлауынша, қыз бен оның ата-анасы арыз жазудан және сот-медициналық сараптамадан өтуден бас тартқан. Тексеру кезінде көзге көрінетін дене жарақаттары анықталмаған.
Осыған байланысты және қадағалау органының келісімімен қылмыстық іс өндірісі заңнамаға сәйкес тоқтатылды. Дегенмен ІІМ академиясы өз шешімін қабылдап, тәртіптік комиссияның шешімімен оқиғаға қатысы бар курсантты оқудан шығарды.
Полиция мұндай жағдайлар белгіленген тәртіппен қаралатынын атап өтті. Желі қолданушылары курсанттар мен күштік құрылымдардағы білім алушыларға қатысты бақылауды күшейтуді талап етіп, талқылаулар жалғасып жатыр.
