Әуежайда қаскөйдің қолынан пышақты жұлып алған адам әнші, «Жігіттер» квартетінің продюсері Ерғали Әбдірайымовтің інісі және квартет мүшесі Бағлан Әбдірайымовтың ағасы болып шықты.
Бұл туралы Ерғали Әбдірайымов пен Бағлан Әбдірайымов әлеуметтік желіге жазба қалдырды.
«Ата-анадан туған 7 бала, 1 қыз едік.
Ішіміздегі кенжеміз — Абдраймов Мұса Сайранбайұлы 1973 жылы Түлкібас ауданы, Күмісбастау ауылында дүниеге келген.
Бүгін мені «Жігіттер» тобымен Қостанай қаласына 09.25 те концерттік шараға әуежайдан шығарып салып, ұшақтан түссек әлеуметтік желі қайнап, көптеген қоңырау түсіп, «Мұса сіздің ініңіз емес пе?» деп жатыр. Ішімнен не бүлдіріп қойды екен деп қобалжыдым. Сөйтсем нағыз ер мінезді жігіттің ісін жасап, елдің құрметіне ілініп жатыр екен.
Ол кәсіби спортпен шұғылданған. Қазіргі таңда 5 баласы бар ардақты әке. Бүгінгі ерлігі «еркекпін» деп жүрген біраз жігіттердің қолынан келмейді. Ешкім батыр боламын, қахарман боламын деп жоспармен жүрмесі анық. Дер кезінде дұрыс шешім қабылдап, өзіңнің қоғам алдындағы жауапкершілігін сезініп, басыңды кепілдікке тігу үлкен ерлік пен имандылықтың белгісі.
Мемлекеттік марапатқа да ұсынып үлгеріпті. Кез келген марапатқа лайықсың!», — деп жазды.
Айта кетейік, Алматыда ер адам әуежай қызметкеріне пышақпен тап берген. Телеграмда ер адам әуежай қызметкерінің шашынан ұстап алып, қоқан-лоқы көрсетіп жатқан видеосы тарады. Ер адамның қолында пышақ болған.
Артынша белгісіз ер адам қаскөйге қызды жіберіп, кепіл ретінде өзін ұсынып, қасына келген.
Желіде тараған видеоларда ер адам алдымен қаскөймен сөйлесіп тұрып, артынша қолындағы пышағын жұлып алады.
